Wudang Shagrau Poi Sa Lawm Ai Ma Ni A Nsen

Myitkyina Saradaw ginwang hta galaw ai ( 39 ) lang na Alam kyu hpyi bum Wudang shagrau poi hpe ( 14 September 2022 ) ya shani galaw lai wa sai rai nga ai.

Bum ntsa kaw galaw ai wudang shagrau poi missa hkungga hta akyu hpyi sa ai  masha ni  ( 5000 ) jan daram sa du lawm ai rai nna law malawng gaw ramma ni re ai hpe mu mada lu ai. Dai hta Sasana ma hpung, Holy childhood ma kaji ni mung grai law sa lawm ai hpe mu lu ai.

Hkying hkum 2 jan lam hkawm nna lung ra ai bum ntsa de ma kaji  ni hpa majaw sharawng shara rai sa lawm ai kun ngu ai hpe chye lu na matu RVA kawn ma kaji n kau mi hpe hkrum shaga lam galaw yu ai shaloi akyu hpyi na matu lung wa ai re lam tsun dan ma ai. Ma kaji rai nga ai hte maren shanhte a kyu hpyi yaw shada lam ni gaw kanu kawa ni a matu madung akyu hpyi ya ai lam tsun hpaw dan ma ai.

Hkrum shaga ai hta lawm ai ma kaji langai mi gaw hpunau KBC kaw na rai nna, shi kanu gaw ya ten Miwa mung de nga taw ai rai nna, dum nta de wa na yak hkak nga ai majaw kanu Miwa mung kaw na bai lu wa na matu akyu sa hpyi ai re lam tsun dan ai. Rau mare na manang langai hte rau lung ai rai nna September 13 ya shana ( 9:00 ) kaw nna hpang jahpawt September 14 ya jahpawt (7:00) du hkra bum ntsa de 5 lang lung ngut sai lam tsun ai. Hpa baw a matu ngu ai yaw shada lam laksan n nga ai raitim Wudang shagrau poi gaw ma ni a matu pyaw hpa lam langai zawn mung rai nga ai. Mung masa pyaw ai aten ni hta dai ma lahkawng zawn sha, kaga ma ni law law mung bum ntsa de lung dat yu dat rai 4/5 lang ding htan ai hpe mu lu ai. 

By - Julia Ja Ing