Floral Arrangement & Decoration Mawn Sumli Hpaji Hte Seng Ai Sharin Dabang

Myitkyina Diocesan Youth Commission hte Unique-Myanmar Team jawm pawng nna woi awn galaw ai, Myitkyina Saradaw ginwang kata na ramma ni a matu ( Floral Arrangement & Decoration ) mawn sumli hpaji hte seng ai sharin dabang hpe 13.7.2022 ya shani angwi apyaw awng dang ai hte galaw ngut kre la lu sai majaw chyeju dum ai lamang kadun hpe mung daina maga ( 6:00 ) aten saw shaga da ai chyeju madu ni hte rau galaw la lu sai rai nga ai.

Ramma ni a matu mawn sumli hapji hte seng ai sharin dabang galaw ya ai a yaw shada ai lam gaw

( 1 ) galu kaba wa sai prat hta hkan nna shara shagu mawn sumli ai lam mung grai madang tsaw wa sai majaw ndai hpaji hpe ramma ni chye wa mu ga yaw shada ai.

( 2 ) Mawn sumli ai hpaji hpe sharin hka ja la nna tinang a matu kan bau bungli langai lu galaw hkra yaw shada ai, bai nna jau ginwang kata hta mung kaga manaw manang ni hpe garan kachyan lu na matu yaw shada ai lam re nga nna Myitkyina Saradaw ginwang a ramma lit hkam Wa Jau Peter Bung Hku Lawt Naw tsun dan ai.

Mawn sumli hpaji hpe sharin ya ai Sarama Matha Seng Mai hku nna ndai sharin dabang hpaw na matu DYC ni sa jahkrum garum hpyi wa ai aten hta naw myit yu ai lam pyi n nga hkra hkap la dat ai re. Hpa majaw nga yang ngai hkum nan ramma ni hpe ndai hpaji grai chye shangun mayu ai, grau nna anhte Kahtawlik ramma ni gaw manang ni hte shingdaw dat yang loi hpang hkrat ai hpe mu lu ai, dai majaw masha ni hta grau hkra nrai tim, masha ni a lahkam dep hkra galaw chye shangun mayu ai. Ndai hpaji gaw yu dat yang grai loi ai zawn raitim zat pinra a pan grang shingdu de ap nawng galaw ra ai lam grai nga ai,masha ni myit pyaw na matu tinang gaw grai puba hkam let ap nawng galaw ra ai bungli langai re . Dai majaw ya ndai hpaji hpe sharin la lu sai ramma ni mung tsawra myit hpe arang bang nna awng dang ai de du hkra galaw sa wa ga, awng dang hkra lu galaw jang gumhpraw mung grai lu mai ai bungli re, nawku hpung hta mung grai akyu jashawn ap nawng mai ai bungli re nga nna n gun jaw ga tsun ai. 

Wa Jau Dr.Peter Hka Awng Tu kaw nna mung daini na prat gaw nawku jawng hkan, poi shingra shara shagu hkan mawn sumli ai hpe grai madang tsaw ai hku galaw taw nga sai. Ndai hpaji hpe tinang chye tawn da ai rai jang kaga masha ni hpe n shaga ra sai, kaga masha ni hpe jaw kau ra ai gumhpraw mung tinang kaw shang ai hpaji re. Tinang a matu, nawku hpung a matu grai akyu rawng ai hpaji re nga nna n gun jaw ga  tsun ai.

Sharin hkam la sai ramma ni mung,chye la lu sai hpaji hpe ya jang nan ta tut tinang hkrai dinghkrai hku nna garai nlu galaw ai raitim chye tawn da sai hpaji hpe nawku hpung hta jai lang na, mawn sumli hte seng nna ra wa ai shara hkan shang lawm galaw nna akyu jashawn mat wa na lam tsun shapraw da ma ai.

Ndai sharin dabang hpe nhtoi ( 17 ) ya tup Sarama Martha Seng Mai ( Unique ) kawn Myitkyina, St. Columban nawku jawng wang na htap masum Mung Bawng htingnu hta sharin ya lai wa sai rai nga ai.