Mungkan Ramma N’htoi Hta Ap Nawng Garum Lai Wa Ai, Ap Nawng Ramman Ni Hpe Chyeju Dum Ai Lam Wa Sarabyin Madun Lai Wa

Panama Mungdan hta galaw lai wa sai Mungkan Ramma nhtoi poi kaba lamang shawang tsawra myit kaba hte magam bungle galaw garum lai wa sai ap nawng Ramma ni hpe chyeju dum ai lam Wa Sarabyin tsun dat nga ai hte, matut nna kabu gara mani sum sai myit man ni the sakse hkam sak hkrung hkawm sa nga ga nga nna Wa Sarabyin tsun dat nga ai.

Panama Mungdan a lam nmaw shagu hta nsam ahtoi re ai ap nawng palawng ni the hpring kaput mat nga ai hte, ndai ap nawng masha ni a mani sum sai myit man nsam ni a majaw  mung, poi sa du shang lawm ai sum tsan manam ni a pu ba ai lam ni hpe hkoi mat shangun nga ai, nga nna tsun let ap nawng ni yawng hpe grai chyeju dum ai lam lai wa sai laban shani Wa Sarabyin Francis tsun dat ai rai nga ai.  

Panama Mungdan hta galaw lai wa sai Mungkan Ramma nhtoi poi kaba de Mungdan shara makup kaw nna du sa nga ai sen lam the ru ai masha ni hpe garum lakawn ya ai lam ni galaw na matu Panama Mungdan kata na ap nawng 20,000 daram the kaga Mungdan ni kaw nna ap nawng 2,200 daram ap nawng lai wa ma ai rai nga ai.

Ndai ap nawng ramma ni hpe chyeju dum ai lam madun shaleng na matu, Rommel Fernandez ngu ai gawknu kaba hta shanhte a matu Wa Sarabyin kaw nna laksan Missa hkungga nawng ya lai wa ai, dai Missa hkungga hta ap nawng ni marai 15,000 ja shang lawm lai wa ma ai re, nga ai.

“Daw jau ap nawng ai magam bungli hte, sasana bungli ni hpe shawng galaw gun hpai mu, kaga ngam ai lam ni lu la wa na re, anhte yawng ra sharawng ai ban dung hpe lu la na matu yawng rau ta gin dun nna magam bungli jawm gun hpai galaw ai tha, pu ba yak hkak ai lam ni a lapran na kabu gara lam ngu ai hpe anhte hkam sha lu mai nga ai, kaji kajaw nmu mada lu ai magam bungli kaw na hkawt azin ayang garum galaw ya lai wa sai majaw nanhte yawng hpe grai chyeju kaba sai” nga nna ap nawng ramma ni hpe  Wa Sarabyin tsun dat nga ai lam Vatican shiga dap kaw nna shana dat nga ai.   

Source : Vatican News