RVA Hpaw Hpang ai (50) Ning Hpring Jubili Poi Myitkyina kaw Galaw Na Matu Shajin Nga

16 April 2019, Myikyina

Radio Veritas Asia (RVA) Nsen Shapoi Dap hpaw hpang ai (50) ninghpring Ja Jubili hpe Myitkyina Muk lum, San Columban Nawku Jawng Wang hta ndai April shata 30, 2019 ya shani galaw sa wa na re lam Sasana Sagurem wa Wa Saradaw Francis Daw Tang kawn  shagrin ya sai hte dai ni April 16 ya shani hpawng ai zuphpawng hta daw dan da sai rai nga ai.

Jubili Poi hpe RVA Rawang, Lisu Nsen Shapoi Dap ni a  shiga madat ni hte hkrum zup ai hpawng hte hpawn, Putao kaw galaw na matu yaw shada da ai raitim lam amyu myu a majaw Putao kaw n galaw byin mat sai rai nna, Myitkyina kaw sha, Jinghpaw,Lisu hte Rawang Service ni jawm pawng let Ginjaw Mungbawng Hpung ni woi awn nna hkik hkam ai hku galaw na matu ya na zawn hkyen lajang wa ai rai nga ai.

RVA Jinghpaw Radio lamang ni hpe Mungkan ting chyawm bra nga ai Jinghpaw Wunpawng amyu sha ni yawng madat n-gun jaw nga hte maren, ya galaw na  Jubili Poi hta WMR, JHG, TAT, Myusha Zin Lum, PCG, Ginra Pat Jasan , Nawku Hpung ni hte kaga saw shaga ging ai shiga madat ni yawng hpe laksan saw shaga mat wa na re lam chye lu ai.

Jubili n galaw shi yang, April shata 28,29 ya shani gaw RVA Staff ni a sharin shawng galaw na  rai nna, dai sharin hpawng hta, Philippines Mungdan, RVA Ginjaw Rung kaw na du sa wa ai sharin shara ni kawn Nsen Shapoi ai lam hte seng ai Muna Kyithkai hpaji ni hpe sharin ya na re ai lam, Myitkyina, Manmaw, Lashio hte Putao hkan na laksan saw shaga da ai sharin jawng ma ni mung sa du sharin lawm na re lam chye lu ai.

April 30 ya, Jubili Poi shani gaw jahpawt 7:30 AM ten Jubili Missa Hkungga nga na rai nna, Missa ngut ai hpang, jahpawt 9:00AM -1:00PM  ten hta shagrau sha-ga hkaw tsun hpawng lamang hte Jubili malu masha daw jaw ai lamang ni nga na re ai lam, dai lamang hta Jinghpaw, Rawang, Lisu ka hkrang ,ga shagawp  hte gam chyawm manaw ai ai lam ni mung galaw mat na re lam chye lu ai.Jubili Poi sa du ai shawa masha ni yu lu na matu Madun gawk hte RVA kaw nna chye ju dum masat kumhpa ni mung gu gu ra ra garan jaw na re lam April 16, 2019 ya shani na zuphpawng daw dan manit kaw lawm nga ai.

Radio Veritas Asia nsen shapoi dap hpe lai wa sai 1969 ning April shata hta Philippines Mungdan Quezon City kaw hpaw hpang nna n-sen shapoi nga ai gaw, dai ning 2019 April shata hta (50) ning hpring sai rai nga ai.Dai hte maren, 2019 April 11-12 ya shani Philippines Mungdan ,Manila Mare na RVA Compound kaw (50) ning hpring Ja Jubili poi hpe mung galaw lai wa sai rai nga ai.

Bai nna, RVA Jinghpaw Nsen Shapoi Dap gaw Jinghpaw Wunpawng Amyu sha ni a labau hta Jinghpaw ga hku n-sen shapoi hpang ai shawng nnan numbat langai rai nna, 1982 ning hta shapoi hpang ai rai nga ai.. 2018 ning kaw nna Lisu hte Rawang myu sha ga ni hte mung shapoi hpang wa nga sai re. Ya ten Myanmar Mungdan hta Jinghpaw,Lisu, Rawang , Hkang Amyu Sha ga hpan 4, Karen myusha ga hpan 2 hte  Myen myusha ga yawng pawng ga hpan 10 hte nsen shapoi nga ai rai nga ai.RVA hpe Asia dan hta ga hpan 18 hte Online  hku nna mung,Radio hku nna mung shapoi nga dingyang rai nga ai re.

Thomas