Laban Mungga - Karai Kasang A Kaba La Ai Mara Dat Hkyemsa ( Lusha Gam Ladaw 5, C,2022 )

Lu Sha Gam Ladaw (5), C, 2022

Is 43:16-21    Hpil 3:8-14      Yh 8:1-11

Karai kasang a kaba la ai mara dat hkyemsa

 Hkristu hta tsaw ra ai nu wa hpu nau ni e, ndai laban gaw Lu Sha Gam Ladaw hta (5) ngu na laban rai nga ai.

Hpang na laban gaw Yesu Madu Yerusalem mare de shingkang shingwang hte shang wa ai “Kungla Shaman Poi” hte hpang ai Chyoi Pra ai Laban bat magam de shang wa sana rai nga ai. “Holy Triduum” ngu ai Chyoi Pra ai nhtoi masum tup nawku daw jau ai lam hpe dai laban bat mali, manga hte kru ya nhtoi ni hta galaw na ga ai.

Ndai gaw anhte a makam madung mabyin masa lam ni rai nga ai Yesu Madu a nni nkri, si hkam ai hte bai hkrung rawt ai lam ni hpe bai myit dum sumru hkam sha kam sham na matu rai nga ai.

Anhte gaw Karai Kasang a tsaw ra matsan dum ai lam hpe myit sumru ai a marang e myit ningnan prat ningnan hte sak hkrung nga sa wa lu na ga ai.

Ndai laban na Kabu Gara Shiga hta shinggyim nga sat nga sa lam hpe tawt lai ai myu shayi langai a lam hpe na la lu na ga ai. Shinggyim la sha law law hte myu shayi ni gaw hkum shan sai hte tawt lai ai myu shayi hpe jeyang dawdan nna hten run lam de shayawn na myit sharawng ma ai gaw Karai Kasang hte nhtan shai ai rai nga ai.

Yesu Madu chyawm gaw matsan dum lama myit kaba hte shinggyim masha ni hpe, grau nna nat sadan a lata kaw nna dai myu shayi hte rau shi hpe jeyang mayu ai ni hpe shalawt dat ya na myit sharawng nga ai.

Nanhte mara hta kadawng bang ai shaloi, myit hkum ru mu; Karai Kasang gaw nanhte hpe mara dat ya na matu hte ra kadawn ai n-gun atsam jaw bang ya na matu nanhte a makau e galoi mung rau nga nga ai, ngu Madu Yesu anhte hpe n-gun jaw ya ai rai nga ai. Mara lu ai ni hpe jeyang ai lam hkum galaw mu; shanhte hpe hkum jahprak mu; nahte a langai sha re ai myit lawm lam gaw Karai Kasang hpang de kaja dik lam hku gara woi shang wa na ngu ai rai nga mu ga, ngu Yesu Madu anhte shadum ai mung rai nga ai.

Yesu Madu hpe ninghkap ai ni a matu kaja dik ai ahkaw ahkang

Yuda myusha ni gaw kabu pyaw let galaw ai “sum” poi a yaw shada lam: (1) Palestine hta ahkyak tawn lu hpa shatai ai tsabyi ntsing galaw ai tsabyi si ni a matu Karai Kasang hpe chyeju dum na matu, (2) Israel myu sha ni gaaw dam lada zaibru pa layang kaba hta shaning mali shi (40) htawt sit nga hkawm ai hpe bai myit dum na matu rai nga ai.

“Sum” poi galaw ai shaloi ndai yaw shada lam ni hpe kaja wa hkam sha lu na hkra tinang dum nta makau hkan na hpun lakung lakying, hpung lap ni hte sum kasha galaw nna matsat (8) laman poi ngut ten du hkra nga ma ai.

Ndai “sum” poi hpe masha law law grai ra sharawng ma ai majaw law la ai masha ni gaw Yerusalem mare kaba de sa hpawng ma ai. Shana nsin sin maga de wan mang galaw nna pyaw pyaw rai masha kamawng ai poi galaw chye ma ai.

Ndai zawn re ai aten hta myu shayi, myu shadang, sum tsaw byin hkum shan sai shut hpyit mara hpe galaw shut chye ma ai hpe sawk sagawn la lu nga ai. Dai zawn re ai shut hpyi ai lam ni gaw kasu kabrawng byin chye ai rai nna myu shayi ni hpe jeyang daw dan na matu salang ni kaw shaga woi sa chye ma ai. Dai shut hpyit ai wa gaw dinghku de na matu mahtan da ai wa rai yang, Mawshe a tara hte maren nlung hte kabai sat na rai ma ai (Jaw Jau 20:10; Tara Jahprang 22:22-24).

Makam Hpung ningbaw ni gaw ndai shut hpyit mara hte seng nna, shanhte hkum nan jeyang daw dan na malai, Yesu madu hpe manghkang tam, mara jaw na yaw shada let ahkaw ahkang la ma ai.

Dai ten gaw Yesu Madu Jesamani sun, shing n rai, Betheni mare kaw nna du wa ai aten mai byin ai. Yesu Madu gaw nyem ai dum lahkum kaw sha dung let shawa masha ni hpe tara hkaw tsun lai wa ai. Shawa masha ni mung makau grupyin kaw sa du hpawng nna shi a tara mungga hpe madat hkam la ma ai. Dai shaloi makam hpung ningbaw ni gaw myu shayi langai hpe Yesu kaw gang dun sa wa ma ai.

Shi a shut hpyit mara hte seng nna, Mawshe tara nga ai hte maren, nlung hte kabai sat ra na kun, shing n rai, mara dat hkyam sa shangun na kun, ngu Shi a ningmu hpe hpyi ma ai.

Yesu Madu hpe hprawng lam, koi lam n nga sai ngu shanhte ni shadu ma ai. “Tara nga ai hte maren jeyang daw dan mu” ngu Yesu Madu mahtai jaw yang matsan dum lama chye ai wa mying hten na; si ari dam jaw lu ai Roma daru magam ahkaw ahkang lu ai ni hte mung manghkang byin lu ai. “Mara dat hkyam sa ya mu” ngu mahtai jaw yang Mawshe a tara hte dan dan leng leng nan nhtan shai na rai nga ai.

Yesu Madu gaw hpa mahtai mung n jaw ai sha shi a lata hte ga ntsa kaw laika ka taw ai. Shanhte a ga san hpe ahkyak n da ai hku nna grai wa laklai dan dawng ai lachyum n nga ai masat kumla rai yang rai na re.

Makam hpung ningbaw ni gaw Yesu Madu zim sha nga ai majaw mahtai n jaw lu sai ngu lachyum htai la ma ai. Yesu hpe mahtai jaw na matu kahtap sai ma ai. “Ndai zawn re ai numsha hpe nlung hte kabai sat kau lu na re, nga nna Mawshe a jep ai Tara hta anhte hpe matsun da mani ai, ya nang kaning ngu na ta?”, ngu nna shi hpe bai san ma ai (Yh 8:5).

“Shanhte shing nga kahtap nna bai san san rai ma ai majaw, shi rawt mada yu nhtawm, nanhte hta mara n galaw yu ai wa, shi hpe shawng nlung hte kabau mu, ngu nna shanhte hpe tsun mu ai,” (Yh 8: 7). Dai hpang, ga e bai gum nna ga hta ka mahkret nga ai.

“Tara hta ai shanhte mung dai ga na jang, yawng a shawng e asak kaba sai ni langai a hpang langai pru mat wa ma ai Shin rai Yesu hkrai sha hti nga ai hte numsha mung mi na shara hta naw tsap nga ai” (Yh 8:9).

“Dai shut hpyit mara a majaw ngai hta ra rawng ai ngu nna nanhte hta na kadai wa mahtang madun lu myit ta?” (Yh 8: 46).

“Anhte zawn lam shagu hta gumglau hkrum yu ti mung shut hpyit mara n galaw ai Hkingjawng Agyi Kaba she anhte lu ga ai,” ngu Hebrew masha ni hpang de shagun dat ai laika 4:15 hta sakse hkam da ai.

Yesu Madu gaw shinggyim masha ni a dingbai dingna jaw ai lam ni hte mara hta mara shagun ai lam ni law law hpe hkrum katut ai hte dai hpe hparan ra ai. Yesu Madu gaw mara n kap ai wa, n shut hpyi ai wa, anhte mahtang she shut hpyi mara lu ai ni rai ga ai ngu yin la ra ga ai. Mara n nga, n lu ai Yesu Madu gaw anhte hpe hkye hkrang la na ra sharawg nga ai.

Makam masham hpa-awn ni hte Yesu Madu myu shayi sha a ntsa mu mada ai ningmu

Mawshe Tara tawt lai ai myu shayi sha a ntsa Yuda ningbaw ningla ni hte Yesu Madu a myit la hkam la ai hpe shingdaw yu ga.

Yuda salang ni gaw a myit masa gaw dai numsha jeyang ai kaw nna lawt lu nna sak hkrung nga lu na, shing n rai, si ari dam hte si mat ra na hpe myit n shang ma ai. Shanhte myit lawm ai gaw kadai mung jahten kau ya n lu ai daru magam ahkyang aya grin nga na matu rai nga ai.

Shanhte gaw ndai ja dik ai Mawshe Tara rai nga ai mara dam jaw ai lam hpe htep lahti hkan shatup ai hpe madun mayu ma ai. Tsun ga nga yang, kaning re ai masing masa hte galaw ai lam shagu raitim, shanhte a tsang madang hpe shakawng dan na matu sha rai ma ai. Shanhte hta lai nna kadai mung ahkyak n re ai lam shawa masha shagu hpe chye shangun mayu ma ai.

Numsha a ntsa tsawn da ai Yesu a myit masa gaw Yuda salang ni a myit masa hte grai shai ai rai nna, tsawm htap dik ai myit masa rai nga ai. Mara lu ai dai numsha a matu Yesu Madu myit shang sha ai lam gaw shi hpe Kawa Karai Kasang de bai yin wa nna prat nnan hta sak hkrung sa wa na matu karum ya na lam rai nga ai.

Dai numsha gaw Yesu Madu a matu manu dawdan n lu ai sut gan langai rai nga ai. Kaning re ai maza ni hte matsat shabat rai nga tim, mai byin ai ladat hte jasan jaseng, shatsawp jahtap nna hkye la na matu rai nga ai.

Numsha gaw gaya ai myit hte shi a gaya myiman hpe makoi magap da ai. Kahti gari rai hkrit kajawng nga ai. Shi hpe jeyang na matu hpawng de nga ai ni langai ngut langai praw mat ma ai nna kadai n nga mat ai shaloi, shi lagat hprawng mat mai nga ai.

Raitim, Shi hpe makawp maga ai, shimlum lam jaw ai sara makau kaw nga nga mayu ai myit a gaw shi hpe ka-up da nu ai. Shi a myit hta, Yesu Madu a ntsa, ya, hpang, prat tup a matu kam hpa myit kaba tawn da ai. Yesu Madu, shi hpe myit malai nna prat nnan hpe galai shai kau wa ai.

Mara lu ai shinggyim masha hte mau hpa Karai Kasang a matsan dum lama ai lam man hkrum hkrum katut ai aten nga ai, ngu San Augustine tsun da ai.

Yesu Madu gaw myit malang ai hte loi ai hku, zen ai ladat rau manghkang hpe hparan shangut kau ai. “Nang hpe jeyang ai masha kadai n nga ma ai i”, ngu Yesu Madu san ai hpe “kadai mung n jeyang ma ai” ngu numsha bai htan ai hpang, “Ngai mung nang hpe n jeyang na nngai; wa nu, ya kaw nna shut hpyit mara bai hkum galaw nit,” ngu nna tsun dat wu ai (Yh 8:10-11).

Yesu Madu a ga si ni gaw shi a masin salum hta prat tup matsing mat hkra wan hte dem shakap da ya ai. Dai numsha hta shut hpyit mara kaw nna lawt lu ai hkam sha na gaw dan dawng nga ai.

Dai numsha hpawng de gara hku rai wa na kun

Dai numsha a hpang daw na prat hpe anhte chye mayu ga tim, labau n nga ai majaw hkrak n chye lu ga ai. Chyum laika hta, nkau masha ni a labau hkring mi sha dan pru nna lagaw hkang pyi n mu hkra mat mat ma ai.

Ndai numsha a lam hpe n shut n shai ai hte anhte tsun lu ai lam nga nga ai. (1) Ndai numsha gaw Yesu Madu hte hkrum ai hkam sha lam a majaw shi a ngam nga ai prat hta agung alau dingbai dingna ni hpe tawt lai lu ai. Shi a prat hta agung alau, dingbai dingna nnan ni hpe bai hkrum katut na gaw teng sha rai nga ai. Raitim, Yesu Madu hte hkrum nna Madu a matsan dum lama ai tsaw ra myit hte n-gun jaw ga ni a majaw n hkru n kaja ai lam ni hte hkrum ai shaloi dingbai dingna agung alau hpe dang manga kau lu ai atsam shi hta nga nga ai.

“Wa su, ya kaw nna mara hkum galaw nit” ngu Yesu Madu tsun ai ga hpe chyahkring hkring bai shingran mu, na taw nga na re. Yesu Madu a mtsan dum lama ai tsaw ra myit hte hkrum katut ai gaw, shi a matu, nat sadan hpe gasat ai hta kaja dik htum ai laknak rai nga ai.

Shi gaw mara hte hkrat sum taw nga ai ni hpe shawang myit kaba hte chye na, myit galu kaba ai hte, matsan dum lama ai tsaw ra myit nga nga na rai nga ai.

Dai numsha hpe zawn masha langai ngai hpe jeyang daw dan ari dam jaw na matu nang hpe shalawm la hkrum jang gara maga hku shang lawm na rai?

“Masha ni hpe hkum jeyang mu, tara hkum hta mu; hkum jahprak mu” ngu Madu Yesu hkang da ai (Lk 6:36-37).

Lai sai prat labau hta na mabyin hpe madung n yu ai sha, ya na ndai naten hta kaja dik ahkaw ahkang hpe jai lang nna Hkristu Madu jaw ya ai hkye hkrang la ai lam hpe hkam la lu hkra shakut ra ai

Chyum daw lahkawng hta, San Pawlu gaw shi hkum hpe shi hpang jahtum kaw lagat dat ai lagat shingjawng hta lawm ai masha hte shabung la ai. Lagat shingjawng hta lawm ai masha ni gaw shanhte gade daram lagat kau sai hpe hpang de bai n yu ai sha, ngam nga ai shawng lam hpe sha madung da ma ai. Shawng kaw nga ai kumhpa hpe hkam la lu hkra matut manoi lagat ma ai.

“Dai kumhpa ngai hpe jaw na matu Hkristu Yesu gaw ngai hpe jum magra la kau ni ai hte maren, dai kumhpa hpe ngai nan jum magra la lu hkra shakut shaja dingyang rai nga nngai,” ngu San Pawlu tsun ai (Hpil 3:12).

Anhte mung dai hte maren tsun lu ga ai. Hkristu gaw anhte a hpang jahtum hkam la lu na kumhpa hte anhte hpe makam masham hte saw shaga nga ai. Anhte myit kaji nga n ra ai.

Anhte chye ai lagat shingjawng poi hta gaw masat langai kumhpa hpe marai langai sha lu mai ai. Hkristan prat hta sak hkrung ten lagat shingjawng ai a langai sha re ai galaw ra ai gaw nau hpa kumhpa a matu teng man tara hte maren lagat na matu sha rai nga ai. Dai teng man tara lam hta lagat ai Hkristan masha shagu mare mara sha re ai kumhpa hpe hkam la lu na rai nga ai.

Lai sai sak prat hta kaning re ai mara a majaw hkrat sum lam kaba nga tim malap kau mu. Karai Kasang gaw yawng hpe mara dat ya sai rai nna, dai hpe mung bai n htai lai ya sai. Mara dat hkyam sa chye ai Karai Kasang a kaba la ai matsan dum lama ai tsaw myit hpe sha myit dum dat mu.

Nang galaw shut kau ai mara dat hkyam sa hkam la lu sai shut hpyi ai lam ni hpe pyi bai hkum sumru sa. Maroi nni masin nsi hkum rai nga sa. Karai Kasang a karum ya ai chyeju hte malap shaprai kau mu.

Nang galaw ai mai kaja lam ni hta Karai Kasang a mai kaja ai lam gaw grau kaba ai hpe matsing sumhting da mu.

Hkristan prat hte sak hkrung ai prat hpe galoi hkum myit htum; asum hkum jaw; kalang marang shut kataw chye ai majaw mung myit hkum htum mu; lawan dik bai rawt nna lagat mu; Hkristan prat hpe hpring tup ai hku hkam la sak hkrung mu; makau grupyin hta tsawra myit hte gat hkai mu; Hkristu Madu hkum nan na a matu kumhpa rai nga ai.

Akyu hpyi saga

Wa Karai Kasang e, shut hpyit ai wa ngai hpe matsan dum la mi law. Hkristan sak prat hta sak hkrung let Hkristu Madu kumhpa hpe hkam la lu shangun ya law. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Lu Sha Gam Ladaw hta (5) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Is 43:16-21

Chyum Mungga Daw (2) Hpil 3:8-14

Kabu Gara Shiga Yh 8:1-11

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.