Hkristan Nawku Hpung Langai Hte Langai Lapran Shada Da Chye Na Hkat Ai Masa Hte Rau Hkawm Sa Na Ahkyak Ai Lam Wa Sarabyin Francis Tsun

 Hkristan Nawku hpung langai hte langai lapran shada da chye na hkat ai masa hte rau hkawm sa na ra ahkyak nga ai, nga nna Wa Sarabyin Francis tsun dat nga ai. Lai wa sai bat masum ya shani San Peter pa kaba hta du hpawng nga ai shawa hpawng kaba hpe, Romania Mungdan de du gawan sa ai shi a hkrun lam mahkrum madup ni hpe tsun hti dan lam galaw ai aten, lahta na zawn tsun dat ai lam rai nga ai.

Romania Mungdan hta du gawan nga ai aten galaw lai wa ai hkrum bawng ban hpawng yawng ngu na daram hta, makam masham lam hte tsawra magam bungli lam ni hta Hkristian ni hku nna shada da rau magam bungli galaw, rau hkawm sa na ra ahkyak nga ai zawn, mungchying mung shawa hte seng ai magam lam ni hta shada da rau hkawm sa na ra ahkyak nga ai lam ni hpe madung da tsun shaga bawng ban ai lam ni galaw lai wa ai, nga nna Wa Sarabyin tsun dat nga ai.

Romania hkrun lam laman shi hpe kabu gara hkap hkalum la lam galaw lai wa ai Romania Orthodox Nawku hpung ningbaw ni hpe chyeju dum ai lam, shanhte hte hkrum shaga bawng ban ai aten Orthodox Nawku hpung hte bai gahkyin gumdin wa na lam hta Kahtawlik Nawku hpung matut shakut hkawm sa nga na re lam hpe mung, Orthodox Nawku hpung ningbaw ni hpe Wa Sarabyin shi tsun da lai wa sai lam chye lu ai.

Orthodox Nawku htingnu kaba hta “Madu a Akyu hpyi ga” rau jawm tsun akyu hpyi lai wa ai lam, ndai akyu hpyi ga gaw Hkristan ni yawng a akyu hpyi ga rai nga ai, ndai zawn rau akyu jawm hpyi ai lam gaw Hkrisitian Nawku hpung shada ganawn mazum lam hta ahkyka ai lam rai nga ai, nga nna mung Wa Sarabyin tsun dat nga ai.

Teng man ai tara a matu sat kau hkrum lai wa sai Romania Greek Kahtawlik Saradaw marai 7 hpe mung hkrun lam laman Alu ai masha dang da lai wa ai lam shawa hpawng hpe Wa Sarabyin tsun hti dan lam galaw lai wa ai, nga nna Vatican shiga dap kaw nna shana dat nga ai.

Source:Vatican News