Wa Sarabyin: Shinggyim Masha Teng Yang Gaw Gumsheng Ai Lam Yawng Hpe Ninghkap Kau Ra Ai

May 28, bat kru ya shani, Vatican hta, Mungolia Budda dakkasa Phongyi ni hte hkrum shaga ai shaloi, Wa Sarabyin, shinggyim masha teng yang gaw gumsheng  ai lam yawng hpe ninghkap ra ai, ngu tsun da nga ai.

Budda phongyi ni hpe Saradaw Giorgio Marengo, the Apostolic Prefect of Ulaanbaaar, kawn  lamang ni hpe lit la hparan lajang shatsawm jahtuk ya ai re lam chye lu ai.

Wa Sarabyin kawn dakkasa phongyi ni hpe hkungga lara, alum ala rai nna hkap tau la let Budda hte Catholic Nawku Hpung lapran simsa hku hkau ai kanawn mazum lam hte shada chyena hkap la manu shadan hkat nga ai hpe gaw de shakut nga ma ai a majaw mung shakawn shagrau da nga ai.

Ndai prat na shinggyim masha ni gaw simsa lam hpe grai hpang gara taw nga ai. Dai gaw hkyak hkyak ya ya ra kadawn ai lam rai nga ai; shada man hkrum hkrum shaga ai, makam hte myusha baw sang htunghking, lailen lam ni hpe tsun jahta let shada hkungga manu shadan hkat ai a marang e dai simsa lam hpe gaw de lu ai. Ndai zawn rai shinggyim masha yawng hpe hkyawm la nna man hkrum hkrum shaga let makau grupyin hta nga taw ai gumsheg ai lam ni shagu hpe ninghkap sa wa ra ai.

Yesu Hte Buddha gaw Simsa lam hte seng ai yan rai ma ai.

Wa Sarabyin Francis gaw Yesu hte Buddha yan a sharin shga ai lam ni hpe sumru woi ai hta, shan gaw simsa lam hpe gawde lai wa ai yan re, gumshen ai ladat n re ai hpe sharawt shatsaw ai yan re, ngu tsun da ai.

“Yesu gaw Shi a kasa ni hpe, hpyen hpe tsaw ra chye na, gumshen ai hku n re ai si mani ai, myit galu kaba ai hte mara dat ya na matu sharin ya ai; Shi hkum nan wudang ntsa si hkam let kasi madun ai. Dai gaw anhte a simsa lam hpe jaw ai wa, n hkru n kaja ai lam hpe jahtum du hkra shamyit kau ai wa rai nga ai.

Gautama Buddha gaw India labau hta, Buddha makam labau hta, wenyi lam hte seng ai sara kaba rai nna, shi hkum nan mung dai prat hta sak hkrung nga lai wa ai. Dai gaw gumshen lam hpe koi gam nna simsa lam hpe gawde ai ahkyak ai ga baw ginlam akri madung nan rai nga ai.”

Shang lawt Ai Makam hte Hku Hkau Lam

Mongolia mungdan kaw gaw Kahtawlik makam hpe hkap la ai nawku hpung masha grai n law la ai rai nga ai. Jau 33 hte sasana mama 33 sha nga ai rai tim, nawku hpung makam hte htung lai len ni hpe sakse hkam nga ma ai.

Dai majaw Wa Sarabyin Francis gaw Mongolia na Buddha makam hpung masha ni hte Kahtawlik makam hpung masha ni lapran hku hkau kanawn mazum ai hta grau ngang kang hkra gaw sharawt sa wa na hpe mung n-gun jaw da nga ai.

“Daini ndai kaw nanhte sa du ai gaw myit mada lam a kumla nan rai sai”, ngu Buddha dakkasa ni hpe n-gun jaw n-gun la ga tsun da ai. Hpu nau myit majing myit jasat hte manhkrum hkrum shaga let simsa lam hte hkri awn ngang grin ai hku hkau kanawn mazum lam hpe gaw de nga mu ngu mung n-gun jaw lam matsun hpyi shawn dat nga ai.

By Fr. Patrick Gawmaw Hkawng Yae