Ukraine Mungdan Hta Majan Lai Shatai Nga Ai Hpe Wa Sarabyin Sadi Jaw

Wa Sarabyin Francis, Ukraine mungdan hta matut manoi byin nga ai majan hpe lawan jahkring na matu shadum da nga ai. Majan hpaw ai ni majan hpe lai len langai hku n galaw na matu sadi jaw da ai rai nga ai.

Majan hpe jahkring hkring shabyin ai ladat gaw mung masha ni hpe myit le le kau ya ai, myit hta hpa zawn n nawn mat na daram myit le le ya ai masa ung ang wa ai. Dai zawn myit hta hpa n nawn mat ai ten hta krau sha mayu ai ni, n hkru ai ni gaw dai majan hpe akyu jashawn nna nang mak law hpa ai hte galaw sha chye nga ma ai.

Dai Majaw, mung shawa masha ni dai hpe dum hprang ra ai. Majan gaw galoi rai tim, gara kaw byin tim n kaja ai.

Kam sham ai hpung masha ni dai hpe myit dum nga ra ai. Wa Sarabyin hkum nan kam sham ai ni gaw tinang a myit masin salum hta na nan majan n byin u ga matu ja ja akyu hpyi nga ra ai ngu shadum saw shaga da nga ai.

“Ukrain majan tsin-yam hkrum sha nga ai masha ni a lam ngai a myit masin salum hta pra pra mu nna hkam sha yawn nga nngai,” ngu Wa Sarabyin myit grai n pyaw ai hte tsun da nga ai.

Majan hpe hpa n nawn mat hkra jahkring hkring shabyin ai hpe madi shadaw ai ni, lam hpaw ya ai ni, garum ya ai ni, n-gun jaw ai ni, gara masa hku mi rai rai dai zawn galaw ai ni yawng hpe Wa Sarabyin ninghkap da ai.

“Chyeju hte ndai zawn re majan shabyin ai lam ni hte hkum alun hkum hta shangun ga; Simsa lam a matu shakut shaja let akyu mung hpyi nga ga,” ngu mung shadum saw shaga da nga ai.

Majan gaw sasana ma ni a ahkaw ahkang hpe pat shing dang ai lam tai nga ai. Shanhte a ahkaw ahkang hpe pat shingdang ai lam n mai galaw ai.

Lai wa sai “World Day Against Child Labour” shani, laban shani hta, Wa Sarabyin Francis, sasana ma ni hpe bungli galaw shangun nna dam jaw ai lam hpe mung n galaw na matu hpyi shawn da sai rai nga ai.

“Sasana ma ni, bungli shaja galaw ai gaw shanhte a matu sha n re ai, anhte ni yawng kaw hkra machyi wa na re,” ngu Wa Sarabyin matut shadum da ai.

2022 shaning a “World Day Against Child Labour” ga manoi gabaw gaw “Universal Social Protection to End Child Labour” ngu ai rai nga ai. Mungkan ting hta sasana ma ni hpe bungli hte dam jaw ai lam n nga u ga matu makawp maga na ngu ai rai nga ai.

UN kawn sawk shagawn da ai hte maren, 2020 shaning hta sasana ma asak manga (5) lahta na ni hpe bungli galaw shangun ai gaw mungkan ting hta rai yang wan (160) rai nga ai; la sha ma gaw wan (97), num sha ma gaw wan (63) rai ma ai lam chye lu ai.

By Fr. Patrick Gawmaw Hkawng Yae

#vaticannews

#rvakachinservice

#popefrancis

https://www.vaticannews.va/en/pope/news/2022-06/pope-francis-warns-against-getting-accustomed-to-war-in-ukraine.html