Pranwan Ladaw (22), C, 2022: Teng man makam tara

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (22) ngu na laban rai nga ai.

Laban nhtoi hta hpawng de akyu hpyi ai gaw kabu pyaw lam jaw ai hpawng de lam rai nga ai

Chyum daw langai gaw laban nawku daw jau ai Hkristan ni a matu htak htuk ai sang lang da lam rai nga ai.

Laban nawku daw jau na matu hpawng de nga ga ai gaw, Israel myusha ni Sinal bum lagaw hta Karai Kasang hte shi a ga shaka rai nga ai tara kanu lam (10) hpe hkam la lai wa ai zawn anhte hpawng de nga ga ai hta grau lak lai hkum tsup ai lam rawng ai.

“” (Pru Mat Wa ai Laika 20:19).

Anhte hpawng de ai lam gaw kabu gara ai hte hpawng de ai lam rai nna, hkrit tsang ai lam n nga ai hpawng de lam rai nga ai. Laban nhtoi hta hpawng de ai shaloi anhte kabu pyaw ai lam gaw (1) Karai Kasang a lamu kasa ni, san pra ai ni anhte hte rau nawku daw jau shakawn nga ma ai majaw (2) kaji ai wuhpawng sha mi raitim, shingtai, manang n lawm ai sha, nga taw ai n rai ga ai, mungkan ting na nawku hpung masha ni Madu Yesu a hkum hkrang langai sha hta pawng nga ga ai hte rau akyu hpyi nga ga ai majaw (3) Anhte hpe kaja wa sha akyu hpyi woi awn ai wa gaw tara hkaw sara, Jau, Saradaw ni n re ai sha, Yesu Madu hkum nan woi awn nga ai majaw ni rai nga ai.

Laban nawku daw jau ai lam gaw Hkristu Madu hkum nan anhte a matu lajang da ai daw sha poi hpe galaw ai rai nga ai

Ndai laban na Kabu Gara Shiga gaw Pharicee langai mi Yesu Madu hpe shana shat sha na matu saw shaga ai lam rai nga ai. Yesu Madu shi a dum nta kaw du ai shaloi, nta madu, jinhku jinyu, manau manang ni hpe mung saw shaga da ai hpe mu lu ai.

Yesu Madu gaw lu su ai ni hpe saw shaga na hta matsan mayan re ai ni hpe saw shaga ai rai yang akyu grau kaba na re lam hpaji jaw ai. Chyeju htang na n mai byin ai matsan mayan ni a matu Madu Yesu hkum nan lit la chyeju htang jaw ya na rai nga ai. Daw jau chyeju galaw ai wa myit mada da ai hta grau ai chyeju kumhpa bai jaw ya na rai nga ai. Sumsing dawsha poi hta shang lawm lu ai chyeju htang ya na rai nga ai.

San Luka ndai chyum daw hpe ka ai a marang e, Madu Yesu, Pharicee ni hpe hpaji jaw lai wa ai hte maren, Hkristan ni, laban nhtoi shagu tatut hkan shatup na matu rai nga ai.

Laban nawku daw jau gaw Hkristu Madu, tsaw ra myit kaba hte, Hkristan ni a matu lajang da ai daw sha poi rai nga ai.

Anhte mungkan shinggyim masha yawng gaw Yesu Madu tsun ai matsan mayan re ai ni rai ga ai. Anhte law malang gaw mungkan sutgan matsan mayan rai ga ai. Grau nna gaw, Wenyi lam hta matsan mayan ai hte wenyi lusha mawhpyi ni rai ga ai hpe gaw dum shai ra ga ai.

Wenyi lam yan hta n-gun n rawng ai majaw sumsing hkrunlam n hkawm jing byin chye ga ai. Laban shani rau hpawng de ai hta Madu Yesu sa du lawm nna sumsing hkrunlam a matu n-gun ban ya nga ai hpe dum hprang ra ga ai.

Anhte gaw myi kyaw, na lahpang  ni rai ga ai. Kashin kamun hkam la ai shaloi, Hkristu gaw wenyi myi, wenyi na hpe bai jahpaw ya nna myi mu, na na shangun ai.

Laban nawku daw jau ai a marang e, mara kaba ni a majaw nsin htawng hta bai n hkrat hkra Karai Kasang lajang da ai hpe bai shadum ya ai.

Makam masham myi hte sadi shahka let azi yu chye ra ga ai. Anhte chyeju htang n lu ai lam ni hpe Madu Yesu gaw, shi a tsaw ra myit hte atsawm sha chye na hkap la ya ai.

Laban nawku daw jau ai hta shang lawm ai gaw, Yesu a matu mara n rai nga ai; anhte a matu mara she rai nga ai.

Laban nawku daw jau ai lam gaw sumsing mungdan dawsha poi a matu hkyen lajang ai, shaman shakyang ai lam rai nga ai.

Teng man shagrit shanem ai wa chyu sha Hkristu Madu sumsing mungdan hta galaw ai dawsha poi hta saw shaga ai hpe hkap la sa du lawm lu ai

Madu Yesu hpe saw shaga da ai shana daw sha poi hta saw shaga la hkrum ai ni gaw tinang madang gade tsaw ai wa re hpe madun dan mayu ai majaw madang tsaw grau ai shara ni hta lawan ai hku shang dung shara la ma ai.

Yesu Madu gaw dai ni hpe nini htephtep hku masam maram nga ai hpe shanhte kadai mung n dum kau dat ma ai.

Saw shaga ai poi madu ni lajang da ai madang tsaw hkik hkam ai shara hpe n lata na matu Yesu Madu dai saw shaga da hkrum ai ni hte rau anhte hpe shadum da nga ai.

Tinang hta arawng kaba ai wa a shara kaw dung hkrup nna shara galai hkrum ai wa a matu gaya kahpa tai nga ai.

Yesu Madu gaw shi hpe tsaw grau ai shara jaw matu dai zawn tsun shadum ai gaw n rai nga ai. Dai masa hku rai yang gaw, kadai n mu mada ai si mani jahpai ga hte tsun ai tai na rai nga ai.

Yesu Madu gaw teng man shagrit shanem ai myit masa hte shanhte hpe tsun shadum ai. Shanhte myit mang galaw taw ai sat lawat ni gaw ahkyak n re ai majaw mung shadum jahprang ya ai rai nga ai.

Gawng ba rai dum ai wa gaw Karai Kasang a ja mungdan hta hpang jahtum shara, shing n rai, pyi n shang lu na madang de du mat na.

Laban shani nawku daw jau ai lam gaw anhte a gawng kya ai hte shut hpyi mara ni hpe shagrit shanem ai hte hkam la tawng ban galai shai na matu rai nga ai.

Kaja wa sha shagrit shanem ai lam?

Shagrit shanem ai wa a lam laika ka lajang ai hta gawng ba rai dum ai wa a lam laika ka lajang ai rai yang grau loi na re. Myit lamu du rai dum ai wa gaw shi hkum shi kadai re ai, kaning re ai hpe sha sumru ai. Shi hkum shi naw ai wa pyi rai chye nga ai.

Dai zawn re ai masha gaw Karai Kasang hpe daw jau na galoi n sumru ai. Karai Kasang mahtang shi hpe daw jau ra ai ngu sumru chye ai.

Shi hte nihtep ai ni hpe mung malap da, n mu jahpai, n na jahpai chye ai. Tinang chyu sha ahkyak ai ngu hkam la nna kaga kadai hpe mung myit tau ya n ra ai ngu hkam la ai gaw dan dawng ai.

“Gawng ba rai dum ai wa hta kap ai ana hpe shamai ya na tsi n nga ai” (Sirach/ecclesiasticus 3:28).

Teng man shagrit shanem ai lam hpe shinggyim masha ni kaw na hkrak sharin la n lu ai. Teng man shagrit shanem gaw Yesu Madu hta sha sharin hkam la lu na ga ai. Yesu Madu a prat tup gaw teng man shagrit shanem ai kasi rai nga ai.

“Shi a hpun palawng hte magyi hta, hkawhkam ni a Hkawhkam, madu ni a Madu, nga nna ka kap da nga ai” (Shingran Laika 19:16).

“Shi gaw galoi mung Karai gawng shingyan hte, nga pra nga timung, Karai Kasang hte maren rai taw nga na, ma ja e magra noi nga na n myit wu ai. De a malai apyaw alaw sha hte, shi lu malu hpe shagawm kau nna, mayam a gawng shingyan hpe dagraw la let, shinggyim masha zawn shangai wa nna, masha a hpraw nsam hte dan pru ma sai. Shi a myit hpe shagrit shanem kau nna, si ai du hkra madat mara nu ai. Kaja wa wudang hta si ai du hkra madat mara nga ai” (Phili 2:6-8).

Yesu Madu gaw Kawa Karai Kasang hpe sak jaw ap nawng na matu sak hkrung lai wa ai.

“Karai Kasang e, nang myit ra ai hku hkan galaw na ya ngai nang e nga nga nngai” (Hebrew 10:9).

Wudang ntsa nsi hti mahka hta “yawng ngut mat Sali ai” ngu Yesu Madu tsun da ai (Yh 19:30).

Kawa Karai Kasang a tsaw ra dik kasha mung rai, shagrit shanem let ga sadi dung ai ap nawng daw jau ai wa mung rai nga ai.

Yesu Madu gaw shi a sak prat tup hta shinggyim masha ni hpe daw jau na matu mung rai nga ai.

Nazareth mare hta shagrit shanem let madang nyem bungli galaw nna kun dinghku hte rau anhte yawng hpe mung akyu jaw ya ai. Shi galaw ai magam shagu gaw anhte a matu sha rai nga ai.

Hkrung ai Karai mungga hte masum ning tup hkaw tsun lai wa ai. Dai hkrung ai Karai Munga hkaw tsun ai apu asi anhte hkam sha lu ga ai.

Shi kaw sa ai machyi makaw ni, gaw ningja ni, nat kap ai ni yawng hpe Karai Kasang a hpung dagu hte mau hpa shamai shatsai ya ai.

Shi Madu a asak ap nawng ya nna anhte hta shi a wenyi asak hpe jaw bang ya ai.

Kawa Karai Kasang hpang de bai htang wa ai raitim, anhte hpe matut manoi daw jau nga ding yang rai nga ai.

“Shi gaw shanhte a matu Karai Kasang kaw hpyi nem ya na tut nawng e ahkrung nga ai” (Hebrew 7:25).

Yesu Madu chyu sha yawng a matu teng man kasi kaba rai nga ai.

“Nye a kan dang hpai loi nga ai hte, nye  a lit mung tsang nga li ai” (Mt 11:29).

Anhte gaw laban nawku daw jau ai hta shagrit shanem myit hte shang lawm ra ga ai

“Nanhte hpe ngai galaw sai zawn, nanhte mung hkan galaw myit ga, ngu nna ngai nanhte a matu kasi kamang tawn da ni ai” (Yh 13:15).

Yesu Madu hpang jahtum dawsha poi hta kasa ni hpe htet da ai ga gaw anhte a matu mung rai nga ai.

Nawku hpung gaw anhte hpe Hkristu Madu a mying ningsang hte tinang a mara ni hpe yin la nna myit malai lu na matu saw shaga nga ai. Karai Kasang hte prinem lam la nna jat ai Hkristan masha bai tai na matu rai nga ai.

Laban nawku daw jau ai hta shang lawm ai shaloi Yesu Madu hte hkrum ai ten anhte hkum anhte matsan mayan re ai ni, n ging n dan ai ni, rai ga ai hpe bai mu hkam sha chye ga ai. Anhte madu da lu ai ni yawng gaw Karai Kasang jaw ya ai majaw sha hkam la lu ga ai hpe dum hprang wa ga ai.

Shaloi anhte gaw Karai Kasang a man e matsan mayan ni rai ga ai hpe mung, garum jaw garum ya na ra kadawn nga ai mawhpyi ni zawn rai nga ga ai hpe mung dum chye wa na ga ai.

Karai Kasang gaw anhte a ra kadawn ai hpe galoi raitim jahkum shatsup ya nga ai. shagrit shanem ai hte hkap la chye na gaw ahkyak ga ai.

Yesu Madu gaw myit garan ginhka ai, n ru n ra byin ai wuhpung wuhpawng ni hpe sharawng shara ai lam n nga ai.

Lanban nawku daw jau ai gaw anhte hpu nau myit majing hte shada daw jau myit rawng wa shangun ai

Laban nawku daw jau ngut nna tinang dum nta bai wa ai shaloi shagu, Karai Kasang myit ra ai hpe hkan na hte nihtep ai ni hpe garum shingtau na myit daw dan da ra ga ai.

Masha langai ngai hpe hkrit tsang ai majaw daw jau ai, shing n rai, shangun ma tai ai gaw mayam bungli galaw ladat rai nga ai.

Hkristu Madu a mying ningsang hta hpu nau ni hpe daw jau ai gaw teng man myit ngwi myit pyaw hte htani htana asak hpe hkam la na lam rai nga ai.

Akyu hpyi saga

Wa Karai Kasang e, Laban nawku daw jau lamang shang lawm nna, teng man makam tara hpe hkan shatup let myit ngwi myit pyaw simsa lam hte htani htana asak hpe madu lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (22) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) –Sirach/Essiasticus 3:17-20, 28-29

Chyum Mungga Daw (2) – Hebrew 12:18-19, 22-24

Kabu Gara Shiga – Lk 14:1, 7-14

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

Fr. Patrick Gawmaw Hkawng Yae