Myitkyina ,Manmaw Hte Lashio Sasana Ginwang Ni Hta Shata Kru Laman Jau Nnan Marai 9 Jat

Kahtawlik Nawku Hpung  a Sasana Ginra ni rai nga ai Myitkyina, Manmaw hte Lashio Sasana Saradaw  Ginwang ni hta 2018 November shata kaw nna 2019 April shata du hkra, shata kru laman Jau nnan marai (9)  lu la jat sai rai nga  ai.

Lai wa sai 2018 November shata hta Jinghpaw Mung de Columban Sasana Wuhpung ni du shang wa ai (100) ninghpring Jabili Poi hte hpawn, Deacon marai (5) a Jau shatai Poi hpe  Myitkyina Edin San Luka Chyum Jawng kaw hkik hkam ai hku galaw lai wa sai hte Myitkyina Sasana kaw Jau nnan marai 5 kalang ta lu la sai rai nga ai.

Dai Jau ni gaw, ya ten danai Jau Ginwang kaw magam gun nga ai Wajau Luka Marawng Zau Tu, Hpakant Jau Ginwang kaw magam gun nga ai Wa Jau Francis Jangma Awng Li, Myitkyina Jau Ginwang hta magam gun nga ai Wajau Peter Bunghku Lawt Naw, Myitkyina Sasana Curia Rung kaw magam gun nga ai Wajau Peter Lagai Tu Hkawng hte Chancella Rung kaw magam gun nga ai Wajau John Nhpum Mung Mai ni rai nga ai.

2019 March shata 26 ya shani Manmaw Sasana, N-mawk Jau Gin Wang, San Patrick Nawku Jawng hta Deacon Francis Maran Awng Seng Naw gaw Wa Saradaw  Raymond Sumlut Gam a lata hta htani htana Jau Tai aya hpe hkam la lu sai zawn, 2019 April shata praw 9 ya shani, , Panghkak Jau Ginwang, Mai Ja Yang Mare na San Pio Nawku Jawng hta Deacon Mahte Mwihpu Grawng Naw mung  Wa Saradaw Raymond Sumlut Gam a lata hta, htani htana Jau tai aya hpe hkam la lu sai rai nga ai.

Bai nna, Lahta Sam Mung , Mungmyit Sinli ga ,Kachin Sub-State rai nga ai Lashio Sasana, Loi Hkam Jau Ginwang ,Hkristu Hkaw Hkam Nawku Htingnu hta 2019 April sahta praw 4 ya shani, Kuthkai Jau Ginwang na Deacon Augustine Lagwi Dee De Awng hte Mungji Jau Ginwang kaw na Deacon Peter Kareng Hting yan mung Lashio Sasana Sagurem wa, Wa Saradaw Philip Lasap Zahawng a lata hta htani htana Jau Tai aya hpe hkam la lu sai rai nga ai.

Catholic Bishop Conference Myanmar (CBCM) kawn htuk shapraw da ai 2019 Catholic Directory Myanmar hta, Myitkyina Sasana kaw Wa Jau  53, Manmaw Sasana hta 25 ,Lashio Sasana 38 nga ai nga nna ka da nga ai. Ya nnan tai ai Jau ni hte pawng dat yang Sasana Ginwang masum hta Jau latsa jan lu nga sai .Kaga Sasana Jau ni mung nga ma ai rai nga ai.

Sasana Ginwang masum hta shanu nga ai , Kahtawlik Nawku Hpung masha jahpan gaw, sen mi jan (Myitkyina 95609 Manmaw 32140  + hte Lashio 25943 ) ram nga  ai lam, 2019 Myanmar Catholic Directory kaw ka da ai hte maren chye lu ai.

Lai wa sai ten hta Jau n law ai mang hkang ni a majaw, Hpung masha n kau ni Nawku Hpung a ahkyak ai Poi Nhtoi ni hta, Mara Raw Chyoi Pra Hkum nlu hkam ai lam,n-kau Jau Ginwang hkan Ginwang up Jau langai sha nga ai majaw Jau Ginwang kata Nawku dawjau ai lam ni hta yak hkak ai lam ni nga ai nga nna Jau ni tsun jahta lai wa ma ai.

“ Jau jahpan gaw law wa sai raitim, Sasana shawng lam hta ra taw ai bungli gaw grai naw nga ai, Ga shadawn, Mare Buga Kahtawng hkan, Hpung masha  Kun tinghku shagu hpe dep hkap lu na matu,shan hte hpe dawjau lu na matu gaw grai naw ra ai.Dai re majaw , Jau ni law wa sai nga tim grai wa myit dik na lam gaw nnga ai.Sasana Magam lam hta grau nna masan sa na matu Jau shagu mung tinang galaw sa wa na magam bungli lam ni hpe atsawm chye na ra ai zawn, Jau Ginwang kata hkan na wuhpung uhpawng Kanu Kawa ramma magam gun ni yawng mung a-sharawng a-shara rai myit hkrum myit ra rai let rau jawm shakut ra ai lam,Jau tai wa na kashu kasha ni hpe garum shingtau madi shadaw n-gun jaw ai lam ni grai galaw ra ai’ nga nna Myitkyina Sasana Wa Saradaw Francis Daw Tang tsun lai wa ai.

Hpa mi rai tim, ya na zawn, Jau tai ai ni laning hte laning law htam wa ai gaw shawng na zawn re ai Jau n law ai mayak manghkang  lam nkau ni hpe hparan lu na rai nna,  Kahtawlik sasana magam a matu kaja ai lam re zawn, hpung masha ni a matu mung kabu hpa rai gna ai.Karai Kasang a Amu gun hpai ai ni law htam wa na matu, akyu hpyi shaja ai n sen ni hpe Madu Karai Kasang hkap la madat mara shaman ya ai lam nan rai nga ai ngu nna tsun mai nga ai.

Thomas