ASIA DAN SARADAW NI A RAPDAW HPAWNG KABA (FABC) NDAU SHANA AI LAM

ASIA DAN SARADAW NI A RAPDAW HPAWNG KABA (FABC)
NDAU SHANA AI LAM
(February 23, 2023)

Baan Phu Waan (The Sower’s House) gaw Bankok Kahtawlik Saradaw Ginwang Kaba a hkrik hkam dik ai Nawku Hpung hte seng ai shiga shabra ai shara rai nna, February 24 - 26 laman Asia Dan ting hte seng ai Rapdaw Zuphpawng Kaba hpe, nta madu hku nna hkap la galaw sa wa na rai nga ai.

Dai zuphpawng de sa du shang lawm na Mungdan Saradaw Rapdaw Hpawng 17 kaw na dat kasa Saradaw gawng malai ni, Kahtawlik Sasana ting hte seng ai Saradaw Rapdaw Hpawng kaba a gawng malai dat kasa Saradaw kaba lahkawng, Asia Dan kata nga ai mungdan hkun jahku (29) na Saradaw Rapdaw Hpawng Kaba (FABC) dat kasa Saradaw ni mung sa du shang lawm na rai nga ai. Ndai Rapdaw Zuphpawng hkrunlam hta Cardinals marai kru (6), Saradaw kaba (Archbishops ) marai manga (5), Saradaw marai shi masat (18), Ma Ma (Nuns) marai mali (4), hpung masha marai shi jahku (19) ni mung sa du shang lawm na rai nga ai.

Mungkan hta kaba dik hte masha law htum nga ai Asia Dan gaw chyeju hpring ai Dan langai rai nga ai; htung hking lailen hkum ai, amyu roisai hkum ai, myusha ga hpan hkum ai, makam hkum ai Asia Dan rai nga ai.

Asia Dan a shara law law hta n law la ai Hkristan masha ni nga pra ai rai nna, masha hkum shagu a htung hking maka gaw Nawku Hpung a matu kabu hpa kaba rai nga ai. Makam masham, sari manu hte hkrang kumla hpan ni a lai jasat gaw shara hte shara shai ai lam nga tim, shinggyim wuhpung wuhpawng lapran shada matut mahkai hkrishawn ai lam gaw Asia Dan myusha ni hpe zinglum kahkyin gumdin shangun ya nga ai.
Karai Kasang, tinang hkum, nihtep hpu nau ni, n’gawn tawa mungkan masha yawng hte hku hkau matut mahkai kanawn mazum ai a Asia sari manu gaw Asia Dan hte shinggyim myusha kun dinghku masha a matu myit hkrum zimlum kahkyin gumdin lam hpe jaw ya nga ai.

Yak hkak ai lam ni nga tim dai Rapdaw Zuphpawng hkrunlam gaw Kahtawlik Sasana a matu Karai Kasang a shaman chyeju hte Tsi tsi hkam la na a aten ladaw re ngu nna myit la ga ai. “Sum” langai zawn Nawku Hpung a hkrang gaw, dai hta yawng shang lawm lu ai myit masin hte dam lada hkra galaw nna shanu shingbyi mai ai shara langai zawn hkrang shapraw da nga ai.

Mak Sak ai (maja majan ai) lam ni, n sim sa ai lam ni hte matsan jam jau ai lam ni mung Karai Kasang a Chyoi Pra Wenyi shanu nga ai shara shagu hta Karai Kasang gaw shi a sum n-ta gaw gap lu ai lam hpe mung hpaw tsun da nga ai.

Ahkyak dik gaw Karai Kasang a sum n-ta kata hta masha shagu a matu nga shara nga ai rai nga ai. Kadai hpe mung shangam tawn kau da ai lam n nga ai. Ndai mabyin hta shawoi e shangam da hkrum ai ngu nna hkam sha yu sai ni gaw ya ten hta reng htum simlum ai shara rai nga ai Karai Ksang a sum n-ta e shanhte a matu shara nga ai hpe dum chye wa ma ai.

“Sum” hkrang kumla gaw Yesu Madu shinggyim hkum sa la nna anhte hte rau nga nga na Shi a “Sum” gaw gap lai wa ai hpe myit shadum ya ai. Dai rai nna, Karai Kasang a “Sum” gaw Karai Kasang hte, shada da, hkrum zup ai shara tai wa ai.

Dai ni na aten, yawng hte seng ai dum nta hku mu lu ai “Sum” gaw yawng hte seng ai kashin kamun chyeju kumla hta rau karan kachyan hkam sha nna madu lu ai lachyum masa hpe bai dum hprang shangun ai. Rapdaw Zuphpawng (Synodal process) masing gaw wuhpung kaji ni pawng hpawm wa na matu lahkam hkam ai rai nga ai.

Dai majaw Rapdaw Zuphpawng masing gaw dai ahkyak ai lam hpe dam lada ai hku chye na shangun nna Sasana ting a rawt jat bawng ring ai hpe hkrang shapraw ya ai.

Dat kasa ni sasana hkrun lam hta rau sha hkawm sa lu na matu, akyu hpyi ai let atsawm sha karan ginhka chye lu na matu, bawng ban dawdan lu na matu, atsawm akawm awng dang ai hte galaw lu na matu masa lam yan ni hpe ka jahkrat sa wa na rai nga ai.

Galaw sa wa masum ya laman hta dat kasa ni gaw shanhte a sasana mahkrum madup ni, yak hkak jam jau lam ni hte ladat n’nan, mahkrun n’nan ni hpe hkap la lu na matu, saw shaga, karan kachyan, galaw mat wa na rai nga ai.

Asia Dan ting hpe hkrit tsang hpa ana zingli byin shangun ai (tensions) numja numla hkat ai lam ni hte seng nna bawng ban sa wa na rai nga ai: sak hkrung nga sa lam hte seng ai myit hkrum mang rum lam, myit daw dan ai lam, Jau prat de shaga la ai lam, ramma hte seng ai lam, matsan mayan hkrum ai lam, nawku hpung mang hkang ni hte (Clericalism) Jau sha ngu ai myit jasat ga baw ni hpe madung da bawng ban sa wa na rai nga ai.

Chyoi Pra ai Wenyi kaw ap nawng ai hpaw hpang Missa Hkungga hpe Japan Mungdan, Tokyo Saradaw Ginwang Kaba, Ginwang Up hte Asia Dan Saradaw Rapdaw Hpawng Kaba Likhkam rai nga ai Achbishop Tarcisio Iso Kikuchi, SVD, kawn woi awn nawng jau na rai nga ai. Dai hpang, dat kasa ni sumru bawngban dinglik jahpra sa wa na zuphpawng ga baw mahkyen ni hpe shachyen shana ya na rai nga ai.

Rapdaw Zuphpawng dat kasa ni a ningmu ni hpe karan kachyan sa wa lu na matu Rapdaw Zuphpawng a ginchyum “karip” (draft) hpe mung ndau shana ya na rai nga ai.

Amyu roisai hkum ai, dam lada tsawm htap ai Asia Dan masha ni hkrunlam rau hkawm rau sa ai gaw anhte a myit mada shara rai nga ai.

By Fr. Patrick Zau Jat Awng
#fabc
#rva
#rvakachin
https://www.rvasia.org/synod-synodality/asian-continental-synodal-assemb...