Wa Sarabyin: Shingni Gaw Simsa Lam Jaw Ai

December 17, bat kru ya shani, Wa Sarabyin Francis, dai shana maga,Vatican hta, Hkristmas Yu-ngwi hte shangwi shapraw lamang hta lawm ai yu-ngwi shingni ninghkring ni hpe chyeju dum ai lam tsun let shanhte hkam la lu ai atsam gaw chyeju kumhpa rai nna dai hpe sung lang akyu galaw na lit mung nga ai nga nna n-gun jaw shadum da ai.

Ndai zawn galaw ai lamang hpe 1993 shaning kaw nna hpang wa ai re lam chye lu ai. Shaning shagu, December shata hta, mungdan law law kaw na yu-ngwi ninghkring ni, dum shapraw ninghkring ni hkrum zup hpawng de nna shangwi shapraw lamang galaw ai lam rai nga ai.

Dai ning na shangwi shapraw ai hta na lu la ai alu ni gaw, San Pra ai Don Bosco kasi hkan ai Salesian Sanana hpung kawn masing jahkrat woi ai rai nna, lu la ai alu ni hpe gaw Ukraine mungdan, Kyiv hte Lviv mare kaba ni hta nga ai Ukraine masha ni hpe garum sa wa na re lam chye lu ai.

Wa Sarabyin gaw, "Our Emergency is Peace", anhte matu ya ya ra ahkyak dik htum gaw simsa lam re, ngu ai ga manoi hte lamang hpe galaw na matu gabaw lata ya ai lam chye lu ai.

Ukraine mung shawa masha ni hte rau rai nga na matu mung Wa Sarabyin Francis, mungkan masha ni hpe saw shaga da ai.

Ndai lamang galaw ai a yaw sin ai pandung gaw majan tsin-yam hkrum sha nna hpyen hprawng hprawng yen hkawm nga ai refugees ni a matu rai nga ai, grau nna Ukraine mung shawa masha ni a matu rai nga ai, nga nna mung Wa Sarabyin, ndau da ya ai.

Hkristmas gaw tsin-yam hkrum matsan jam jau yak hkak hkrum nga ai ni hte ni htep nga ai hpe hkam sha shangun na matu shadum ya nga ai; shaning shagu, Du Sa Ladaw hta, anhte na lu ai Karai Mungga gaw hkring sa mat ai, shing n rai, yawn hkyen ai lam ni n re ai; dai gaw myit mada shara hte kabu pyaw lam rai nga ai, nga nna Wa Sarabyin Francis matut tsun ai.

Yu-ngwi shingni gaw simsa lam hte hpu nau nau na myit hpe shabyin ya ai. Nsin chyip re ai aten hta pyi mahkawn yu-ngwi nsen ni gaw myit masin hpe shangwi shapyaw ya ai shiga jaw ya lu ai; masin salum hpe simsa shangun ya lu ai rai nga ai.

Yu-ngwi gaw salum hpe shalan shabran ya lu ai, shanem ya lu ai, hkam sha yak ai lam ni ana hpe shamai ya ai, ngwi pyaw lam jaw ya ai; shada kahti kalai shaga lu shangun ai, shada hku hkau manang kaja shabyin ya lu ai. Dai majaw yungwi shingni gaw simsa lam langai re, nga nna Wa Sarabyin Francis sakse hkam da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-to-artists-music-is-a-path-to-peace.html