Nawku Hpung Gaw Kaja Ai Samaritan Masha Zawn Rai Nga Na Hpe Ra Sharawng N-ngai Nga Nna Wa Sarabyin Tsun Ai

Wa Sarabyin: Nawku Hpung Gaw Kaja Ai Samaritan Masha Zawn Rai Nga Na Hpe Ra Sharawng N-ngai Nga Nna Tsun Ai

  June 22, bat masum ya shani, Mungkan ting na kun dinghku ni hte seng ai hkum zup zuphpawng hpaw hpang ai nhtoi hta, Wa Sarabyin Francis, kun dinghku shagu mungkan hpe galai shai na matu hte dai dinghku nta shagu gaw ra kadawn ai ni hpe hkap hkalum ai dum nta tai nga u ga matu lahkam hkam sa wa na saw shaga da nga ai.

  Ndai zuphpawng gaw (10) lang ngu na mungkan dinghku zuphpawng rai nna, bat masum ya shani hpaw hpang ai rai nga ai. Ndai shaning na kun dinghku zuphpawng ni hpe, mungkan madang, tinang a Saradaw Ginwang, Jau Ginwang, hte mare/ lawk ni hta galaw nna, ginjaw matut ladat raitim dam lada grau ai ladat hte galaw na matu laika htuk shabra da ma ai.

  Ndai zuphpawng hpe Vatican kaw manga (5) ya tup galaw ai rai nna, mungdan (120) kaw na kun dinghku dakkasa ni sa du ma ai lam chye lu ai; daini na prat na hkungran sakramentu hkam la ai a tsawm htap lam hte kun dinghku a tsaw htap ai lam hpe madung da sumru bawngban ma ai lam chye lu ai.

  “Kun Dinghku Tsaw Ra Myit Gaw Shaga La Hkrum Lam Hte San Seng San Pra Lam Jaw Ya Ai” ngu Wa Sarabyin madi madun da ai. Kun dinghku prat a yak hkak jam jau ai lam ni hte kabu pyaw ai lam ni hpe sakse hkam ai gaw daini na prat dep mungkan kun dinghku ni a myit mada shara hpe jaw ya ai, ngu mung matut sang lang da ai.

  Chiara Corbella Petrilla, the Servant of God, gaw cancer ana kaba kap machyi kaba hkrum nga ai raitim, makam masham hta ngang kang ai; Ukaraine hta majan byin ai majaw dai kaw kaw na hpawng lawt wa ai Ukaraine mungdan a kanu hte shi a kasha hpe Italay na kun dinghku ni hkap la ma ai; Musin gaida num, the Italian ambassador to the Democratic Republic of Congo, mung shinggyim hkye mawoi magam bungli hpe shakut nga ai; ndai ni gaw dai ni na kun dinghku kanu ni a kasi kaja ni rai nga ai, ngu mung madi madun da nga ai.

Rau Ta Gindun Hkawm Sa Ga

  Ndai kasi la mai ai ni a lam tsun dan let, Wa Sarabyin Francis, hkungran ga shaka hkam da ai dinghku num dinghku la ni hte kun dinghku masha ni yawng, teng man mabyin masa lam hta ap nawng daw jau sakse hkam nga ga ngu n-gun jaw da nga ai.

  “Nang nga ai shara kaw hpang u; dai kaw ap nawng let hkrunlam rau hkawm ga; madu wa madu jan hku, kun dinghku masha hku, kaga kun dinghku ni hte mung, Nawku Hpung ting hte mung rau hkawm sa ga,” nga nna Wa Sarabyin Francis n-gun jaw saw shaga da nga ai.

  “Kaja ai Samaritan masha a kasi hte maren ngai nanhte yawng hpe Nawku Hpung hta rau hkawm sa na hpe ra sharawng nngai,” ngu mung hpyi shawn da nga ai.

  Kaja ai Samaritan masha gaw na a makau hta ni sa wa nna nang matut hkawm sa lu na matu garum ya ai; Gade kaji ai amu raitim, lagaw lahkam mi sha raitim, matut hkawm lu na matu garum ya ai, nga nna, kaja ai Samaritan masha a lam hpe madi madun da ai.

 Hkungran ga shaka hkam na lam hpaw ya ai gaw wudang hpe apup shangun ai; mara dan hkyam sa ya chye shangun ai; ra kadawn ai hpu nau ni hpe hkap hkalum daw jau chye shangun ai; nau na myit majing hpe jaw ya ai, ngu mung tsun shadum da ai. Dai gaw Sasana langai rai nna, Mungkan ting hpe sakse hkam ai mung rai nga ai; Kun dinghku shagu gaw mungkan ting hpe sasana galaw na hte sakse hkam kasi tai nga na lit nga ai.

  Anhte a sak hkrung lam hku nna anhte hte nihtep ai ni hpe gara hku tsun shaga na, sakse hkam na hpe Karai Kasang ra sharawng nga ai kun?, daini na prat dep mungkan ntsa gara hku lahkam ra na kun?, ngu ai hpe sumru let sak hkrung hkawm sa ga, nga nna mung, Wa Sarabyin Francis, anhte hpe saw shaga nga ai.

  “Gran hkring nna madat na la mu! Dai hpang Karai Kasang galai shai shagun ai hpe hkam la mu! Shaloi, nang mungkan hpe galai shai lu ai ni hta na langai mi tai nga na ra ai. Ra kadawn ai ni hpe hkap hkalum la u. Shaloi, shanhte ni hpe Hkristu a tsaw ra myit jaw bang ya lu na,” ngu Wa Sarabyin Francis, hpang jahtum ginchyum dat sharin shaga da ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice

#popefrancis