Tengman Ai Tara A Matu Sat Kau Hkrum Lai Wa Sai Tara Sakse Marai 7 Hpe Alu Ai Masha Dang Da Ya Lai Wa

June 2, 2019 ya shani, Romania Mungdan Blaj ngu ai mare hta galaw lai wa ai Missa hkungga hta, tara a matu sat kau hkrum lai wa sai Roamnia Saradaw marai 7 hpe Wa Sarabyin Francis kaw nna Alu ai masha dang da ya lai wa ai. Romania Mungdan Communist Asuya up hkang taw ai aten, sat kau hkrum lai wa ai Saradaw ni re, nga ai.

Ndai Saradaw marai 7 hte gaw 1948 ning hta rim hkrum lai wa ma ai. Htawng hta bang da ai aten bungli shaja ni shangun, malu masha shaket da re ai lam ni a majaw, machyi makaw ana ahkya law law hkrum, kaw si hpang gara hkrum rai nna si hkrum lai wa ai Saradaw ni re, nga ai. Shanhte hpe Alu ai masha dang da ai June 2, 2019 ya laban shani galaw ai Missa hkungga hta lang ai lahkum gaw, dai shanhte zingri sat hkrum lai wa ai htawng kata na yupku hpun pyen, bai htawng hkuwat hta lang ai hpri ni the galaw da ai lahkum re, nga ai.

Dai Saradaw ni hta na langai gaw, Iuliu Hossu ngu ai wa rai nga ai, Roma kaw Theology hpaji sharin ngut nna bai wa ai hte rip hkrum ai, 22 ning tup htawng hta rawng lai wa ai. 1969 ning hta Wa Sarabyin Pawlu VI kaw nna Iuliu Hossu hpe Cardinal shatai lai wa ai, raitim mung Iuliu Hossu hku nna shi hpe Cardinal shatai ya lai wa ai lam shi galoi nchye lai wa ai.   

Vasile Aftenie ngu ai Saradaw mung Roma kaw hpaji sharin hkam la lai wa ai Saradaw re, rim hkrum ai hpang aja awa zingri hkrum nna dai wunma ni a majaw 1950 ning hta nnga ma wa ai. Ioan Balan ngu ai Saradaw gaw 1948 ning hta rim hkrum ai, lak san la pat da ai gawk hta bang da hkrum nna tara je yang ai lam ni hpa garai n galaw yang 1959 ning hta nnga mat wa ai. Valeriu Traian Frentiu ngu ai Saradaw gaw asak 37 ning hta Saradaw tai wa ai, 1948 ning hta rim hkrum nna 1952 ning nnga mat wa ai. Ioan Suciu gaw 1931 ning hta jau tai wa ai, rim hkrum nna lu sha shaket da hkrum ai majaw machyi makaw law law hkrum let nnga mat wa ai, garai nsi shi yang jahtum shi tsun da lai wa ai ga langai mi gaw, “manu ndan ai masu malu nga ai ga sadi ni, ga ni a hkalem ai hta nhkrat sum mat ga, Madu Yesu hpe shing nrai Nawku hpung hpe anhte nmai dut kau ai” nga ai lam rai nga ai. Tito Liviu Chinezu ngu ai Saradaw gaw htawng hta rawng nga ai aten shi hte rau htawng rawng nga ai Saradaw ni kaw nna Saradaw aya jaw ya ai hpe lu la lai wa ai Saradaw rai nga ai. Ndai lam hpe asuya ni chye kau ai majaw shi hpe kaga htawng de sit kau ai hkrum ai dai shara hta sha katsi ai hte kaw si hpang gara ai lam ni hkrum nna nnga mai wa ai. Kaga langai gaw Alexandru Rusu ngu ai Saradaw rai nga ai, 1948 ning hta rim hkrum nna 1963 hta nnga mat wa ai, si ai aten kadai kyu hpyi ya ai lam ni nnga ai sha htawng lup wa hta lup kau hkrum lai wa ai.

Ndai Greek Kahtawlik Saradaw ni marai 7 rim hkrum lai wa ai 1948 ning Nov 28 ya shani kaw nna, Romania Mungdan hta Communist asuya hkrat sum mat ai 1989 ning du hkra laman hta, Romania myu sha ni hku nna, shanhte na la, hkap la lu lai wa ai langai sha re ai akyu hpyi Nawku lam gaw Vatican Radio kaw nna Romania myu sha ga the shapoi ya ai Missa hkungga nawng ya ai lam rai nga ai, nga nna Vatican shiga dap kaw nna shana dat nga ai. 

 Source:Vatican News