Karai Kasang a Mungga - Madu Yesu Lamu De Lung Wa Ai Poi N Htoi

Chyum Mungga Daw I 

Kasa 1:1-11

¹ Yesu gaw, shi a lata la ai kasa ni hpe, chyoi pra ai Wenyi hte ga matsun hkang da ngut nna, ntsa de shalun la hkrum ai nhtoi du hkra, ² galaw dan ai hte, sharin shaga wa ai yawng mayawng a lam, shawng na laika hta ngai hpajang da se ai, Htawhpilu e: ³ shi gaw nni nkri hkrum ai hpang, shi hkum chyahkrung hpe, kam ging ai sakse law law hte shanhte hpe madun dan nna, Karai Kasang a mungdan lam hkai dan let, nhtoi mali shi ya laman e, shanhte kaw shi hkum sa pru dan dan di mu ai. ⁴ Shing rai rau hpawng nga yang, shi shanhte hpe, Yerusalem kaw na n pru ai sha, nanhte ngai kaw na na la ai, Wa a ga ndat hpe a la nga mu, nga nna hkang da nga ai: ⁵ ga ndat dai gaw, Yawhan gaw hka hte baptisma jaw ai; nanhte chyawm gaw nhtoi gade n na yang, Chyoi pra ai Wenyi hta baptisma hkam la lu na ma rin dai, nga ai, rai nga ai. ⁶ Dai rai nna, naw hpawng nga ma yang shanhte gaw, Madu e, dai Mungdan Israela masha ni hpe, ndai aten e bai de ya na rai sa ni? ngu nna shi hpe san mu ai. ⁷ Shi gaw, Wa gaw shi a hpung dagu hte, hkang tawn ai aten hte ahkying ladaw hpe, nanhte chye shara n nga ai: ⁸ rai ti mung, Chyoi pra ai Wenyi nanhte a ntsa e du jang, nanhte n-gun atsam lu la na ma rin dai rai nna, nanhte gaw Yerusalem mare hte Yuda mung ting, Samari mung hte lamu ga htum hkra, nye a sakse ni tai na ma rin dai, ngu nna shanhte hpe tsun mu ai. ⁹ Ndai tsun nga yang, shanhte yu nga ninglen shi hpe ntsa de shalun la ai rai nna, sumwi gaw shanhte a man na shi hpe magap la mat wa ai. ¹⁰ Shi lung mat wa nna, shanhte lamu de naw azi yu nga yang, yu mu, hpraw tu ai hpun palawng bu hpun ai marai lahkawng, shanhte a makau e tsap pru nna, ¹¹ Galile masha ni e, hpa rai lamu de naw dawng yu nga myit ta? Nanhte a man na sumsing lamu de shalun la ai wa, dai Yesu gaw, nanhte mu nga yang sumsing lamu de wa ai zawn, dai hku bai du na ra ai, ngu nna tsun mu ai.

Chyum Mungga Daw II

Ehpesu 1:17-23

¹⁷ Anhte a Madu Yesu Hkristu a Karai Kasang ngu ai, hpung shingkang a Kawa gaw, shi hkum nan hpe chye chyang lu mu ga, hpaji byengya hte shingran shapraw ai Wenyi nanhte hpe jaw ya u ga hte ; ¹⁸ shi shaga la ai a jaw e myit mada shara gaw gade wa kaba nga ai mung ; n taw n tsang ai hpung shingkang rawng ai shi a sali wunli gaw chyoi pra ai ni hta e gade wa kaba nga ai mung ; kam sham nga ai anhte hta e shi a nachying galu kaba htum ai atsam gaw, gade wa galu kaba nga ai mung, ¹⁹ nanhte chye na lu myit ga, nanhte a kraw lawang na myi gaw htoi san wa ma lit ga, ngai hpyi nga nngai. Dai atsam chyawm gaw, shi a n-gun lagaw hte atsam shapraw wu ai hte maren, ²⁰ Hkristu hpe si mat ai ni kaw na sharawt la yang, shi shapraw dat wu ai rai nna, ²¹ du magam, hkang ai ahkang, hpung dagu hte up ai aya lu ai ni nlang hte a ntsa e mung, ndai aprat hte htawm hpang na aprat e mying lu ai shingteng amying nlang hte a ntsa e mung, shi hpe shatsaw nna, sumsing lamu lahta tang hta, shi a hkra maga e dung nga shagun da wu ai. ²² Arai baw sumhpa hpe shi a lagaw npu e shi tawn da nu ai rai nna, yawng mayawng a baw tai na, dai Hpung kaw shi hpe jaw da wu ai : ²³ dai Hpung gaw, yawng mayawng hpe jahpring shatsup lu ai wa a hkum tsup ngu ai Hkristu a hkum hkrang rai nga ai.

Kabu Gara Ai Shiga

Luka 24:46-53

⁴⁶ Hkristu gaw nni nkri hkam nna, masum ya du ai nhtoi e si ai ni kaw na hkrung rawt wa na ra ai lam mung, ⁴⁷ Yerusalem mare kaw nna, masha amyu baw shagu hpe yubak raw dat kau ya lu ai myit malai lu na lam hpe, shi a amying nsang hte hkaw tsun lu na mung, ning nga nna ka da nga ai. ⁴⁸ Nanhte gaw ndai lam ni a sakse ni rai nga myit dai. ⁴⁹ Yu mu, nye Wa a ga ndat nanhte a ntsa e ngai shangun dat na ring ngai: nanhte chyawm gaw, matsaw ning tsang de na n-gun atsam dagraw la lu ai nhtoi du hkra, ndai mare e naw la nga ma la, ngu nna shanhte hpe tsun dat mu ai. ⁵⁰ Dai hpang shi gaw shanhte hpe Behtani kahtawng hte tawtap du hkra woi sa wa nhtawm, shi a lata sharawt nna, shanhte hpe shaman ya mu ai. ⁵¹ Shingrai shanhte hpe shaman ya nga yang, shi shanhte kaw na hka mat wa nna sumsing lamu de woi shalun la ai hkrum wu ai. ⁵²Shanhte chyawm gaw shi hpe naw ku nna, nachying kabu gara let Yerusalem mare de bai wa nhtawm, ⁵³ Karai Kasang hpe shakawn kungdawn let, naw ku Htingnu e tut nawng e a nga nga ma ai.