Yesu A Salum.Ningsang Poi Laban B Shaning, 2024

Yesu A Salum.Ningsang Poi Laban

( Karai Kasang a Mungga) B Shaning, 2024

Hkristu hta tsawra hkungga ai nu wa hpu nau ndai Laban gaw kaba la ai Madu Yesu a Salum Ningsang Poi nhtoi rai nga ai..ndai laban gaw Karai Kasang a kaba la ai tsawra myit hpe shakawn shagrau nawku daw jau ai poi nhtoi mung rai nga ai..

Tsawra ai ngu ai hpe anhte a myi hte n mu mada lu ai..dai zawn n mu mada lu ai tsawra myit hpe masin salum hte tsun shadawn nna lang ai mung rai nga ai...anhte a myit masin hkam sha shamu shamawt ai lam mahkra gaw anhte a salum hta e wa daju ai rai nga ai ga shadawn kabu hpa lam ni hpe na ai ten anhte a myit masin salum kabu duk dak nga ai zawn yawn hpa lam ni hte hkrum katut wa ai shaloi mung anhte a myit masin salum hta sha hkra machyi ai rai nga ai..

Madu Yesu gaw Karai Kasang rai nga ai zawn shinggyim masha ajet mung rai nga ai dai Madu Yesu a salum gaw anhte a salum zawn sha shamu shamawt hkam sha chye ai salum rai nga ai..ga shadawn shi hpe bau maka ai kawa san Yawsep hte kanu chyoi pra ai maria yan a tsawra ai lam lu la ai shaloi shi hta e myit dik myit pyaw ai lam hkam sha lu nga ai zawn shi nga kaba wa ai shi a buga hta kabu hpa lam ni nga ai ten ni hta mung kaba pyaw nga na sha rai nga ai..shi madu hpe chyeju bai n ginhtang ai zawn rai yang mung shi a myit hta n pyaw na re...shi tsawra ai masha langai ngai si mat wa ai ten hta shi mung myit npyaw ai..yawn chyen lawm ai lam ni nga ai hpe jachyum mungga hta tsun da ai hpe mu lu nga ai..

Masin hta shamu shamawt hkam sha ai hte seng nna anhte a masin salum hte Madu Yesu a masin salum lapran na shai hkat ai lam ni mung nga nga mali ai dai gaw shi a masin salum hta kadai shinggyim masha mung nhkam sha yu ai masin salum a shamu shawt ai madang shi hta nga nga ai..ga shadawn shi kawa shi hpe dik hkra tsawra ai lam ngu ai hpe dum chye nga ai majaw shi a masin salum hta kade daram myit dik myit pyaw lam kaba nga nga na ngu ai masa hpe kadai shinggyim masha mung hkam sha chye na mai na n rai nga ai zawn anhte hpe shi gade tsawra nga ai kade sha hkye la mayu nga ai ngu ai hpe kadai shinggyim masha mung atsin ayang tsun shaleng dan ya lu na n rai nga ai..dai zawn sha shi a tsawra myit hpe hkap la na ningdang kau ya hkrum ai shaloi shi a myit masin salum hta kade daram yawn madai hkam sha nga ra na ngu ai hpe mung kadai e shadawn ya lu na nrai nga ai..ndai salum.gaw karai kasang mung rai shinggyim masha mung rai nga ai...madu yesu a salum ningsang nan rai nga ai..

dai majaw daini e tsawra myit hte hpring chyat nga ndai Madu Yesu a salum ningsang poi hpe galaw nna Karai Kasang hpe chyeju dum shagrau sha-a nga ga ai mung rai nga ai..

chyum mungga daw langai myi htoi Ezekela a laika hta majan lam amyu myu a majaw shara magup hta chyam bra ayai nga ai chyasam mung hkan garen gari nga bra hkawm nga ai..shi a amyu masha ni hpe karai kasang bai woi kahkin la na lam bai machyi makaw hkrum nga ai ni hte daw hten hkrum nga ai ni hpe Karai Kasang hkum nan shanhte a wunma ni hpe gayawp gahkyen ya na lam.. shanhte a ana ahkya ni hpe shamai ya nna shi a sagu hpung ni hpe lakawn la nna htawm hpang de dai zawn re ai ru yak jam jau lam ni bai nhkrum hkra lakawn la na lam ni hpe myi htoi ga hte tsun shana ya lai wa ai lam rai nga ai..

Ezekela 34:22-23 hta nanhte gaw gawng kya ai sagu ni hpe shara shagu shabra kau hkra nhkrem hte lahpa e htu nna nrung hte daru kau myit dai majaw ngai gaw nye a sagu ni hpe mawai la nna shahte gaw htawm hpang de kashun kashe hkrum na n rai sagu mi hte sagu mi hpe ngai ginhka daw dan na nngai...sagu rem wa langai mi hpe mung ngai sanda nna sagu ni hpe shi rem nga na ra ai..dai wa gaw nye a shangun ma david rai na ra ai..shi sagu ni hpe bau nna dai ni a sagu rem wa tai na ra ai..

Madu Yesu garai ndu sa shi yang shaning 550 ning daram hta tau nau tsun da lai wa ai ndai myi htoi ga ni gaw Madu Yesu du sa wa ai shaloi hkum sup ai de du wa sai lam hpe ndai bat na kabu gara shiga hta mu lu nga ai..kabu gara shiga hta sagu latsa lu ai hta na langai mi mat nga ai majaw hkan tam nga ai sagu rem wa dai mat mat ai sagu hpe bai mu tam la ai shaloi dik hkra kabu pyaw nga ai sagu rem wa a lam ga shadawn hpe anhte na la lu na rai nga ai..sagu rem wa rai nga ai madu yesu a tsawra myit dik hkra kaba la nga ai lam ngu ai hpe shaleng shapraw ya ai ga shadawn rai nga ai..madu yesu shi a salum gaw kaning rai nga ai  salum ngu ai hpe mung ndai ga shadawn hta asan sha tsun shaleng da nga ai..mat mat ai sagu hpe nhkring nsa hkan tam nna bai mu wa ai shaloi tsawra ai hte sagu hpung nga nga ai de bai woi wa ai..sagu rem wa a myit hta mung mat mat ai sagu hpe bai mu la ai majaw dik hkra kabu pyaw ai rai nga ai dai shi a kabu pyaw ai lam gaw anhte hpe shi madu kade daram tsawra nga ai ngu ai hpe shaleng ai lam mung rai nga ai...dai tsawra myit a majaw sagu ni kade lang mat mat wa ai rai tim matut nna shi tut e hkan tam ding yang rai galaw nga ai..

Tsawra ai nu wa hpu nau ni anhte a prat hta shut hpyit mara ni galaw nna Madu Yesu hte tsan ai shara de hkawm pru mat wa nna mat mat ai masha ni anhte jahkring hkring tai yu saga ai re..raitim mung shi madu gaw anhte hpe galoi mung n kau da nga ai..shi hpang de anhte bai kayin nhtang wa na matu shi gade daram ra sharawng nga ai ngu ai gaw shi madu chyu sha chye dik htum rai nga ai..myit malai lu nna shut mara hta na anhte  bai gayin wa lu ai shaloi anhte grai kabu nga ga ai ...bai myit masin hta simsa ai nam chyim ni hpe anhte hkam sha lu ga ai re..ya na zawn shut hpyit ai lam kaw na bai gayin wa lu ai zawn anhte a myit masin hta kabu gara myit pyaw simsa ai lam ni hkam sha lu nga ga ai ten anhte hte rau shi madu mung dik hkra kabu gara ai lam nga nga ai..dai daram anhte hpe tsawra ai madu yesu a salum ningsang hpe ndai laban hta shakawn shagrau ai lam galaw nga ga ai mung rai nga ai..

bai lanagi mi gaw lk 15:7 hta Karai Kasang hpe tut e sadi dung kam sham nna nga sa nga ai ni a majaw sumsing mungdan hta nga nga mai ai kabu gara lam ni gaw shut hpyit nna lam dam mat ai kaw na bai nhtang wa ai ni a majaw sumsing lamu mungdan hta nga nga mai ai kabu gara lam hta n jan hkra rai ti pi maren re ai lam n nga mai a ni ngu nna myit yu na zawn rai nga ai mat mat ai sagu langai hpe sha hkan tam na matu sagu jahku shi jahku hpe rem sin lam n nga ai sha shakram kau da ai gaw dai law la ai sagu hpung hpe hkrit hpa lam ni hte hkrum katut shangun lu mai lam nrai a ni ngu nna mung san na zawn gaw rai nga ai..raitim tsawra ai nu wa hpu nau ni anhte myit dum nga ra ai lam gaw anhte shinggyim.masha ni yawng maren sha rai nga ai..  kalang nrai yang kalang shut hpyit nna lam she de shang lam dam ai ni hkrai rai ga ai majaw sagu ren wa hkan tam la na hpe ra kadawn nga ai ni .anhte rai nga ai..

anhte kadai mung tinang a hkum hpe ngam nga ai sagu jahku shi jahku jahpan hta lawm ai ni ngu nna shawn la nmai nga ga ai shut mara galaw nna dam mat ai sagu kasha anhte ni rai ga ai..shi a kaba dik ai tsawra myit a majaw myi htoi ezekela tau nau tsun shana da ai hta grau nna tawra lakawn chye ai sagu rem wa zawn shi a amyu masha ni hpe  lakawn ya nga ai hte tsawra myit madun ya nga ai rai nga ai shi a tsawra ai lam gaw anhte shinggyim masha ni tsun shapraw shaleng dan ai ga si ni hta grau nna dam lada kaba nga mali ai re.dai .tsawra myit hpe dan dawng dik ai myit masa hte shi madu madun ai lam hpan lahakwng nga ai dai gaw anhte shut hpyit ai ni naw rai nga ai ten kawa karai kasang hte anhte shinggyim masha ni bai matut mahkai wa lu na matu shi madu a asak hpe anhte a matu ap nawng kau ya ai hte shi a karai asak hta anhte mung jawm pawng nga lu u ga nga chyoi pra ai wenyi hpe jaw ya nna kawa karai kasang kaw na shi lu la ai kabu gara lam ni hpe anhte hpe mung gam garan jaw ya ai lam rai nga ai.

dai re majaw tsawra ai nu wa hpu nau ni kaba dik ai Madu Yesu a tsawra myit hpe hkam la lu nga ga ai hpe myit dum let shi madu hta tut e sadi dung kam hpa nga let sak hkrung nga sa ra na rai nga ai.. dai gaw shi madu a kaba la ai tsawra myit hpe chyeju dum chyeju htang ai lam tai na mung rai nga ai..ndai zawn re ai makam masham hta hkawm sa nga ga ai rai yang kade nna yang sumsing mungdan na shi a sagu hpung hta anhte yawng shang lawm lu na rai nga ai hte dai shara hte e hpa lam a majaw mung shi hte laga hka mat wa shara n nga lu na hte shi a tsawra myit kaba hpe mung tut e shakawn kungdawng nga lu na rai nga ai..

Akyu hpyi saga oh hpan madu  Karai Kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Yesu a Salum Ningsang poi nhtoi rai nga ai hti ang ai ja chyum mungga ni gaw chyum mungga daw langai Langai ngu na..Hoseya laika 11:1,3-4,8-9 chyum mungga daw lahkawng  Ephesu laika  3:8-12,14-19 kabu gara shiga Yawhan 19: 31-37 Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.