PLN Ginjaw Ginwang Num Hpung Ni Alu Sumbu Hpaw Poi Galaw

Shaning tup Karai Kasang kaw na lu la ai chyeju hta na, chyeju dum alu sumbu hpaw ai lam rai nga ai.

PLN jau ginwang kanu num hpung ni a No ( 1 ) lang na chyeju dum alu sumbu hpaw poi hpe jau ginwang ginjaw num hpung ni woi awn nna ( 13.10.2022 ) ya shani PLN St. Joseph nawku jawng wang hta galaw la lu sai.

Chyeju dum alu sumbu hpaw poi galaw ai a yaw shada lam gaw lai wa sai aten hta jau ginwang n nga ai, ya gaw jau ginwang lu ai laning mi jan sai hte covid ana zinli ni mung hkoi tsai wa sai majaw sara gai wang shagu na nu num hpung ni yawng hkrum zup lu na matu mung, shaning tup Karai Kasang kaw na hkam la lu sai chyeju ni hpe chyeju dum na matu yaw shada let alu sumbu hpaw ai hpe galaw ai re.

Anhte lu hta la ai alu ni hpe PLN nawku jawng gawgap ai, Nu Maria Lungpu gaw gap ai hta bang na, chyahkrai bawda hkan, jau tai jawng hkan bang na matu yaw shada ai. Anhte ginjaw num hpung ni lu tam da ai alu ni hpe grai yak hkak ai dinghku ni hpe garum na, grai yak hkak ai sara gai wang ni hkan mung garum shingtau na ngu myit tawn da ai lam ni nga ai nga nna ginjaw num hpung alu jahpan jum hte kun hting yan tsun dan ai kaw na chye lu ai.

Dai shani na alu sumbu hpaw poi hta ginwang up wa jau Noel Naw Lat kaw nna alu bang ai hte seng ai nna Karai mungga hte rau sa du lawm ai hpe hkaw tsun n gun jaw ai lam hta

Daini alu sumbu hpaw poi ngu ai hta poi langai sha nrai nga ai, anhte makam masham hpe hkap yin la ai, Karai Kasang hte seng ai ngu ai hpe hkap yin la saga ai. Ndai makam masham ngu ai hpe sakse hkam lu saga ai.

Dai majaw daini nu num hpung ni alu sumbu hpaw ai, Karai Kasang hpe ap ya ai, alu jaw ai lam mahkra gaw anhte nu num ni Karai Kasang hte seng nga ga ai, anhte a kun dinghku gaw Karai Kasang hte seng ai re ngu ai hpe hkap yin la ai lam rai nga ai.

Alu bang ai shaloi kade daram lu bang ai, kade daram law ai ngu ai hta chyeju dum ai, Karai Kasang hpe tsawra ai myit hte bang ai alu rai ra ai.

Anhte Karai Kasang kaw na grai law hkra lu la ai, Karai Kasang kaw na lu la ai hpe she bai tsun ga nga yang, manu jahpu hku nna she bai htang na nga yang gaw nloi na re. Karai Kasang kaw na chyeju hpe shani shagu lu la ai. No ( 1 ) gaw Sumsing Mungdan hpe madu lu ai, sumsing mungdan hpe hkring htawng dagraw nna, sumsing mungdan a htani htana asak lu la na, Karai Kasang a kasha tai na ahkaw ahkang anhte lu la ai.

Alu jaw ai ngu ai gaw bang nan bang ra ai ngu ai lit magam langai mi hte alu bang ai baw nre, Karai Kasang hpe tsawra ai myit hte alu bang ra ai.

Alu bang ai ngu ai gaw Karai Kasang a n lahpawt ai myit hte jaw ai chyeju ni hpe bai chyeju htang ai, Karai Kasang a hpring tsup la ai,n ma ai chyeju sut jahkrat ya ai lam ni, Karai Kasang hpe grau nna chyeju hpyi la ai lam, chyeju dum ai lam sha rai na re.

Dai re majaw daini Karai Kasang hpe tsawra ai, chyeju dum ai, Karai Kasang a shaman chyeju ni lu la sai ngu ai hpe myitdum let chyeju htang ai, matut manoi rai nna ndai myit masa hte shakut mat wa ga nga nna ginwang up wa jau Noel Naw Lat kaw nna sa du lawm ai ni kanu num hpung ni hte hpung masha ni hpe n gun jaw ga tsun ya ai.

PLN jau ginwang gaw lai wa sai ( 1.5.2021 ) ya shani hpaw hpang da lu ai jau ginwang nnan langai rai nga ai.

Shiga - Julia Ja Ing