Wa Sarabyin Galaw Lai Wa Sai Ahkyak Ai Magam Bungli Ni Hpe Vatican Kaw Na Dinglik Yu

Friday, March 15, 2019
PDF: 
PDF icon wa_sarabyin_francis_sarabyin_tai_wa_ai_6_ning_ladu_hkrum_ai_aten.pdf

2013 ning March shata 13 ya shani sarabyin lata dang dang hkrum ai Wa Sarabyin Francis gaw ya ndai march 13 ya shani hta Sarabyin tai wa ai 6 ning ladu hkrum sai rai nga ai. Wa Sarabyin Francis a Sarabyin prat 6 ning hpe mai gan Mungdan sum tsan hkawm ai, ahkyak ai Synod hkumra hpawng kaba ni galaw ai hku nna lai di nga ai rai nga ai.

Shi a Sarabyin tai ai 6 ning ngu na shaning ladaw laman hta gaw, ahkyak ai mai gan Mungdan du gawan hkawm ai hkrun lam ni galaw lai wa ai hte, ma kaji ni hpe makawp maga la lam hte seng ai Saradaw ni a Synod hkumra hpawng kaba hpe mung Vatican hta galaw lai wa sai rai nga ai.

Lai wa sai shaning hta galaw lai wa ai ahkyak ai magam bungli kaba langai gaw, UAE ngu ai hte United Arab Emirates Mungdan de sa du gawan lam galaw ai aten, dai Mungdan na Muslim ningbaw Grand Imam Al-Azhar hte galaw lai wa ai myit hkrum ta masat htu ndau laika rai nga ai.

 Dai myit hkrum lam a marang e, Muslim Mungdan ni hkan shanu nga ai Hkristian masha ni hku nna makam masham lam ni hpe wang lu wang lawng galaw lu na ahkaw ahkang lu la wa na myit mada shara nga nga sai rai nga ai. Ya kade nna yang sa du gawan lam galaw maw nga ai, Bulgaria hte Romania Mungdan ni de sa du gawan ai shaloi, Hkristian makam masham uhpung ni a lapran shada da mai kaja ai makyit mahkai ganawn mazum lam ni grau ngang kang wa hkra galaw na lajang nga ai lam mung nga nga mali ai.

Bai tara shang ndau shana ai lam garai n galaw shi ai raitim, kade nna yang Japan Mungdan de mung wa sarabyin sa du gawan na lajang nga ai. Japan mungdan de sa du gawan ai shaloi, Nuclear wanbawm lak nak a majaw hkrum hkra lai wa yu sai hkrit hpa hten za lam ni hpe, Mungkan masha ni bai su hprang wa hkra galaw na masing nga nga ai. Nambat masum ngu na Mungkan majan byin yawng wa na maga de gau ngwi ngwi sit nawt wa nga ai masa hta sak hkrung nga ra ai ndai prat na masha ni hte du wa na prat ban masha ni hpe Nuclear wanbawm lak  nak a shahten shaza lu lam kade hkrit hpa re ngu ai lam hpe shadum sadi jaw lam galaw na matu rai na re, nga ai.

Nawku hpung kata Jau Saradaw ni kaw nna ma kaji ni hpe hkum shan roi rip lam mang hkang ni, bai Nawku hpung kata na nhkrum nra re ai mang hkang lam ni hpe ran hparan ra ai lam ni a majaw yak hkak lam ni law law hpe mung lai wa sai shaning ni hta wa sarabyin Francis hkrum lai wa ai. Dai re ai majaw lai was ai shaning October shata hta, hpung masha ni yawng nawku hpung a matu shani shagu Rosary hti nna akyu hpyi garum ya lam galaw ga nga nna saw lajin ai lam mung Wa Sarabyin galaw lai wa ai rai nga ai.

Wa Sarabyin tsun shadum mayu ai ahkyak ai lam gaw, “Nawku hpung gaw shi a n gun atsam san san hte sha shi hpe sharu shatsang nga ai nat tsadan a lata kaw nna lawt lu hkra shi hkrai shalawt la lu na nrai nga ai. Hpa majaw nga yang Nawku hpung hkum nan, tsi lajang shamai shatsai ya lam hpe jaw ya na matu hpyi lajin lam galaw nga ai jan re ngu ai hpe nawku hpung yin la nga ai.

Shi a Madu rai nga ai Madu Yesu kaw nna kaw nna tsawra matsan dum lama ai lam hte raw dat hkyam sa jaw ya na ra kadawn nga ai Nawku hpung re, ngu ai lam hpe yin la let, shut hpyit mara a majaw wunma law law hte daw hten hkrum nga ai ndai prat na masha ni hpe Kabu gara ai shiga hkam tsun nga ai nawku hpung rai nga ai.

Raitim mung, anhte langai hpra hku nna mung, Nawku hpung uhpung uhpawng hku nna mung gun la hkam ra ra ai lit lamang ni hpe shagrit shayawm kau mai ai ngu ai lachyawm chyawm nrai nga ai,” nga nna Wa Sarabyin tsun lai wa sai lam Vatican shiga dap kaw nna shana dat nga ai.

Source:Vatican News

Add new comment

6 + 11 =

Quick Links