Laban Shani Na Mungga -Masha shagu hkyehkrang la hkrum na hpe Karai Kasang ra sharawng ai ( Pranwan Ladaw (21), C, 2022 )

Pranwan Ladaw (21), C, 2022

Masha shagu hkyehkrang la hkrum na hpe Karai Kasang ra sharawng ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (21) ngu na laban rai nga ai.

Hkristan ni a makam hte maren, anhte dinghta ga ntsa asak hkrung ai gaw jahtum nhtoi nga na rai nna, si hkam ai a marang e htani htana asak de woi la ai hkrum na ga ai.

Dai rai nna hkye hkrang la lachyum gaw, hpang na prat hta Karai kasang hte rau nga lu na, Shi Madu hte rau htum ngu n nga ai myit ngwi myit pyaw lam hpe hkam sha lu na lam rai nga ai.

Karai Kasang gaw shinggyim masha yawng hpe hkye hkrang la mayu ai. Yesu Madu gaw anhte hpe shi hte rau sumsing mundan hta htani htana ningngai nga na myit sharawng ai.

Kasa ni a makam masham ga (Credo of Nicaea) hte, anhte ni gaw, “anhte a matu anhte hpe hkye hkrang la na nga, sumsing lamu de na yu wa ai Hkristu hpe kam sham ai”, ngu anhte a makam masham hpe tsun shapraw ga ai.

Sumsing lamu lam hpaw ya na hpe kam sham ga ai ngu ai lachyum rai nga ai. Mara dat hkyamsa ya nna shinggyim masha yawng hpe Karai Kasang a kashu kasha ni shatai ya ai hpe kam sham ai rai nga ai.

Yesu Madu gaw shinggyim masha yawng a matu sumsing chyinghka hpaw da ya ai. Yawng gaw myit sharawng ga ai rai yang sumsing mungdan de shang lu ai.

“” (Yh 3:16).

“” (1Tim 1:15).

“” (1Tim 2:4).

Anhte gaw yawng mayawng hta myit um-ang, kam shut ga ai raitim Karai Kasang gaw anhte hpe hkye hkrang la na matu Shi hkum a hpung dagu hte tsaw ra myit hpe masha hkum shagu a ntsa anga nga ai hpe gaw myit um-ang, myit shut na lam n nga ai.

Lawt lu na, shing n rai,  hkrat sum na gaw tinang a myit daw dan ra lata la ai hta sha hkan ai

Karai Kasang gaw shinggyim masha yawng a matu hkye hkrang la lam hpaw da ya ai. Kadai hpe raitim, atik anang shadut shagyen nna hkye la na gaw n re ai.

Shinggyim masha langai hpra gaw Karai Kasang ta ladawn ya ai hkye hkrang la lam hpe hkap la hkam la na, shing n rai, n hkap la na ahkaw ahkang nga ai. Karai Kasang gaw shinggyim masha hpe hpan dat ai kaw nna nan shang lawt ai myit hpe mung jaw bang da ya sai.

Makam hpung langai ngai, shing n rai wuhpung langai ngai hpaw nna sha gaw hkye hkrang la lu sai, ngu pahkam hkam n lu ai.

Karai Kasang Israel myusha ni hpe lata nna tsaw ra ai majaw Messaiah Karai du sa wa na lam lajang na hte mungkan myusha yawng hpe Madu hpang lam woi ningshawng ya lu na matu rai nga ai. Israel myusha ni gaw dai zawn lata la hkrum ai a majaw Karai Kasang a laklai ahkaw ahkang jaw ai hpe mu chye hkam sha lai wa na ma ai.

Raitimung, Yuda myusha ni a ningbaw ningla ni gaw gawng ngwi ngwi rai nna shanhte a ntsa Karai Kasang tsaw ra matsan dum lama ai hpe shut shai ai hku sumru la mu mada nna kaga myusha ni hpe ginhka, jahka da lai wa ma ai.

Israel myusha tai lu ai a majaw Yuda myusha ni hpe chyu sha Karai Kasang lata hkap la nna tsaw ra ai re ngu hkam la shut ma ai. Yuda n re ai ni hpe mara lu ai ni ngu masat nna shanhte hpe Karai Kasang n hkap la ai re, ngu myit la hkam la shut ma ai. Yuda ni gaw shanhte ni chyu sha hkye hkrang la hkrum na teng ai rai nna, Yuda n re ai ni gaw htani htana hten run mat na ra ai ngu myit la hkam la shut ma ai.

Yesu Madu a prat hta Pharicee nkau ni kaw dai shut ai myit la hkam la shut ai hta grau shut kaba ai myit la hkam la lam bai nga wa ai. Hkye hkrang la hkrum na gaw Israel myusha ni yawng mung n re ai; shanhte Pharicee hpung hta lawm ai ni chyu sha hkye hkrang la hkrum na, ngu grau gyip ai myit masa hte myit la hkam la shut ma ai.

Pharicee ni gaw “Ndai shawa masha ni gaw, Mawshe a tara hpe n chye ma ai majaw, Karai Kasang a dagam dala hkrum sha ai ni rai nga ma ai, ngu nna shanhte hpe tsun mu ai” (Yh 7: 49). Pharicee ni shanhte chye sha dagam dala n hkrum ai ni re ngu hkam la ma ai.

N kau ni sha (Pharicee ni) hkye hkrang la hkrum na rai kun? Yesu Madu jaw ai mahtai gaw ga san ai a mahtai hta grau dam lada kaba la ai.

Wuhpung wuhpawng langai ngai hta shang lawm nna sha gaw hkye hkrang la lam n lu ai. Pharicee wuhpung hta lawm nna, shing n rai, Israel myusha tai nna sha gaw hkye hkrang la hkrum lu na n re.

Yesu Madu mungkan shinggyim hkum sa la ai ten hta shi hte mu hkrum rau nga nna, shing n rai, shi a kun dinghku masha tai nna sha gaw hkye hkrang la hkrum lu sai ngu hkrak tup n hkam la mai ai.

Anhte a prat hta hpung shawng shang ai mare, kun dinghku masha ni hta na Jau shawng tai ai, shing n rai, Hpung magam shawng gun ai ngu arawng la arawng mala chye ga ai. Raitim, de a majaw hkye hkrang la n hkrum lu shi ai. Dai hte maren, Jau, Ma Ma, Saradaw, Sarabyin tai nna sha gaw sumsing mungdan shang letmat hpe shi a shi lu la ai n rai nga ai.

Hkye hkrang hkrum lu na matu gaw tinang a mara matu myit malai lu, Karai Kasang sharawng awng ai hpe hkan shatup, nihtep ai ni hpe bau sin makawp maga, garum shingtau ya ai lam rai nga ai. Dai lam ni gaw hkye hkrang la lam matu mara akyu jaw ai.

Masha hkum shagu gaw hkye hkrang la hkrum na matu shakut shaja ra ai.

Karai Kasang gaw masha hkum shagu, dai tinang hkye hkrang la hkrum na lam, yawng hpe jaw da ai.

Masha shagu hpe tinang hte seng ai laksan lit magam ap jaw da sai rai nna, dai lit magam hpe gun hpai ai, shing n rai, hprai ai hta hkan nna hkye hkrang la hkrum na, shing n rai, hkye hkrang la lam hpe jasum kau na rai ga ai. Kaga kadai hpe mung shanawng ya n lu ai. Tinang a hkye hkrang la hkrum na lam gaw tinang hte sha seng ai.

“” (Lk 13:24).

Ndai chyum daw hpe maram yu yang, Yesu Madu gaw hkye hkrang lam hkrum na masha nga ai, law ai, shing n rai, loi ai, yak ai ngu n shang lang da ai.

Masha nkau ni a matu hkye hkrang la hkrum na yak ai lam ni gaw nga nga ai. Yesu Madu mungkan sak naw hkrung ten, mare kaba ni hpe ngang kang ai hpun shadaw ni hte wang kum da ai rai nna, mare kaba de shang na wang chyinghka langai, shing n rai, dai hta kachyi mi sha law grau ai.

Chyinghka hku lai ai shaloi, arai majaw kaba hte rai yang n shalai shang lu ai zawn anhte mara kaba majaw gun ai rai yang sumsing mungdan chyinghka hku n lai shang lu ai.

Nyem ai chyinghka hku lai shang na rai yang gum nna lai shang ra ai zawn sumsing chyinghka hku lai shang ai ni gaw shagrit shanem ai myit hte shang ra ai.

Lachyum gaw, Satan myit masa hpe kau da ra ai. Pharicee ni gaw Mawshe tara hkrak tup hkan ma ai raitim, Karai Kasang a ja mungdan n shang lu ai gaw gawng ba rai dum ma ai majaw rai nga ai.

Hkye hkrang la hkrum na matu tau nau nna mung, ya jang mung, galoi raitim galaw shakut nga ra ai. Anhte a matu aten masat ngu ai nga ai.

Yesu Madu a prat hta Mare kaba shang chyinghka hku kaba ni hpe gaw, shana jan shang ten du jang la sai rai nna, dai chyinghka hku lai sa wa ai ni gyip ai chyinghka hku kasha sha hpaw da ya ai. Shana ten hta shawa wang chyinghka hku mare shinggan n mai le, n mai shang sai.

Yesu Madu tsun ai simsing chyinghka kaba gaw lani mi na nhtoi hta pat da la da na ra ai. Tinang si wa ai shaloi dai chyinghka la da na ra ai. Anhte gaw Karai Kasang ap jaw da ai lit magam hpe aten shagu n hprai ai sha galaw shakut ra ai.

“” (Yh 9:4).

Yesu Madu hpe san ai ga san a hkum tsup dik mahtai

 “” (Lk 13:29).

Ndai ga hte Myihtoi Isiah a myihtoi ga hpe Madu Yesu shagrin shangang shakang jahkrum shatsup ya ai.

Yuda myusha ni mayam prat kaw na bai htang wa nna shanhte manu shadan ai Nawku htingnu hpe bai gaw gap ma ai raitim, Solomon hkawhkam wa gaw gap da lai wa nna hpyen ni e jahten kau ai Nawku htingnu a hkikhkam ai hte shing daw n lu ma ai. Shanhte a matsan mayan hkrum ai a majaw myit garen kaji rai nga ma ai.

Myihtoi Isiah hku nna Karai Kasang gaw shanhte hta myit karen kaji na lam n nga ra ai ngu n-gun jaw lai wa ai.

(1) Mayam prat kaw na bai htang wa ai n law la ai masha ni hpe Karai Kasang gaw mungkan jut shara shagu de kabu gara shiga gun ni shatai let shangun dat na ra ai.

(2) Shanhte a kabu gara shiga shachyam shabra, saw shaga ai a marang e mungkan shara shagu na hti n dang law la ai masha ni Yerusalem de sa du hpawng ma ai. Dai ten hkru lam yak ai hte htaw wa htaw sa mung gumra, lauze, (kolauk) leng ni hpe sha naw jai lang ai rai nga ai.

 (3) Yuda myu n re ai ni gaw Yerusalem htingnu hta hkungga nawng jau na n ging dan ai ngu myit la hkam la lai wa ma ai. Raitimung, maigan mungdan masha ni gaw Israel myusha ni zawn sha Karai Kasang hpe hkap la mai ai ngu awn la let hkungga nawng jau na ahkaw ahkang mung jaw lai wa ai. Yawng gaw Karai Kasang lata la ai myu ni rai wa na ma ai.

(4) Karai Kasang gaw shinggyim masha ni hpe hkap la ai rai nna shanhte hta na nkau ni hpe nawku htingnu hta shi hpe ap nawng daw jau na matu lata san da na ra ai ngu, Is 66:21 hta tsun da ai. “Ngai gaw shanhte hta nkau mi hpe hkinjawng ni hte Lewi masha ni shatai na nngai.”

Karai Kasang gaw, sinpraw, sinna, dingdung, dingda, mungkan shara shagu na shinggyim masha yawng a matu sumsing chying hka hpaw da ya ai raitim shinggyim masha ni shang lawt myit hte lata hkawm sa ma ai majaw nkau ni sha dai sumsing mungdan de shang lu ma ai, ngu Madu tsun sang lang da ai rai nga ai.

Akyu hpyi saga

Wa Karai Kasang e, sumsing mungdan shang lam hpe lata hkawm sa lu ai chyeju atsam ningja anhte hta jaw bang da ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (21) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Is 66:18-21

Chyum Mungga Daw (2) – Hebrew 12:5-7, 11-13

Kabu Gara Shiga – Lk 13:22-30

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.