Pranwan Ladaw Laban 31 Shaning A, 2023

Pranwan Ladaw Laban 31

( Karai Kasang a Mungga )

Tsawra ai Nu, Wa , Hpunau ni e na la lu na Chyum mungga daw langai  Malahki 1: 14. 2: 8-10  hpe rau sha jawm myit sumru yu let anhte a prat hta shading sharai ra ai lam ni hpe bai myit sawn sumru ru nga ga. Karai kasang a mungga gaw ahkrung nga ai rai nga ai, shani shagu hkawm sa ai prat hta anhte ni yawng hpe nhtoi jaw ya nga ai. Daini Mungdan shagu na Mung chying sha ni..hte up hkang ai du salang ni ngu nna anhte hpan la hkawng hku nna hkawm sa nga ga ai. Up hkang ai du salang ni hte up hkang hkrum ai mungchying sha ni shada magyep kap nna tsawra let hkawng sa nga yang she simsa ai mungdan byin tai na rai nga ai. Up hkang ai du salang ni gaw mung chying sha ni a matu galu gaba lam, sut masa lam, hkamja lam, hpaji lam, myusha lam yang ni yawng galu gaba wa lu na matu lam hpaw let galaw gun hpai ya ra nga ai.

Dai hte maren sha up hkang hkrum ai mungchying sha ni mung up hkang du salang ni hte ta gindun let Masha yawng a matu, mai kaja ai lam yan shagu hta rau sha myit hkrum mangrum, tsawra myit galu kaba ai hte jawm galaw sa ra nga ai. Ndai lam yang ni yawng hpe jawm gun hpai wa ai rai yang dai mungdan gaw kaja wa galu kaba wa na rai nga ai. Shing nrai Up hkang nga ai du gyi salang ni yawng gaw shanhte a tingkyeng a kyu chyu sha hkam tam galaw wa ai rai yang rapra lam, teng man ai lam ni gaw dai mungdan kata hta nga na n rai nga ai. Matsan ai mungdan ni sha byin tai nga na re. Daini anhte munghpawm myanmar  mungdan kata hta mung ndai lam ni a majaw jamjau jam hkau hkrum sha nga ai. Matsan mayan gaidaw gaida ni law ai zawn simsa lam mung n lu ai hte lam yang shagu hta hkrat sum nga ai rai nga ai.

Dai hte maren sha anhte a nawku hpung kata hta mung, up hkang ai nawku hpung a kanu kawa ngu na Wa Sarabyin, saradaw Jau ni hte nawku hpung masha ni nga nga ai. Karai kasang a kashu kasha rai nga ai anhte yawng a pandung gaw hkye hkrang la ai magam hta myit mang langai sha hte rau hkawm sa nga ai ni rai nga ai. Nawku hpung hta e Jau ngu na ni nnga yang, sacramentu n nga ai zawn, hpung masha ngu ai n nga yang nawku hpung ngu ai mung n nga ai. Dai majaw karai kasang a magam bungli hpe gun hpai nga ai jau, Ma Ma, Tara hkaw sara/ num ni yawng hte gaw hpung masha ni hte tagin dun let hkye hkrang la ai lam hta myit mang langai sha hte rau ta gindun let hkawm sa ra ai lam hpe  ja chyum mungga daw langai hta  myithoi Malahki gaw shadum, sharin shaga ya nga ai. ( Anhte yawng gaw kawa langai sha lu ga ai nrai ni? Anhte yawng hpe hpan da ai Karai Kasang langai sha re ai nrai ni? Anhte hpunau ni shada da hpa rai hkalem hkalau di nna, ji wa ni hte tawn da ai ga shaka hpe run kau ga ta?

Chyum mungga daw lakawng ngu na san pawlu Htesaloni kaw shagun dat ai laika langai 2: 7-9.13 hta  San Paulu gaw madu yesu a jachyum mungga ni hpe hkaw tsun gat hkai ai ten hta tsawra myit hte daw jau ra ai lam hpe madi madun ai ja chyum mungga rai nga ai.

Shi hkum nan karai kasang a magam bungli ni hpe gun hpai nga ai ten hta masha ni hpe kade ram tsawra ai lam hpe shadum ya nga ai. (Kanu gaw tinang a kasha hpe chyu jaw bau ai zawn, nanhte a ka-ang e anhte sumnung ga ai. Nanhte hpe n ja n hpra ga ai. Karai kasang a kabu gara shiga sha nrai, tinang asak jaw kau na, nanhte a matu myit dik ga ai, 1 Htesaloni 2;7-9).

Ndai Ja chyum mungga gaw dai ni na ten hta karai kasang a kabu kara shiga hpe gat hkai nga ai ni yawng hta rawng ra ai myit masa lam rai nga ai. Wa sarabyin Francis a mungga hte maren sagu rem ai ni gaw, sagu bat manam ra ai. Karai kasang a amyu masha hpe woi awng nga ai ni yawng, hkali langai hta rau hkawm sa let hkye hkrang la ai magam hta shang lawm lu hkra shakut ra ai lam hpe shadum ya ai lam mung rai nga ai. Hkye hkrang la ai magam hta shang lawm lu na matu anhte prat hta e ap nawng ai magam lit ni hpe gun hpai ra nga ai. Ap nawng daw jau ai lam gaw masha yawng a matu kaja ai magam lit ni hpe gun hpai let hkawm sa ai lam rai nga ai. Makam masham hte hkawm sa nga ai ten hta anhte hta hkan sa ra ai lam ni law law nga ai. san pawlu shadum ai lam hta "Karai kasang mungga tengman nga ai hte dai hku hkrak hkap la myit dai majaw, karai kasang gaw kam sham ai ni a ntsa e bungli galaw nga ai". Ndai lam gaw anhte hkristan ni a matu n-gun la mai ai lam rai nga ai. Teng man ai lam hpe hkap la chye ai myit masin anhte hpe karai kasang jaw ya nga ai. Dai gaw manu daw dan nlu ai lam mung rai nga ai. Dai ni anhte a prat hpe yu dat ai shaloi tengman ai lam hpe n hkap la lu ai ni law law naw rai nga ai.

 daw masum ngu na  Mahte a kabu gara shiga 23: 1-12 hta Madu yesu anhte hpe sharin ya nga ai lam gaw, Tara sara ni a sharin shaga ai lam hpe hkan shatup nga mu hpa majaw nga yang, shanhte a sharin shaga ai lam gaw tengman nga ai. Rai tim mung shanhte a a arawn alai hte kyang lailen ni hpe koi gam let hkawm sa nga mu nga nna madu yesu shadum ya  ai lam rai nga ai.

Hparishi ni gaw tengman ai lam ni hkaw tsun nga ai raitim, shanhte a prat hta gumrawng gum tawng ai hte masha ni a yu kaba ai lam hpe hkan tam nga ai majaw madu yesu sharin ya ai lam rai nga ai. Tinang a tingkyeng akyu hpe yu nna hkawm sa wa ai ten hta karai kasang a mungga hte nhtan shai wa ai lam hpe daini anhte yawng hpe shadum ya nga ai. Grau nna karai kasang a mungga hpe hkaw tsun nga ai, Jau Ma Ma tara hkaw sara ni hte kashin kamun sacramentu hpe hkamla sai ni yawang hpe mung shadum ya nga ai. Karai kasang hpe hkap la kam sham ai ni yawng hpe shadum ya ai mungga mung rai nga ai. Jau, Ma Ma, sara hte hpung masha ngu nna ginhka let hkawm sa n mai nga ai, hpa majaw nga yang anhte yawng gaw hkye hkrang la ai lam hpe lu la na matu hkali langai hta  hkawm sa nga ai majaw rai nga ai. Hkali gawt ai wa gaw madu yesu rai nga ai, shi a matsun hte maren atsawm  sha hkawm sa lu na matu anhte yawng hta shakut shaja let hkawm sa ra nga ai. Karai Kasang a tengman ai mungga ni hpe madat la let hkawm sa ra nga ai. Karai Kasang a magam bungli hpe woi awng nga ai Jau, Ma Ma, Tara hkaw sara/ num ni a gawng kya ai lam hpe mu mada nna myit daw let nawku jawng nsa ai lam ni byin chye nga ai. Karai kasang a mungga hpe madat la nna tengman ai hte hkawm sa lu na matu gaw grau ahkyak la nga ai. Hpa majaw nga yang karai kasang a magam gun ai ni a gawng kya lam gaw na a hkye hkarang la ai lam hpe pat shing dang ai lam nbyin lu hkra shakut shaja ra nga ai. Kaja ai lam, tengman ai lam ni hpe hkap la nna hkawm sa lu na matu grai ahkyak la nga ai. Anhte hka lu mayu ai shaloi gara hka pipe kaw na sa ai hpe anhte ahkyak n da ga ai. Hka san lu lu na matu gaw madung rai nga ai hpe myit dum la mai nga ai.

 Daini madu yesu sharin ya ai mungga mung dai rai nga ai. Hparishe ni a sharin shaga ai lam hpe hkan galaw nga mu, hpa majaw nga yang dai gaw tengman ai lam rai nga ai. Raitim mung shanhte a kyang lai len ni hpe koi gam nga mu nga nna shadum ya nga ai. Shingyin masha re ai majaw sut ai lam ni law law nga na re, rai tim shut ai lam hpe chyu yu nna anhte a prat hpe nmai jahtum nga ai. Mungga hte hkawm sa na matu gaw anhte yawng a lit rai nga ai.

Nanhte hta na grau htum ai wa gaw yawng a ali ama tai ra ai. Tinang hkum hpe shagrau ai wa kadai rai timung, shagrit kau ai hkrum na ra ai nga nna Mt 23:11hta tsun da ai...

Story – France Mungdan a hkaw hkam rai nga ai Augustus gaw Hkrusik majan rawt na matu hkawm sa wa ai ten hta shi a hkawhkam janmau hpe raw nna saboi ntsa kaw mara tawn da nna, " gindan ai wa na matu" ngu nna laika kadun ka tawn da ai. Bai hkawhkam wa gaw shi a hpyen du ni hpyen ma ni hpe tsun let " Ndai janmau gaw hkusik majan hta e magrau grang ai share ninghkring hte hpring zup nna majan poi hta awng dang ai hte shang lawm ai wa a matu re nga nna tsun ai. Majan kasat ngut nna hkawmhkam wa hte shi a hpyen du ni, hpyen ma ni yang gaw, hkawmhkam wa majan sa maw yang tawn da ai "Janmau" makau kaw grup rai nna dung nga ma ai. Shaloi shi a hpyen du kaba wa gaw rawt nna, Janmau hpe la let Hkawhkam wa a baw hta shagup ya nna tsun ai gaw Hkawhkam wa e Nang gaw "gingdan ai wa" rai ndai ngu nna arawng myi ala rai let bai shagup ya ai.  Anhte a prat hta e na la lu na mungga hte anhte hpe shadum ya ai lam ni law law nga ai. Dai hta e kasi la hpa lam masum hpe garan kachyan mayu ai..

(1) Shagrit shanem ai lam, Shagrit shanem ai ngu ai lam gaw ngai gaw hpa nchye ai wa, grai anya ai wa, hpa lam ni hta mung masha ni a hpang kaw e hkan nang ai wa ngu ai lam n rai nga ai. Karai kasang a lam madun ya ai hte maren prat hpe gaw gap let hkawm sa ai lam rai nga ai.

(2) Kasi kaja hte hkawm sa ai lam, Kasi kaja hte hkawm sa ai lam hta Bu hpun mawn sumli ai, masha ni a man hta yu kaba ai hte hkawm sa ai hpe tsun ai lam nrai nga ai. Masha ni a man hta arawn alai kaja, si mani ai hte  masha ni hpe daw jau let hkawm sa ai lam hpe tsun ai rai nga ai.

(3) Hkam sharang ai lam, Hkam sharang ai ngu ai gaw matsan mayan rai nna prat hpe gaw gap ai masha ni a dip lu dip sha ai hpe hkam sharang let hkawm sa ai lam hpe tsun ai nrai nga ai. Masha yawng a matu tengman ai lam hta tinang a prat hpe gwi hkrim ai hte ap nawng daw jau ai lam rai nga ai.

Yawng a ntsa e karai kasang wa makawp maga ya nga u ga law.