Paska Ladaw ( VI ), A, 2023

Paska Ladaw (6), A, 2023

Hkristu hta tsaw ra ai nu wa hpu nau ni e, hpawtni gaw, Paska ladaw hta (6) ngu na laban rai nga ai.

Madu Yesu a mungga lahkawng hpe sumru nga ga. Paska ladaw mung jahtum maga de du wa sai re. Du na laban gaw bai hkrungrawt ai Yesu Madu Sumsing lamu de lung wa ai poi hpe galaw na ga ai rai nna, de a hpang na laban hta muung (Pentecost) Chyoi Pra ai Wenyi Kasa ni a ntsa yu hkrat wa ai poi rai nga ai. Dai laban hta Paska ladaw laban 7 hpe jahtum sa na re. Ndai laban hta mung lai wa sai laban na zawn sha Madu Yesu a hpang jahtum daw sha poi ngut ai hpang Yesu Madu hte kasa ni tsun ai mungga nkau ni hpe tsun dan da nga ai. Shanhte tsun ai mungga ni hpe labau hta tsun ai ngu sha nmai sawn la ga ai re. Yesu Madu gaw shi a mungga hpe daini anhte hpawng de ai nawku daw jau lamang ni hta hkristan masha ni hpe prat hte prat matut matut nna, tsun nga ai re.

Kasa ni Madu Yesu a sharing shaga ai, shadum jahprang ai, n-gun jaw ai lam ni ra kadawn nga ma ai zawn anhte ni mung ra kadawn nga ga ai re hpe Madu chye nga ai. Dai gaw Jaw ang dik ai lam rai nga ai. Lama na, lai wa sai laban hta san da ai “bai hkrungrawt ai Hkristu a matu nang gaw kadai kun?” ngu ai ga san anhte hpe bai san ai rai yang kabu gara ai hte ya na zawn bai htai lu na rai nga ai. Kasa ni zawn anhte ni mung Madu Yesu a kaba dik htum ai sutgan ni rai nga ga ai. Madu gaw kasa ni hpe tsun ai lam ni yawng daini anhte hpe mung tsun nga ai.

Dai myit masa hte ndai laban na chyum mungga hpe sumru ga.

Madu Yesu a si mani ai hte, jaw ang ai lam ni Kasa ni hpe asan sha tsun ai, ga sadi da ga ni hpe na la ai masha shagu nmau ai sha nga na n re. Yawhan laika 14:1 hta “Nanhte myit hkum ru myit” ngu n-gun jaw da nga ai. Madu pru mat wa ai shaloi kasa ni myit kaji shara nnga ai. Yawhan laika 14:18 hta “Ngai wa mat ai shaloi nanhte hpe jahkrai zawn ngai kau da na n rai; nahte hpang de ngai bai sa na ring ngai” nga tsun da nga ai. Kasa ni gaw Madu Yesu hpe hkap la lu na matu shanhte hkum shanhte shamawn da ra ai. Madu yesu hpe myi hte mu lu lam ahkrak madung nre ai sha, arau nga nga ai hpe Chyoi Pra ai wenyi a marang e hkam sha lu ra ai. Hpa majaw nga yang, Chyoi Pra ai Wenyi gaw Madu yesu a, rai nna, shi hta ninghtoi jaw na, n-gun jaw na hte makawp maga na matu kasa ni hpe shangun dat ai rai nga ai. Yesu Madu gaw kasa ni hpe Kawa Karai Kasang ga sadi tawn da ai tsawra lam hpe tsun madun dan na matu (ama hkam) pahkam, hkam daga jaw ai re. Daini na chyum mungga hku Madu Yesu gaw Kasa ni hte anhte ni yawng hpe grin ai sadi tawn da ai lam gaw Chyoi Pra ai Wenyi anhte hta nga nga ai a marang e hkum tsup wa sai rai nga ai.

Madu Yesu a hpang jahtum dawsha poi hta kasa ni hpe galu galang hte sharing shaga ai a majaw anhte nkau ni hta myit shut myit um ang hpa ni nga chye ai. Yesu Madu Chyoi Pra Wenyi hpe kasa ni kaw shangun dat na ngu ga sadi jaw tawn da ai raitim, dai Wenyi gaw shanhte hta nga nga taw sai ngu hpang galang bai tsun wa ai. Bai Madu gaw Kawa Karai Kasang hpang de bai lung wa lam tsun tim, kasa ni hte htani htana arau nga nga na ngu bai tsun ai. Shawng na lang kasa ni kaw bai htang sa wa shaloi, shanhte hpe Kawa Karai Kasang hpang de woi wa na ngu tsun da nna, hpang kalang gaw Kasha Karai Kasang hpe tsawra ai ni a myit masin salum hta Kawa Karai Kasang nga nga na re ngu bai tsun ai. Dai zawn re ai, langai hte langai dan dan leng leng nan hti htang ga ni rai nga ai Madu Yesu a ga ni hpe anhte ni gara hku chye na na rai ta?

Dai zawn bying ai lam ni gaw anhte ni mungkan ga kaw nga pra ai majaw rai nna, buga shara hte aten ladaw a gyit hkang da ai hta nga nga ai majaw rai nga ai. Ga shadawn tsun ga nga yang, aten langai kaw sha dum nta hte hkauna, nta kaw nga nga ai hte bungli galaw ai lam, anhte makau kaw na masha ni hpe ga shaga taw nga ten, deng shadang law law tsan ai shara hta nga nga ai masha hte ga shaga ai zawn re ai lam ni hpe aten langai kaw sha galaw lu na gaw nmai bying nga ai. Bai anhte ni mani, daini, hpawtni nga nna tsun chye nga ai. Raitim, mani gaw bai n’lu la mai mat sai, hpawtni hpe hkam la lu na n’lu na gaw hkrak n’chye shi ai. Anhte ni gaw aten ladaw hte shadawn chye ga ai. Raitim, dai aten ni sumru n’lu shi yang ma mat chye nga ai.

Madu Yesu bai hkrungrawt ai hpang gaw shi a matu ndai zawn re ai masa lam yawng shawoi na hte nbung ai sha galai shai mat sai re. Ya gaw Madu Yesu a matu daini ngu ai ya ten ndai shara kaw sha rai mat sai rai nna, htaw kaw le kaw ngu ai mung nnga mat sai; shi a matu ndai shara ngu ai gaw shara magup rai nga ai. Dai majaw bai hkrungrawt ai nhtoi hta Madu a Wenyi gaw kasa ni hte matut mahkai ai zawn Chyoi Pra ai Wenyi yu hkrat wa ai shani hta mung dai zawn sha matut mahkai ai rai nga ai. Dai hte maren sha shanhte hpe wenyi jaw ya ai lam gaw teng nga ai. Anhte kashing kamun hkam ai nhtoi hta wenyi sak prat hpe jaw da ya hkrum sai zawn sha, shani shagu mung matut jaw ya nga ai rai nga ai. Dai majaw “ngai jaw na” ngu tsun shagu, “shi anhte hte rau nga nga ai” gaw teng sha rai nga ai. Kawa Karai Kasang anhte hte nga nga ai hta sha n’ga, Kawa Karai kasang hpang de woi sa nga ai gaw teng sha rai nga ai. Yesu Madu Kawa Karai Kasang hpang de bai htang wa mat  ai; bai anhte hte mung rau nga nga ai gaw teng sha rai nga ai.

Yesu tsun ai dan dawng ai hti htang ga ni gaw teng man ai lam rai nga ai.

Madu tsun ai gaw, Kashing kamun chyeju kumla gaw manu daw dan n’lu ai chyeju sutgan law law hpe gun sa ya ai re. Dai chyeju sutgan ni gaw Madu a sak hkrung Wenyi, shi a Kawa Karai Kasang, bai Shi Madu hte rau nga nga ai lam ni rai nna, dai chyeju ni hpe hkam la lu na matu lani hte lani grau grau shakut shaja nga ra ga ai. Tsun ga nga yang anhte ni manu dan chyeju sutgan hpe hpring tup hkam la n’lu shi ai re. Anhte ni si ai ten hta sha hpring tup hkam la lu na rai nga ai. Dai nhtoi hpe ala nga ga ai re. Hpa majaw nga yang dai nhtoi hta hkam la na manu dan dik ai sutgan ni gaw kaga yawng hta kabu pyaw hpa lam hpe jaw ya ai majaw re. chyum laika hta Madu Yesu a mau hpa ga sadi tawn da ai lam ni gaw anhte hpe lawu na lam ni hpe chye na na matu garum ya ai. Madu gaw shi a chyeju ni hpe ahkyak da jaw ya mayu ai, myit kaba la nga ai. Dai majaw anhte ni, si na ten hpe n’lat ai sha mungkan ga hta sak naw hkrung ten hta nan, hkam la lu shangun mayu nga ai. Hkristan masha ni gaw mungkan ntsa hta sadi maja let, kabu pyaw let, sak hkung nga pra ra ga ai.

Hkristan masha langai hpe gumhpraw law law rawng ai sumpu langai lang nna hkrunlam hkawm ai masha langai hte shabung mai nga ai. Dai supu hpe hkrun lam htum jang she hpaw yu ra na raitim, gumhpraw law law rawng ai sumpu madu gaw tinang hkum nan rai nga ai hpe chye taw nga ai majaw, hkrun lam hta shi a gumhpraw n’mat u ga matu, atsawm sha hkang zing lang ra ai. Hkristan masha gaw dai zawn rai nga ai. shi kabu pyaw let hkawm sa ten shi a sutgan n’mat u ga makawp maga hting hkang ra na rai nga ai.

Madu yesu a jaw jau mayu ai lam dan dawng shangun ai hpe Yawhan 14:23 hta mu lu nga ai.  Yesu Madu gaw galoi mung ga sadi dung ai wa re. Chyum mungga daw langai hta Madu Yesu gaman lila re ai ga sadi n’jaw ai lam sakse madun da ai hpe mu lu nga ai. Stephen sat kau hkrum ai hpang, nawku hpung hta hkrit tsang hpa kaba zingri zingrat ai hpe hkam sha lai wa ra ma ai. Dai zawn zingri zingrat ai lam hkrum ai ni gaw Greek ga shaga ai nawku hpung masha ni madung rai ma ai. Dai zawn zingri ai mahkyen hta maigan mung dan de nga pra hkawm yu sai Pawlu mying ai Sawlu hkum nan mung lawm nga ai.

Kasa laika 8:1 hta “Dai shani kaw nna Yerusalem mare kaw nga ai hpung gaw zingri zingrat kaba hpe laja lana hkrum hpang wa sai. Kasa ni hta lai nna kamsham ai ni yawng gaw, Yuda mung, Samari mung, shara magup hkan e bra ayai mat wa ma ai.” nga nna ka da nga ai. Dai gaw Greek ga shaga ai Yuda masha ni hpe tsun ai rai nga ai. Dai zawn zingri hkrum nna, hprawng hkawm ra ai hkristan masha ni hpe Kawa Karai Kasang hpang de bai lung wa ai Yesu Madu gaw chye ya nga kun? sumru na ma ai. Nawku hpung a hpyen gaw n-gun ja wa ma ai rai nna, Yesu Madu gaw azim sha naw nga nga ai ngu myit la ma ai. Shi jaw da ai ga sadi hpe n’malap ai Yesu gaw dai hkristan masha ni shadu ai hku nre ai sha, zingri hkrum ai nawku hpung hte ni htep grau ai hku nga nga ai. Hkristan masha ni Madu Yesu a Wenyi matsun lam woi ai hta shamu shamawt nga ma ai hpe mabying lam yan law law hte sakse tai ya nga ai. Nbung laru gaw hpun tum ni hpe tsan dik ai shara de shapoi kau ya nna, lamu ga nbung ai hta bai tu shangun ai. Dai zawn zingri zingrat ai laru kaba mung Greek ga shaga ai hkristan ni hpe mungdan shara shagu de du hkawm shangun nna, hkristan nli tum hpe gat hkai kung kaba shangun ma ai. Kasa laika 11:26 hta “sape ni mung Hkristan ni ngu ai mying hpe Antioki mare hta shawng lu la ma ai.” nga nna matsin nga nga ai. Phillip gaw Yerusalem kaw na Hkristan masha ni hpe arung arai garum ningtum garan jaw na matu lit shatsam da hkrum ai raitim, wenyi a shadut ai majaw kaga bungli hpe galaw matut mat ai. Shi gaw Samari myusha ni a tara hkaw sara tai wa ai rai nna, kabu gara shiga hpe garan gachyan ya nga ai. Samari myusha ni Yesu hpe kamsham wa na ngu kadai mung shingran pyi mu na nre. Hpa majaw nga yang, shanhte gaw Yuda sai chyen kau ni sha lawm ai rai nna, Yuda ni hte myit n’rum ninghkap ai ni rai ma ai. Samaritan myu sha ni hte  Yerusalem kaw nga ai Yuda masha ni gaw shada n’ju ndawng myit kaba ma ai.

Dai majaw Yesu Madu gaw shi Wenyi hte rau lawu na masha wuhpung ni hta n-gun dat galaw shaja nga ai hpe mu lu nga ai.

Zingri zingrat hkrum ai majaw buga shagu de chyam bra hkawm ai hkristan masha ni; Mungga hkaw nna, mau hpa hpung dagu madun nga ai Deacon Phillip; Yerusalem kaw shanu nga ai Yuda masha ni hpe n’ju ndawng ai hpe jahkring kau da nna, Phillip a mungga hpe hkap la let Yesu Madu hpe tinang a Hkyela Madu hku hkap la ai Samaritan myusha ni a masin salum;

Yesu Madu gaw kasa ni n-gun jaw ai ga sadi hpe jahkum shatsup lai wa ai. Matut nna, Hkristan kun dinghku masha shagu hta hkum tsup shangun na rai nga ai. “ngai gaw nanhte hpe kam hpa shara nnga ai sha kabai da na nrai” Yawhan 14:18.

Samaritan hta nga ai San Petru hte San Yawhan

Daini na chyum mungga daw langai na hpang daw gaw manu dan la nga ai. Samaritan masha ni Yesu Hkristu hpe hkapla kamsham ai lam na lu ai hpang kasa ni gaw San Yawhan hte San Petru yan hpe shangun dat ai. San Paulu Galati hpung masha ni hpang de shagun dat ai laika 2:9 hta “nawku hpung a daw hpum ningbaw ningla ni ngu ging ai” ngu tsun da nga ai. Shanhte hpe Phillip nnan hpang da ai kashing kamun hkam la sai ni hpe wenyi a chyeju hpyi ya let jahkum shatsup ya na  matu shangun dat ai rai nga ai. Kasa laika 8:16_17 hta “Hpa majaw nga yang dai aten du hkra dai Chyoi Pra ai Wenyi gaw shanhte hta na gade a ntsa e mung garai n yu wa yu ai. Shanhte gaw Madu Yesu a mying nsang hta kashing kamun hkam la ai sha naw rai nga ma ai. Dai rai nna, Petru yan Yawhan shanhte a ntsa e lata mara ya jang, shanhte dai Chyoi Pra ai Wenyi hkam la lu ma ai.” nga ka da nga ai.

San luka a ga majaw anhte ni myit um ang chye ga ai. Wenyi gaw Samaritan myusha ni kashing kamun garai nhkam shi ten Phillip a kabu gara shiga tsun shana ten hta, shanhte a myit masin hta hkristu hpe hkap la na hte prat dingsa hpe kau da na matu nnan hpang wa sai rai nga ma ai. Bai, kashing kamun chyeju kumla hkam la ai shaloi, Wenyi gaw shanhte a mara mahkra hpe jasan jaseng ya ai rai nna, Karai Kasang a kasha ni tai wa ma ai. Shanhte a matu Hkristu hkum nan asak rai nga ai. Dai rai yang San Luka “shanhte hta Wenyi yu hkrat ai lam nnga shi ai” ngu hpa rai tsun a ta?

Dai ga san a mahtai gaw Samaritan masha ni kashing kamun chyeju kumla hkam la ai shaloi Chyoi Pra ai Wenyi hpe hkam la ma ai. Chyoi Pra ai Wenyi hpe hpring tup hkam la lu na matu San Petru hte San Yawhan yan akyu hpyi ya ai lam sha rai nga ai. Dai rai jang she, kashing kamun hkam la ai ni Hkristan sak prat hta kaja htum ai hku sak hkrung nga lu na rai nga ai; Hkristan kun dinghku hpe gaw de lu nna, makau grupyin na masha ni hpe Hkristu a lam tsun hkai dan lu na rai nga ai.

Ndai lam hpe chye na lu hkra jahkum shatsup na matu gaw “Ninggun Shaja” Chyeju kumla hte seng nna chye na ra na re.

Chyoi Pra ai Wenyi gaw anhte hpe sakse hkam na matu saga nga ai. Zingri zingrat hkrum nga ai hkristan masha ni hpe n-gun jaw ai hta San Petru gaw shanhte hpe myit n’htum na matu, prat hkrun lam hta lawt lu na matu, hte makam ngang gring nga na lam ni rai nga ai. Petru laika langai 3:13 hta “nanhte kaja ai lam galaw na matu sharawng awng nga myit yang gaw nanhte hpe kadai sharu shatsang lu na rai ta?” ngu n-gun jaw da nga ai.

San Petru tsun ai Hkristan masha yawng a lit magam ni gaw

1. Wenyi shadut ai hte maren masin salum hta nga ai Karai Kasang hpe nawku daw jau na.
2. Kaja ai sak hkrung nga pra ai lam ni hte makam, myit mada lam ni hpe sakse hkam na hte, tinang a makam hpe san sagawn ai ni hpe si mani ai myit masa hte, san seng myit hte sanglang dan na.
3. Hkristu anhte a matu yubak hkam lai wa ai gaw chyeju kumla kaba langai rai nga ai hpe sumru hkan sa na matu ni rai nga ai.

Akyu hpyi saga

Wa Karai Kasang e, Madu Yesu a marang e sha nang Madu hpang de anhte du lu nga ga ai hpe kam sham nga ga ai hte, Madu Yesu hta nang Madu anhte hte rau nga nga ai hpe mung kam sham nga ga ai. Madu Yesu hta Nang Madu a chyeju anhte hkam la lu mi ga Madu Yesu a hpang hkan nang lu na chyeju anhte hpe jaw ya mi. Anhte a Madu Hkristu a marang e hpyi nem nga ga ai.

Hkristu hta tsawra ai Tara hkaw sara/num ni e, hpawtni gaw Paska ladaw hta (6) ngu nga laban rai nna, hpawtni hti ang ai Ja Chyum mungga ni gaw

Chyum Mungga Daw (1)   Kasa 8:5-8, 14-17

Chyum Mungga Daw (2) 1Petru 3:15-18

Kabu Gara Shiga         Yh 14:15-21

Ndai Ja Chyum Mungga ni hpe hti nna, hpawtni na nawku daw jau lamang ni hpe woi awn nga ga.