Wa Sarabyin: March 2 Ya Shani Ukraine Mungdan Simsa U Ga Matu Lusha Gam Akyu Hpyi Ga

February 23, bat masum ya shani, Wa Sarabyin Francis, du na March 2, Wanwu chya lusha gam shang ai shani, Ukraine mungdan a matu lusha gam akyu hpyi ya ga ngu Mungkan masha yawng hpe hpyi shawn saw shaga da nga ai.

March 2, wanwu chya ai bat masum ya shani hpe Ukraine Mungdan Simsa U Ga Matu akyu hpyi nhtoi masat ai rai nga ai.

Ukraine mungdan hta ya na zawn majan byin nga ai hpe na ai hte nan myit masin hta ju ju hkam sha kaba ai zawn nga ai, ngu Wa Sarabyin myit grai n pyaw ai lam tsun da ai.

Hpyen majan hpaw sai lam, dai hpyen majan grau grau laja wa na lam shadi jaw shana ai lam gaw grau grau law wa ai majaw tsan shara kaba rai nga ai ngu mung Wa Sarabyin tsun shadum da ai.

“Ya kalang mi bai, anhte a simsa lam hte akyu kaba lam hpe jahkrit shama wa nga sai; mung masa lam galaw ai ni hta simsa lam a Madu Karai a man hta myit sumru dinglit akyu hpyi nga na lit mung nga ai; Anhte a Karai gaw majan a Karai n re ai, simsa lam a Karai she re ai, hpyen hta lai nna hpu nau ngu myit la ai masha n kau ni a matu sha kawa kaw tai nga ai n re ai, yawng a kawa rai nga ai, ngu Wa Sarabyin sharin shaga da ai.

Simsa lam a matu lusha gam akyu hpyi ga

Hpung shawa masha ni hte hkrum shaga ai hta ya na zawn tsun dan let, Wanwu chya bat masum ya shani, March 2 ya hta, lusha gam akyu hpyi na matu, dai gaw Ukraine mungdan simsa lam lu na matu yaw shaga na rai ga ai, ngu shana shabra da nga ai.

“Kam sham ai hpung masha ni hpe ngai n-gun jaw dat lu nngai; dai shani hta ndai yaw shada lam hpe ahkyak la nna lusha gam akyu hpyi nga ga; n hkru ai, zai ai, mana bu ai hte majan shabyin ai mungkan ga kaw na anhte hpe Simsa lam a hkawhkam jan mung makawp maga ya u ga law, ngu akyu hpyi nhtoi hte yaw shada lam hpe ndau shana ya let Wa Sarabyin hkum nan dai shani, akyu hpyi htinglu htinglai da ya nga ai.

Russia ni gaw Ukrain hpe gasat hpang ai re lam BBC Myanmar hte RFA Myanmar shiga dap ni kawn ndau da ma ai. U.S, Eurpean Union, Britain, Australia, Canada, hte Japan mung dan ni gaw Russia hte matut manoi ai sut masa lam ni hpe, grau nna majan hpaw ai hta woi ningbaw ai ni a sut masa lam ni hpe pat hkum da hpang wa ma sai hte matut manoi sawk sagawn nna mung majan hte seng ai hta lawm ai ni a sut masa lam, grau nna gaw, gumhpraw dum (banks) ni hpe pat da magang nga sai rai ma ai lam mung BBC Myanmar hte RFA Myanmar shiga dap kawn ndau ai hta chye lu ai.

Ndai majan gaw sinna mungdan ni hta kaba wa na majan tai wa na hpe mung myit tsang nga ma ai lam chye lu ai.

Ukraine mungdan hpyen hpung ni kaw nna ndau ai hta, hpyen la langai si mat sai rai nna marai 6 gaw hkala kaba hkala ai lam chye lu ai.

Ukrain mungdan gumsan magam Volodymyr Zelenskiy kawn daw dan aming jahkrat dat sai hte maren Asak 18-60 lapran na Ukrain mung shawa masha ni gaw hpyen tai na matu laknak lang hpyen la tai nga sai lam mung chye lu ai.

U.S gumsan magam Uoe Biden hte Russia gumsan magam Putin yan ndai laja lana byin nga ai masa hte seng nna hkrum bawngban na matu aten lata nga n mai sai ngu U.S the White House hta lit la hpung ni tsun shadum da ma ai.

By Fr. Patrick Gawmaw Hkawng Yae

#vaticannews

#bbcmyanmar

#rfamyanmar

#rvakachinservice

https://www.vaticannews.va/en/pope/news/2022-02/pope-announces-2-march-as-day-of-prayer-and-fasting-for-ukraine.html