Pakistan Hte India Mungdan Lapran Kasat Kala Majan Nbyin Wa Hkra Pakistan Mungdan Saradaw Ni Tsun Lajin Ai Lam Galaw

February shata 26, 2018 lai wa sai bat lahkawng ya shani India Mungdan Asuya kaw nna Pakistan Mungdan kata de nbungli hte bawm jahkrat kasat ai lam ni galaw dat ai hpang, Pakistan hte India Mungdan lapran kasat kala majan ni byin bra wa na tsang shara nga wa ai majaw, Mungdan lahkawng lapran simsa lam tsun shaga bawng ban ai lam ni galaw na matu Pakistan Mungdan Saradaw ni kaw nna tsun lajin ai lam galaw dat nga ai.

Pakistan Mungdan kata na, Islamist hpyen hpung ni hpyen la nnan shapan lam galaw nga ai dabang shara ni hpe nbungli kaw nna bawm jahkrat kasat ai lam ni galaw lai wa ai, Islamist hpyen la ni law law si hkrum lai wa ma ai, nga nna India Mungdan asuya kaw nna ndau dat nga ai. Pakistan asuya kaw nna tsun ai lam hta gaw, si hkala hkrum ai lam ni nnga ai, raitim mung ya zawn adawt kasat lam galaw ai lam hpe bai tai na re, nga nna tsun ndau dat ai lam ni nga nga ai majaw Nuclear wan bawm lak nak lu ai Mungdan lahkawng lapran kasat kala majan ni sawng jat wa na tsang shara byin pru nga ai rai nga ai.

Pakistan Mungdan kata Kilometer 50 daram lai shang nna Balakot ngu ai kahtawng makau hta lai wa sai bat lahkawng ya shani nbungli hte bawm jahkrat kasat ai lam India Mungdan kaw nna galaw lai wa ai lam rai nga ai. Ndai gaw 1971 ning India hte Pakistan Mungdan lapran byin lai wa ai majan a hpang, nam bat langai lang ngu na Pakistan Mungdan jarit lai di nna bawm kahkrat kasat bun ai lam India Mungdan kaw nna galaw dat ai lam rai nga ai.

Lai wa sai Fen 14 ya shani Kashmir ginwang na India Mungdan a ahkyak ai hpyen ginra langai hta maw daw bawm hte shang dawt kapaw kasat hkrum ai hta India Mungdan hpyen pyada 40 daram asak si hkrum lai wa ai mabyin a hpang ya na zawn Mungdan lahkawng lapran dingkren ai lam ni grau sawng jat wa ai lam rai nga ai.

“Kashmir ginwang hta byin lai wa ai jahten sharun adawt kasat lam hpe mung, laknak lang nna galaw ai kaning re ai kasat kala lam hpe raitim mung ja ja ning hkap ga ai, majan kaba byin ai de woi yawng mat wa shangun lu ai shamu shamawt lam ni yawng hpe jahkring kau mu ga, dai zawn galaw nga ai masha ni a masin salum ni hpe lai kau ya rit ga Karai kasang kaw a akyu hpyi ga ai, hkala nba hkrum nga ai ni a matu akyu hpyi ya ga, India Mungdan hte Pakistan Mungdan lapran simsa lam lu la na matu akyu hpyi ga,” nga nna Pakistan Mungdan Hyderabad saradaw ginwang a saradaw Samson Shukardin tsun lajin lam galaw dat nga ai lam Vaticasn shiga dap kaw nna shana dat nga ai.    

Source:   Vatican News