Africa Dan Hta Shaning Law Law Ap Nawng Magam Gun Hpai Lai Wa Ai Italian Myu Sha Mama Langai Hpe Wa Sarabyin Shakawn Shagrau Ai Lam Galaw

Africa dan hta shaning 60 ning tup ma shangai gawn lajang ya ai Midwife Sarama langai hku nna sasana magam gun hpai ap nawng nga ai Italian myu sha Mama Maria Concetta Esu hpe shakawn shagrau ai lam Wa Sarabyin Francis galaw lai wa ai. Lai wa sai bat masum ya shani, San Peter pa kaba hta shani ka-ang Angelus akyu hpyi woi ngut ai hpang Mama Maria Concetta hpe shagrau letmat jaw nna shagrau sha-a lam galaw lai wa ai rai nga ai.   

Italian myu sha Mama Maria Concetta gaw shi a kung kyang ai magam bungli rai nga ai ma shangai gawn lajang ya ai Midwife Sarama magam bungli hte shaning 60 ning tup Africa dan hta ap nawng magam gun hpai lai wa ai. Shi magam gun hpai lai wa ai aten ni hta hkying lam ht ru ai ma Kanu ni, ma atsawm shangai chying hkai la lu hkra garum ya lai wa sai zawn, ya asak 85 ning rai nga sai raitim Mama Maria Concetta matut nna ma Kanu ni hte ma chyangai ni hpe garum ya ai lam ni matut galaw nga ai, re nga ai.

The Daughters of St. Joseph of Genoni ngu ai Mama uhpung na Mama langai rai nga ai, Mama Maria Concetta hpe shagrau let mat jaw ai aten Wa Sarabyin Francis tsun ai hta, “ndai arawng aya lu ai shagrau let mat sak jaw ai lam gaw Africa dan na anhte a hpu nau ni hpe daw jau ap nawng ai Mama a magam bungli ni a matu chyeju dum ai kumla hte Mama hpe tsawra manu shadan nga ai lam a kumla hku nna sak jaw ai shagrau let mat re” nga nna wa Sarabyin tsun lai wa ai.  

2015 ning, Matsan dum lama ai Jubilee shaning hpaw hpang ya na matu Wa Sarabyin Fraicns African Ka-ang Mungdan de du gawan sa ai aten, African Ka-ang Mungdan mare daju Bangui hta Mama Maria Concetta hpe Wa Sarabyin Francis hkrum lai wa ai, dai aten hta Mama Maria Concetta gaw Congon Mungdan kaw nna sa du ai lam re, nga nna mung Wa Sarabyin tsun lai wa ai.

Ya yang, Mama Maria Concetta hku nna shi a Mama uhpung ni the hkrum na matu Roma Mare hta chyahkring mi du nga ai lam re, kade nna yang shi a magam bungli bai matut galaw na matu African dan de bai hkawm sa wa na rai nga ai, Mama a sasana magam bungli a matu akyu hpyi garum ya nga ga, nga nna San Peter pa kaba hta du hpawng nga ai shawa hpawng kaba hpe Wa Sarabyin tsun dat nga ai lam Vatican shiga dap kaw nna shana dat nga ai.

Translated by:Fr.Bernard Dashi Tang Ji

Source : Vatican News