July Shata Akyu Hpyi Yaw Shada Lam: Sak Kung Kaji Kawoi Ni A Matu Akyu Hpyi Ga

July Shata Akyu Hpyi Yaw Shada Lam: Sak Kung Kaji Kawoi Ni A Matu Akyu Hpyi Ga

June 30, bat mali ya shani, Wa Sarabyin Francis, July Shata Akyu Hpyi Yaw Shada Lam hpe Hpung Shawa masha hpang de ndau da nga ai.

July Akyu Hpyi yaw shada lam gaw sak kung kaji kawoi ni a matu akyu hpyi ya nga na lam rai nga ai. Shanhte a matu akyu hpyi ya ai a marang e, shanhte ni gaw si mani ai sharin sara ni tai na rai nga ai, ngu Wa Sarabyin shadum ai.

2022 July 24, laban shani gaw (2) lang ngu na kaji kawoi ni hte sak kung dinggai dingla ni a poi nhtoi ang ai rai nga ai. Dai majaw Kathawlik nawku hpung masha ni yawng July shata tup hta shanhte a matu akyu hpyi ya na hpe Wa Sarabyin Francis saw shaga da ai rai nga ai.

Lai wa sai June shata hta gaw kun dinghku nta masha ni a matu akyu hpyi yaw shada lam tawn let akyu hpyi lai wa saga ai.

“Kun dinghku nta masha ni ngu tsun yang sak kung kaji kawoi ni mung lawm ra ga ai” ngu tsun let ndai akyu hpyi yaw shada lam lahkawng gaw rau rau rai nga ra ai lam Wa Sarabyin tsun sang lang da ai rai nga ai.

Shinggyim labau hta sak kung kaji kawoi ni law law nga lai wa ai zawn matut manoi nga nga ai; raitimung, sak kung kaji kawoi prat hta gara hku sak hkung nga ra na hpe anhte hkrak n chye ga ai. Sak kung kaji kawoi ni hpe yu lakawn ra ai lam law law nga ai raitim, dai lam galaw na masin masa law law n nga shi ai hpe mung Wa Sarabyin shadum da ai.

Si Mani Lam Madu Sara Ni

Sak kung kaji kawoi ni hpe ahkyak da yu lakawn ra ai. Dai zawn yu lakawn ai gaw sak ram kashu kasha ni a matu chyeju hkam la ai lam rai nga ai hpe Wa Sarabyin sumru woi da ai.

“Anhte sak kung sai ni hpe ahkyak da yu lakawn na hpe grai ra sharawng ga ai. Dai lam hte seng nna mung grai sumru dinglik ga ai. Dai zawn yu lakawn ai ni hpe mung grai manu shadan ga ai, tsaw ra ga ai, chyeju dum ga ai, shaman ya nga ga ai,” ngu Wa Sarabyin sakse hkam da ai.

Majan hte hpring rai nga ai anhte a mungkan gaw si mani tsawm htap ai lam anhte a wuhpung wuhpawng ni hta grai ra ahkyak nga ai ngu mung matut tsun da ai.

Hpaji byen-ya hte hpring ai wa

Kaji kawoi ni a matu poi galaw ya ra ga ai. Grau nna gaw mungkan madan kaji kawoi poi nhtoi masat dingsat hpe galaw ya let chyeju hkam la ra ga ai. Sak kung kaji kawoi ni a poi galaw ya na hpe myit dum ga; dai zawn galaw ya ai gaw anhte asak galu chyeju hkam la na lam rai nga ai; makoi magap taw ai hpaji byen-ya rawng ai wa kaw na chyeju hkam la na lam rai nga ai, ngu mung n-gun jaw da ai.

“Sak kung kaji kawoi ni gaw sak ram ramma ni a shawng lam myit mada shara hte lit magam ni hpe jaw ya lu ai. Dai majaw shanhte a matu akyu hpyi ya ga. Shanhte gaw si mani sharin sara ni rai ma ai,” ngu matut tsun da ai.

Sak kung ten hta shingtai hkam sha chye ai gaw shinggyim masha shagu hta byin chye ai. Shanhte a matu akyu hpyi ya na ni gaw  Pope’s Worldwide Prayer Network kaw shang yu akyu hpyi lawm mai ga ai.

Mungkan ting hta sak kung kaji kawoi yawng a tsa shadang (25%) daram gaw shingtai nga ra ma ai.

Nawku Hpung gaw sak kung kaji kawoi ni hte nihtep ai hku nga nga ra ai; Dai gaw Wa Sarabyin Francis anhte marai hkum shagu myit dum let sak kung kaji kawoi ni hpe yu lakawn na lit shatsam ga hta lawm nga ai, ngu “the prefect of the Vatican Dicastery, Cardinal Kevin Farrell, tsun da ai.

Mungkan kaji kawoi nhtoi (World Day for Grandparents and the Elderly) gaw, nawku hpung gaw sak kung kaji kawoi ni hte nihtep ai hku nga nna shanhte hpe yu lakawn nga na yaw shada ai rai nga ai; tatut sakse hkam sa wa ga, ngu Cardinal Kevin Farrell mung madi madun saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

#popefrancis

#cardinalkevinfarrell

https://www.vaticannews.va/en/pope/news/2022-06/pope-francis-july-2022-prayer-intention-elderly.html