Wa Jau Mahte Mwihpu Nawng Lat A Jau Tai Wa Ai Hkam Sha Lam Hte Shaga La Hkrum Ai Lam

March 22.2022  ya shani Panghkak jau ginwang, Loije Muklum na St. Paul nawku jawng wang kaw Manmaw Saradaw ginwang up Wa Saradaw Raymond Sumlut Gam a lata hta htani htana jau aya hkam la sai Wa jau nnan Mahte Mwihpu Nawng Lat gaw Panghkak jau Ginwang, San Francis Sara ninghtawn, Kawng Hkam mare kaw shanu nga ai Slg. Raymond Mwihpu Gam hte Jan. Rita Labang Hkawn Mai yan a kasha rai nga ai.

Jau nnan tai wa ai shani na hkam sha lam hpe tsun dan ai hta jau nnan tai wa ai majaw n chye tsun dan ai zawn nga kabu ma kabu ai, grai ma pyaw ai zawn nga hkam sha ai. Bai nna maga mi de bai myit dat ga nga yang, jau langai a magam bungli hpe bai myit dat yu ai shaloi grai lit li ai zawn nga nna mung hkam sha ai.

Jau langai tai wa hkra shaga la hkrum ai lam hpe kadun ai hku tsun ga nga yang, kaji ai ten wa jau a kanu yan kawa gaw nat jaw re. Raitim kasha ni yawng hpe kashin kamun hkam ya ai. Wa jau  Nawng Lat hpe mung asak laning mi jan re ai aten kashin kamun hkam ya sai. Kanu yan kawa gaw wa jau tsang ( 10 ) awng ai hpang she kashin kamun hkam nna Kahtawlik makam masham de shang wa ai rai nga ai.

Kaji ten kanu yan kawa mung nat jaw re majaw shannau ni mung  nawku jawng nsa ai. Rau ai ten kahtawng hkan nga rem nna nga ai. Raitim tsang ( 7 ) du ai shaloi Panghkak kaw dabang sa lung ai. Dai aten kaw nna mara raw chyoipra hkum lu hpang sai. Tsang ( 8 ) shaning gaw Manmaw San Columban bawda de bai sa nga ai. Dai shaloi she jau ni law law mu nna n gun lu wa ai, kalang lang jau ni grai law zup ai hpe mu ai shaloi grai yu sharawng wa ai. Jawng dat ai aten hta manang ni jau tai jawng sa na nga tsun ai shaloi wa jau a myit hta mung jau tai jawng sa mayu ai myit ni rawng wa ai majaw  kanu yan kawa hte dai ten na ginwang up jau rai nga ai, Wa Jau Patrick Jangma Tu Shan hpe wa tsun dan ai. Wa jau mung mai ai nga tsun nna madi shadaw ya let Myitkyina jau tai jawng kaji de sa bang da ai. Dai kaw nna jau tai na prat hkrun lam hta shakut shaja let ya na zawn jau langai tai wa ai rai nga ai.

Jau langai hku nna sak hkrung hkawm sa wa na lam ngu ai hta jau prat a matu lata da ai Chyum Mungga daw ( Mt 10: 45 ) hta na “Masha kasha wa pyi shangun ma hpe yam sha na matu du sa ai n rai, shangun ma amu hpe galaw daw na nga nna du sa ai” nga ai hte maren Madu Yesu Hkristu gaw daw jau na matu she du sa ai, shi hpe daw jau hkam na matu du sa ai n re, ngai na jau magam prat hta mung mai byin ai daram hpung masha ni hpe daw jau ai hta shakut shaja mayu ai a majaw jau tai mayu ai rai nga ai.

Daini na ngai a jau shatai poi hta n du shang lawm lu ai raitim shara shagu kaw na akyu hpyi garum ya sai hpung masha kaji kaba, ji nban yawng hpe grai chyeju dum ai. Ngai gaw ya she jau n nan tai wa ai re majaw du wa na aten hta mung ngai hpe madi shadaw la marit, ra ai lam shagu hta garum la marit,  shut ai lam ni hta mung shading sharai ya let galoi mung akyu hpyi garum ya marit nga nna saw lajin dat nga ai.

Panghkak jau ginwang hta Karai magam gun Wa Saradaw hte jau tai wa ai ni gaw Wa Saradaw Francis Daw Tang, Wa Saradaw Raymond Sumlut Gam, Wa Jau Peter Malang Nawng Maw, Wa Jau John Dashi Naw Lawn, Wa jau Patrick Jangma Tu Shan, Wa Jau Matthew Mwihpu Grawng hte jau nnan yan rai nga ai Wa Jau Peter Lahpai Hkun Nawng, Wa Jau Mahte Mwihpu Nawng Lat ni rai nga ma ai.

Shiga - Julia Ja Ing