Laban Mungga - Madu Yesu Lamu De Lung Wa Ai Poi ( Paska Ladaw Laban VII )

Paska Ladaw (7), C, 2022, Yesu Madu lamu de lung wa ai Poi

Karai Kasang A Hpung Shingkang

 Hkristu hta tsaw ra ai nu wa hpu nau ni e, ndai laban gaw (7) ngu na Paska ladaw laban rai nna, Yesu Madu Sumsing Lamu De Lung Wa Ai poi n’htoi rai nga ai.

Chyum Laika Sang Lang Daw

Ndai laban gaw Madu Yesu Sumsing Lamu De Lung Wa ai laban rai nna, dai lam tsum shagu anhte a myit gaw bum ntsa na Sanlun sun na mabyin hpe shingran pra mu lu ga ai. Bai hkrung rawt sai Madu Yesu Kasa ni a lapran, shanhte hpe matsun ga ni jaw da, shaman ga tsun da ngut ai hpang sumsing lamu de angwi ngwi sha lung wa ai. Dai hpang sumsing chyinghka hku shang nna Kawa Karai kasang e hkap hkalum la ai hpe Lamu Kasa ni shakawn shagrau nga ma ai. Yesu Madu hpe “hpan da hkrum nga yawng nga pra a Hkawhkam rai nga ai” ngu Lamu Kasa ni hte rau shinggyim masha ni, ndau let shakawn shagrau ma ai.

Ya tsun hkai dan nga ai gaw anhte a myit shingran ni rai nga ai. Raitim, Chyum laika hta tsun ai hte maren, ndai mabyin gaw kaja wa sha byin lai wa ai rai nga ai.

Ndai poi a yaw shada lam gaw Yesu Madu Kawa Karai Kasang hpang de bai lung wa ai lam hpe sumsing mungdan hta anhte hkum nan du lung wa ai shaloi teng man ai lam hpe hkrak chye na wa na hpe tsun ai rai nga ai.

Wenyi shadut ya ai a marang e, nawku hpung ndai poi hpe sha-ang gaw de da ai lam gaw (1) Kawa Karai Kasang shinggyim masha ni hpe hkye la ai amu a majaw Yesu hpe shakawn let chyeju kumhpa jaw ya na matu rai nga ai, (2) Hkristan masha ni Yesu Madu sharawng awng ai hkye hkrang la magam hpe matut gun hpai na matu rai nga ai.

Makam masham ga gaw anhte Hkristan ni a makam masham daju rai nga ai. Kasa ni kaw nna yu hkrat wa ai makam masham rai nga ai. Dai hpe “Apostolic Symbol” ngu mung tsun ma ai.

“Hkrung rawt sai Yesu Madu gaw sumsing lamu de lu wa nna Kawa Karai Kasang a hkra maga e hkaw dung nga ai.” Ndai gaw Kawa Karai Kasang hte rau nga nga ai hpe mung tsun ai. Yesu Madu sumsing lamu de lung wa ai shani, Kawa Karai Kasang gaw shi hpe arawng aya jan mau lahkawng ap jaw da ai ngu sumru la mai ga ai. (1) Npawt Nhpang kaw nna nga da chyalu rai nga ai Karai Kasang a hpung shingkang ahkaw ahkang (anhte hpe hkye la na matu mungkan ga de shinggyim hkum sa la ai shaloi, dai hpe raw da ai ngu tsun mai ai); (2) shinggyim hkum sa la nna Karai Kasang ap jaw da ai hkye hkrang la magam hpe hpring tup hkum tsup ai hku gun hpai lu ai kumhpa. Ndai jan mau lahkawng rai nga ai.

“Wa e, Ginding aga garai n lat kaw nna nang ngai hpe tsaw ra nga ndai majaw, ngai e jaw ai nye a hpung shingkang hpe ngai e ap ya da ai masha ni mu lu mu ga, ngai nga ai shara hta shanhte hpe mung nga shangun mayu nngai,” (Yh 17:24).

Yesu Madu sumsing lamu de lung wa ai lam gaw ndai mungkan hta asak htum mat ai shaloi, Nawku Hpung hta asak ningnan hpang ai lam hpe madun dan ai

Ndai laban na chyum laika hta Yesu madu sumsing lamu de lung wa ai lam lahkawng lang na lu ga ai; kalang gaw san Luka Kabu Gara Shiga Laika hpang jahtum hta rai nna, kalang gaw San Luka a kasa laika hta na galu ai hku na lu ga ai.

Kabu Gara Shiga hpe shawng ka ai hpang Kasa laika hpe ka ai re lam dan dawng nga ai. Tsun mayu ai gaw, Kasa Laika hpe Kabu Gara Shiga ka ngut ai hpang matut ka ai majaw tsun lu ai rai nga ai.

Lak lai ai lam (1) Yesu Madu sumsing lamu de lung wa ai gaw mungkan dinghta asak hte sak hkrung ngut sai lam madun ai. Mara dat hkyamsa ya ai lam hte wenyi asak hta sak hkrung na lam shinggyim masha shagu hpe hkam la lu shangun ai. (2) Nawku Hpung hpe Yesu Madu a asai hte hkam la lu ai mara dat hkyamsa lam hte htani htana prat ningnan hpe shinggyim masha shagu hkam la lu na ahkaw ahkang ap jaw da ai.

Chyum laika ni hpe hka ja yu yang sumsing lamu de lung wa ai lam hte seng nna tsun da ai n law ai hpe mau hpa mu lu na ga ai. San Mahte hte San Yawhan gaw dai lam hpe dan tawk n tsun da ma ai. San Marku gaw kadun dik ai hku sha tsun da ai. San Luka gaw anhte hti, na la lu ai hte maren kachyi mi sha re ai hku kabu gara shiga hta tsun da ai rai nna, kasa laika hta gaw grau dam lada galu ai hku tsun da ai hpe mu lu ga ai.

Raitim, Chyum laika shagu gaw Yesu Madu pru wa mat ai shaloi, kasa ni hpe, Kawa Karai Kasang gaw Shi hpe ap jaw da ai zawn, Yesu Madu gaw kasa ni hpe mung dai sasana magam lit ni hpe ap jaw da ai mu lu ga ai. Shinggyim masha ni hpe mara hta na shalawt ya na, mara dat ya ai lam ndau shana ya na matu matsun da ai. Shi a mying ningsang hta mara dat ya na ahkaw ahkang mung ap jaw da ai (Lk 24:47-48).

San Luka gaw Madu Yesu kasa ni hte hka nna sumsing lamu de lung wa ai lam hpe hkrak re ai mabyin masa sakse hte tsun da ai. “Dai hpang shanhte hpe mare kaw na Behteni kahtawng du hkra woi sa nna dai shara hta, shaloi, shi a lata ni sharawt nna, shanhte hpe shaman ya mu ai. Shing rai shanhte hpe shaman ya nga yang, shi shanhte kaw na hka mat wa nna sumsing lamu de woi shalun la hkrum wu ai” (Lk 24:50-51).

Ndai shaman ai gaw laklai ai shaman lam rai nga ai; masha langai a baw ntsa mara nna laksan shaman ai hpa rai nga ai. Shi hta nga ai hpung dagu, shing nrai, madu da lu ai hpung dagu mahkra hpe hti ya ai, shalai ya ai, jaw ya ai rai nga ai.

Hpan Madu gaw hpan da hkrum nga yawng nga pra hpe ap jaw ai kumla masat hku nna Adam yan Eve hpe shaman ya ai (Np.Nhp 1:28).

Isac gaw Yaku hpe shaman ya ai shaloi zai ladat shaw masu nna hkam la ai re ngu chye ai raitim, n dawm la kau ai sha kun dinghku hpe woi awn lu ai hkinghtawng aya jaw let woi awn shangun ai (Np.Nhp 27:28-29, 37).

Israel hkawhkam ni gaw shaman ya ai shaloi up hkang na ahkang aya hkap la ai ni hpe shalai ya ai. Dai hte maren kawa gaw si wa mahka e, kasha ni hpe, grau nna, kasha alat hpe shaman ya ai.

Ndai masa hku Yesu Madu gaw kasa ni hte garai n hka wa shi ai shaloi, Kawa Karai Kasang shi hpe ap jaw da ai galaw lu ai ahkaw ahkang hpe shalai ya ai, ap jaw da ai rai nga ai. Shawng de tsun dan sai masa lam ni hta tsaw grau ai hku shaman ya ai rai nga ai.

Chyoi Pra ai Wenyi ga sadi tawn da ai a marang e Yesu Madu gaw kasa ni kaw nna hka nna sumsing lamu de lung wa ai lam gaw kabu pyaw lam de galai shai ya na matu rai nga ai

“Shanhte chyawm gaw shi hpe nawku nna, grai kabu gara let, Yerusalem mare de bai wa nhtawm; Karai Kasang hpe shakawn kungdawn let, Nawku Htingnu e, tut nawng anga nga ma ai,” (Lk 24:52).

Yesu Madu shanhte kaw nna hka nna sumsing lamu de lung wa ai lachyum kasa ni hpe chye shangun mayu ai majaw rai nga ai ngu tsun ai gaw mau hpa n rai sana ga ai.

Madu gaw hka nna pru lung wa ai gaw teng man mabyin hta grau ai yaw shada lam rawng nga ai. Mungkan htum hkra shanhte hte rau, shanhte a lapran, shanhte hte rau nga nga na ra ai.

“Ngai nanhte hpe hkang da mada yawng hte hpe hkan sadik lu mu ga, shanhte hpe sharin shaga ya mu; dai hta kaga, lamu ga aprat htum hkra ngai nanhte hte rau dinggrin anga nga na nngai law, ngu nna shanhte hpe matsun dat mu ai,” (Mt 28:20).

Shawoi na hte shai ai masa nga ai raitim, kasa ni hte rau nga nga dingyang rai nga ai gaw teng sha rai nga ai.

Kabu hpa lam kaga langai gaw, “gade nna yang” (Kasa 1:5) Madu ga sadi tawn da ai “Wenyi gaw shanhte a ntsa yu hkrat wa na ra ai lam rai nga ai.

Yesu hkum nan hte Shi ga sadi jaw da ai Wenyi chyu sha shanhte n chye na ai lam hte gawng kya ai lam ni hpe chye na hkawn hkrang na matu hte shading sharai jahkum shatsup la lu na matu garum ya lu ai.

Yesu Madu gaw kasa ni hpe lit magam lahkawng ap jaw da ai: (1) Mungkan jut shara shagu hkaw tsun shachyam shabra ai Kabu Gara Shiga hpe matut hkaw tsun na matu (Lk 24:47; Mt 28:19-20; Mk 16:16) hte (2) Tinang a sak prat hte hkaw tsun ai tara mungga hpe tatut hkrang shapraw nna sakse hkam na matu (Lk 24:48; Kasa 1:8) rai nga ai.

Dai re majaw kasa ni hpe Wenyi gaw yaw shada lam lahkawng hte shangun dat na rai nga ai: (1) Mungkan ntsa hta sak hkrung nga pra ten Madu tsun lai wa ai lam ni hte galaw ai magam lam ni yawng a lachyum hpe chye na na matu (Yh 14:26; 16:13) hte (2) Kasa ni hkaw tsun ai hte maren, sak hkrung nga pra lu na matu hte Kabu Gara Shiga hkaw tsun ai hta atsam dat shakut shaja nna, byin mai yang, asak hpe pyi ap nawng kau na, n-gun jaw na matu rai nga ai.

Wenyi gaw kasa ni hte Hkristan ni Hkristu hpe grau chye chyang wa na hkra garum ya ai

Ndai laban na chyum daw lahkawng gaw, Hkristu hpe lani hte lani, grau grau chye na hkau chyap na gaw ahkyak ai lam, San Pawlu Ephesu ni hpe tsun dan ai rai nga ai.

San Pawlu gaw Hkristan ni hte tsan ai Roma mare hta hkyukhtawng hta sharawng da hkrum ai aten shagun laika hte sharin shaga ai lam rai nga ai. Ephesu mare na hpung masha ni hpe lahkawng ning laman Kabu Gara Shiga hkaw tsun lai wa sai hpe hkau chyap sai rai ma ai.

Shi gaw hkyuk kaw re majaw shawng na zawn kabu gara shiga sa hkaw tsun na n loi ai, n mai byin ai majaw shanhte a matu akyu hpyi ya lai wa ai. Shanhte a matu hpa hpyi ya lai wa ai rai? Shanhte a matu ra ahkyak dik ai lam ni hpe hpyi ya gaw teng sha rai nga ai. Ephesu mare masha ni hte prat shagu na Hkristan masha ni a matu hpyi ai rai nga ai.

Anhte a matu Hkristu jaw ai Kabu Gara Shiga hpe chye na na matu, Hkristu Madu a marang e hkam la lu ai manu dan chyeju kumhpa ni hpe manu shadan na matu, Karai Kasang a matsan dum lama, mara dat hkyamsa ya ai lam, Wenyi a asak nnan hte anhte a lapran anga nga ai lam, grau nna, Madu Hkristu a daw sha poi galaw ai hta anhte langai hpra ntsa myit shang sha lam nga ai hpe chye na na matu rai nga ai.

Kawa Karai Kasang gaw, sumsing lamu de lung wa ai shani, Kasha Yesu Hkristu hpe n-gawn tawa hpe up hkang ai Madu hku ap jaw ai lam, anhte hpe hpung hta shalawm la ai Nawku Hpung a hkyela Madu hte ningbaw shatai ai lam ni hpe sumru na matu mung rai nga ai.

Grau nna, matsan mayan yak hkak jam jau ai hpe hkrum ai shaloi, sumsing mungdan hta Hkristu Madu anhte a matu Karai Kasang kaw nna hkam la da ai laklai kumhpa hpe myit dum na matu rai nga ai.

San Pawlu gaw akyu hpyi ai a hpang jahtum yaw shada lam langai htet da ai. Yesu Madu gaw ningmu kaba ai wa, tsaw ra hpe lu ai wa, mau hpa laklai ai wa rai nga ai hpe chye na shangun mayu ai rai nga ai. Hkristu hpe chye ai rai yang mara a mayam prat hta hkawm sa lu na n rai ngu tsun ai rai nga ai. Wenyi chyu sha Madu hpe shani shagu chye na hte tsaw ra na matu garum ya lu ai gaw dan leng nga ai.

Yesu Madu gaw nni nkri hkam si hkam ai kaw nna masum ya rai yang bai hkrung rawt na lam tau nau tsun shana da ai. Kaja wa sha bai hkrung rawt ai mabyin sakse hpe Luka 24 hta masum lang tup mu lu ai. Lup wa kaw num sha ni hpe (Lk 24:6), Emauk de hkawm sa ai sape lahkawng (Lk 24:26), ntsa gawk kaw hpawng de nga ai kasa ni (Lk 24:16) ni hpe shadan dan ai.

Yesu Madu gaw anhte hte kasa ni hpe Yesu Madu hte anhte a nni nkri hkam ai a manu dan lam hpe chye na shangun mayu ai. Nni nkri lam a apu asi ni gaw Karai Kasang a tsaw ra myit hte hkap la ai rai yang, lak lai ai akyu langai gaw Hkristu Madu hpe lawan dik chye wa lu ai lam rai nga ai.

Chyoi Pra ai Wenyi gaw kasa ni hpe mung, anhte hpe mung sak hkrung nga pra let Hkristu Madu hpe sakse hkam na matu garum ya ai

Ndai lam hte seng nna Chyoi pra ai Wenyi yu hkrat wa ai poi, hpang na laban hta shang lang dan na hpe na lu na ga ai. Teng ai lam lahkawng gaw (1) n chye ai lam hpe galoi gara kaw mung sakse hkam n lu ai; (2) teng man ai Hkristan sak prat hte Hkristu Madu hpe sakse hkam ai gaw Madu kadai re ai hte shi a tsaw ra matsan dum ai lam hpe ginchyum ga hte mu lu na ga ai.

Akyu hpyi saga

Wa Karai Kasang e, Yesu Madu sumsing lamu de lung wa ai gaw anhte mungkan shinggyim masha ni hte rau anga anga nna sumsing mungdan hta ningngai nga lu na matu rai nga ai hpe kam sham let hpu nau ni hpe mung dai lam de woi ningshawng lu na atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw (7) ngu na Paska ladaw laban rai nna, Yesu Madu Sumsing Lamu De Lung Wa Ai poi n’htoi rai nga ai.

Hti ang ai Ja Chyum Mungga ni gaw

Chyum Mungga Daw (1) Kasa 1:1-11

Chyum Mungga Daw (2) Ehp 1:17-23

Kabu Gara Shiga  Lk 24:46-53

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.