Myanmar, Ukraine, Cameroon Mungdan Ni Hta Simsa Lam Gaw De Sa Wa Mu Nga Nna Wa Sarabyin Francis Hpyi Shawn

September 25, laban shani, Wa Sarabyin Francis, mungdan shagu hpe hpyi shawn da ai lam langai galaw dat nga ai.

Majan tsin-yam hkrum sha nga ai Myanmar, Ukraine, Cameroon mungdan ni hta simsa lam nga wa na matu mungdan shagu na ni ahkyak da madi shadaw garum ya mu, ngu hpyi shawn da ai.

Myanmar mung shawa masha ni hta hpyen gumshen ai lam ni matut nga dingyang re ai majaw mara kata Myanmar mung shawa masha ni si hkrum ra ai, shara htawt si nga hkawm ra taw ma ai hpe mungkan mungdan shagu hkum malap da ya ga, n mu jahpai hpai hkum galaw mu, nga nna Wa Sarabyin Francis mungkan de ndau da ya ai.

Lai wa sai laban hta hpaji jawng hta hpyen gumshen ai ni e bawm kapaw, sinat kapaw gap bang ya ai majaw jawngma law law si mat ai lam hpe na lu ai nna myit n pyaw yawn hkyen hkrum ai lam Wa Sarabyin Francis mungkan de ndau shana da ai rai nga ai.

2021, February shata hta Myanmar hpyen hpung ni kawn mungdan daru magam hpe zing la kau ai hpang, Myanmar mung shawa law law majan tsin-yam a majaw si htum wa ai hkying kaba, mun hku rai sai lam hpe mung UN kawn sawk sagawn da ai lam, Wa Sarabyin, mungkan ting mu chye na lu nna Myanmar mungdan simsa lam hta garum ya na matu shalai ndau shana da ya ai.

Ukraine mungdan hte Cameroon mungdan hta mung majan tsin-yam a majaw si htum wa ai masha law law rai nga sai hpe shana ndau shana ya let, dai mungdan lahkawng simsa ngwi pyaw wa na matu mung Wa Sarabyin Francis garum hpyi da ya nga ai.

Cameroon mungdan hta lai wa sai bat manga ya shani, kadai re mung n chye ai damya ni e nawku jawng langai hpe wan sa nat jahten kau ya nna jau ni hte sasana ma ma ni hpe mung rim wa mat ai re lam chye lu ai.

By Fr. Patrick Gawmaw Hkawng Yae