Pranwan Ladaw III, A, 2023 - Myihtoi Isaiah a laklai kabu hpa myithoi ga

Pranwan Ladaw 3

Hkristu hta tsaw ra ai nu wa hpu nau ni e, ndai laban gaw pranwan ladaw hta (3) ngu na laban rai nga ai.

Myihtoi Isaiah a laklai kabu hpa myithoi ga

Egutu mung kaw na nam mali, zaibru pa ni hpe lai di hkrunlam galu hkawm ai hpang, Israel myusha ni ga sadi tawn da ai Cannon mare de du ai shaloi, Mawshe a hkinghtawng hpe dagraw ai Jushua gaw Yaku a kasha aru arat Israel myu lakung shi lahkawng (12) a matu lamu ga hpe garan ya ai. Israel myu lakung 12 mying gaw Yaku a kasha 12 a mying hte rai ma ai.

Reuben, Simeon, Levi, Judah, Dan, Naphtali, Gad, Ashe, Issachar, Zebulun, Joseph hte Benjamin ni rai ma ai.

Zebulun hte Naphatali yan gaw dingdung Galilee hpe hkam la lu ma ai. Dai buga gaw tsawm htap ai rai nna, ga sau kaja ai lamu ga raitimung, hpyen ni a gasat ai hpe hkrum lai wa ma ai.

Myihtoi Isaiah gaw BC 700 daram aten, Yerusalem mare hta nga lai wa ai Myihtoi langai rai nga ai. Dai ten, Atsam kaba nna n hkru ai hpyen Asyrian ni gaw Galilee grupyin hte rau dingdung Palestine hpe shang gasat jahten kau ma ai. Mung masha ni hpe mung mayam hku nna rim woi la ma ai.

Myihtoi Isaiah gaw Yerusalem mare hte rau Galilee ginwang hta du shang wa ai kam maka n tsawm gaw mungdan ting de yet yet rai nna ka-up shang wa na hpe mu lu ai.

Raitimung, a kajawng sha, Karai Kasang a wenyi gaw Myihtoi hpe, dai ginra hta htoi tu wa na nhtoi langai madun dan nna shinggyim masha ni a myit masin salum hta laklai kabu pyaw lam langai hpe mu lu shangun ai.

Dai kabu pyaw lam hpe shingdaw ga hte, Myihtoi Isaiah tsun ai gaw (1) shu la dan la ten shinggyim masha ni kabu pyaw ai lam, (2) hpyen hpe dang manga kau ai hpang zing madu la lu ai sutgan arung arai hpe garan la let kabu pyaw ai lam ni hte shingdaw da ai.

Hpyen ni hpe dang manga lu ai gaw, hpyen ma masum tsa hte sha re ai Gidon gaw Midian masha ni hpe dang manga kau lu ai zawn awng dang lu na ra ai lam Yawshua 7: 16-25 hta tsun da ai hte maren rai wa na ra ai. Dai gaw hpang jahtum awm dawm ai lam rai nga ai. Dai shaloi hpyen ni a laknak ni hpe jahten kau nna rim da ai hpyen ni hpe bai dat dat na ra ai.

Karai Mungdan hpe ndau ai a marang e, Yesu Madu gaw shinggyim masha ni a matu nhtoi shingkang, kabu pyaw lam hte lawt lu ai lam hpe gun sa ya ai

Yawdan hka hta Yawhan Batptista a lata hta kashin kamun hkam la ai hpang Yesu Madu nam mali hta lusha gam ai shaloi hkum tsup wa ai lam San Mahte, Myihtoi Isaiah a myit htoi ga hpe madi let tsun da ai rai nga ai.

Yesu Madu mungkan ga de du yu wa ai shaloi, mara a nsin kaba ka-up nga ai mungkan ga hpe mu ai. Shinggyim masha ni nhtoi, kabu pyaw lam hte shanglawt ai hpe n dan n len tam hkawm tim n mu lu ma ai.

Shinggyim masha gaw Karai Kasang hpang de woi sa ai lam hpe n mu lu ai; Shi a lata hte galaw da ai ni hpe mahtang karai kasang ngu shadu lai wa ma ai, hkam la shut lai wa ma ai.

Kabu pyaw lam n nga ai kaw kabu pyaw lam tam ma ai. Kabu pyaw lam n jaw lu ai Satan a gunglau gungle ai hta hkrat sum ma ai.

Yesu Madu gaw Kashin Kamun jaw ai Yawhan hpang da ai hpe matut lit la galaw hpang ai. Yawhan gaw shi a mungga hte masha ni hpe nhtoi jaw ya lai wa ai. Hkyela Madu hte shachyan ya lai wa ai.

"Dai wa gaw shi nan dai nhtoi n rai, nhtio a lam sakse hkam ya na she du sa ai" (Yh 1:8). Chyum laika sara Yawhan gaw kashin kamun jaw ai Yawhan hkum nan nhtoi n re ai lam hkap la sang lang da ai hpe ka da ai rai nga ai.

"Dai nhtoi gaw mungkan ga de du sa nna, masha nlang hte a ntsa e jahtoi ya ai nhtoi majing rai nga ai" (Yh 1:9).

Yesu Madu saw shaga ai hpe hkap la ai ni a matu nhpa kumhpa ni lu la na rai? Yesu Madu gaw shanhte hpe nhtoi jaw ya na ra ai, kabu pyaw lam jaw ya na ra ai, shanglawt ai lam jaw ya na ra ai. Mara hte satan a lata kaw na lawt lu ai lam jaw na ra ai.

"Ndai mungkan ga gaw, ya jang pyi tara jeyang ai hkrum nga sai" (Yh 12:31). Yesu Madu du sa ai hte rau nhtoi, kabu pyaw lam, hte shanglawt ai lam hpe jaw ya sai hpe myit dum shangun ai.

Yesu Madu gaw, mungkan ntsa, Karai mungdan gaw gap na matu atsam marai dat nna shakut ai

Mungga hkaw tsun ai hte machyi makaw amyu myu, ana amyu myu hpe shamai ya ai: "Yesu Madu gaw galilee mung ting hta kawan hkawm let, tara jawng ni hta sharin shaga nga nna, dai mungdan a lam Kabu Gara Shiga ni hpe hkaw dan ai hte, mung masha ni a machyi makaw amyu myu hte ana ahkya amyu myu hpe shamai shatsai ya wu ai" (Mt 4:23).

Karai Kasang a sharawng awng myit ra ai hta hkan shatup hkawm sa ra ai. Mara hta hkawm sa ai rai yang, Karai Kasang du sa ai shaloi sumsing mungdan de n shang lu na, shapraw kau hkrum na ra ai (Mt 22:13).

Yesu Madu gaw sape ni hpe lata san la ai: Yesu Madu Petru hte Andrew yan nau, Yawhan hte Yaku yan nau, bai kaga masha ni hpe shi a hpang hkan nang na matu saw shaga ai. "Shaloi jang shan a sumgawn ni hpe kau da nna shi kaw hkan nang ma ai" (Mt 4:20, 22).

Yesu Madu saw shaga ai ni hta lai nna Karai mungdan shang lu na n rai

Yesu Madu, Jerusalem na Yuda ningbaw ni hte dai kaw na masha ni hpe shawng hkaw tsun ai rai yang kaja na wa ngu anhte myit yang myit na ga ai.

Raitimung, Yesu Madu gaw Galilee gingwang hta hkaw tsun hpang ai. Galilee na masha ni hte rau nga aten grau law ai hpe mu lu ga ai. Shi shaga la ai ni mung Galilee na masha law malawng rai nga ai. Shanhte gaw myit san seng ma ai hte Madu a hpang shanglawt ai myit hte asharawng ashara rai hkan nang ma ai.

Galilee ginra gaw Yuda masha, tara maigan masha, gun rai hpaga ga ai ni, hpyen ma ni kayau kaya nga ai ginra rai nna ga hpan mung kayau ai shara rai nga ai. Kaga ginra ni hta zawn makam masham lam hpe hkungga ai lam mung n nga ai shara rai nga ai.

Karai mungdan a hpyen gaw anhte shada n ru n ra byin ai lam rai nga ai

Anhte yawng gaw mara kaw na myit malai na hte Karai Kasang a up hkang ai hpe hkam la na matu Yesu Madu saw shaga ai hpe Kashin Kamun hkam la ai shaloi hkap la lu ga ai.

Hkristu a mungdan hpe sawn hpan shadawn shadang masat ai hte n shadawn ai; Kawa Karai Kasang a myit ra ai hpe hkam la hkan shatup ai masin salum hte mahtang shadawn ai.

Chyum daw lahkawng hta tsun da ai Korintu mare na Nawku hpung gaw anhte hte bung ai Nawku Hpung rai ma ai. Nkau masha ni gaw Karai Kasang a up hkang ai hpe n'nan daw hta myit shang sha let hkap la ma ai. Raitimung, aten na wa ai hte maren Satan a mayam prat de bai du wa ma ai.

Raitim, dai Hkristan ni a matu kaba dik rai nga ai Karai Kasang a ja mungdan a matu dingbai dingna gaw Kabu Gara Shiga hkaw tsun ai ni a ntsa madung tai nga nna shanhte shada da hta myit garan ginhka ai  lam rai nga ai.

San Pawlu gaw myit garan ginhka ai lam hte seng nna shanhte hpe sadi jaw shadum jahprang da ai. Shanhte gaw masin salum kaw nna Karai Kasang a ja mungdan matu kun dinghku masha zawn n nga ai rai yang, yawng myit hkrum myit hpawng ai lam n nga ai rai yang, shada da Hkristu a mying ningsang hta tsaw ra lam n nga ai rai jang, Nawku Hpung gaw lam hte lam rai garan mat na ra ai.

San Pawlu a sadi jaw shadum jahprang ai gaw anhte a matu aten naw dep shi nga ai. Myit hkrum kahkyin gumdin ai hta Karai Kasang a ja mungdan gaw anhte a masin salum hte makau grupyin hta ru jung nga na ra ai.

Akyu hpyi saga

 Wa Karai Kasang e, Hkristan masha ni myit hkrum kahkyin gumdin rau rai nga lu na makam shangang shakang ya rit. Anhte a madu Yesu Hkristu a marang e hpyi nem nga ga ai. Amen.

Hkristu hta tsaw ra hkungga ai kanu kawa Tara hkaw sara/num ni hte nu wa hpu nau ni e hpawt ni gaw Pranwan ladaw hta (3) ngu na laban rai nga ai.

Hti ang ai Ja Chyum Mungga in gaw

Chyum mungga daw (1) Is 8:23 – 9:3

Chyum mungga daw (2) 1Kor 1:10 – 13, 17

Kabu gara shiga Mt 4:12 – 23

Ndai Ja Chyum Mungga ni hpe hti nna hpawtni na nawku daw jau lamang ni hpe woi awn nga ga!