Laban Mungga :Hkristan tsaw myit gaw Karai a tsaw myit hte maren sha rai nga ai ( Pranwan Ladaw VII, C )

 Pranwan ladaw (7), C, 2022

Hkristan tsaw myit gaw Karai a tsaw myit hte maren sha rai nga ai

1Hk.Hk Labau 26:2,7-9,12-13, 22-23   1Kor 15:45-49   Lk 6:27-38

Hkristu hta tsaw ra ai nu wa hpu nau ni e, ndai laban gaw Pranwan ladaw hta (7) ngu na laban rai nga ai.

Chyum Laika Sang Lang Ai Lam

Ndai laban na Kabu Gara Shiga gaw lai wa sai laban na bum ntsa hkaw tsun ai mungga matut ai rai nga ai. Madu Yesu a ‘alu ai hte seng ai’ mungga gaw na lu ai ni hpe mau kahpra shangun ai rai yang, “tinang a hpyen wa hpe tsaw ra ra ai,” (Lk 6:27) ngu gaw na lu ai ni yawng hpe grau nna pyi mau kahpra kajawng shangun na gaw teng sha rai nga ai.

Ndai gaw mara dat hkyemsa ai hte seng nna ya du hkra n chye na shi ai ni hte n htan shai ai tara ningnan rai nga ai.

Makam hpung shagu hta kaja ai sharin shaga lam ni hpe mu lu ga ai. Raitim, Yesu Madu a tara rai nga ai, “hpyen wa hpe tsaw ra na lam” gaw gara makam hta mung sung sung tam sumru yu yang n mu mada lu ai, Yesu Madu chyawm gaw dai lam hpe asan sha tsun da nga ai, nga nna Loikaw Saradaw ginwang, Saradaw Stephen Tjehpe a mungga laika buk hta tsun da ai.

Matsan mayan ni hpe, kaw si hpang gara hkrum ai ni hpe, zingri zingrat hkrum ai ni hpe, Karai Kasang a ja mungdan kaw na sumsing sutgan hkam la lu na ga sadi hku nna jaw da lai wa ai. Tsun mayu ai gaw, tinang hpe matsan shangun ai ni, hkrap ngu hkrap ngoi shangun ai ni, zingri zingrat di ai ni yawng hpe tsaw ra na lam rai nga ai.

David hkawhkam a laklai ai myit galu kaba ai kasi

Chyum daw langai hta David hkawhkam a myit masa tsawm htap ai lam hpe mu lu ga ai. Goliah hpe sat kau ai ten kaw nna hkawhkam wa a hpyen hpung hta magam gun nga ten, Sawlu hkawhkam wa hpe n hkru ai myit hte hpa mung n galaw lai wa ai. Hkawhkam a ntsa sadi dung let hpyen majan gasat ai shaloi shi a asak hpe pyi n lahpawt ai sha shakut gasat lai wa ai. Raitim, hkawhkam Sawlu a manawn masham ai myit gaw David hpe dingbai dingna byin shangun ai hte jam jau law law jaw lai wa ai.

Sawlu hkawhkam wa David hpe sat na matu hpyen hpung ni hte shawng lam de du taw ai shaloi, David gaw Sawlu hpe sat kau na lam lu ai raitim, n sat ai sha, Arbisha gaw hkawhkam Sawlu hpe nhkyi hte galun sat na matu David kaw ahkang hpyi ai ten, n sat na matu pat hkum da ai.

Sawlu hkawhkam hpe Yaweh Karai Kasang hkum nan Israel myusha ni a hkawhkam tai na matu sau hte chya da hkrum ai wa re majaw n sat na matu pat hkum da ai mung rai nga ai.

Samuel laika langai hta Yaweh Karai Kasang gaw Sawlu hpe sau hte chya ya na matu Samuel hpe hkang da ai (1Hk.Hk 10:1). Dai hpang gade nna yang Israel myusha ni a hkawhkam ngu ndau ya ai (1Hk.Hk 11:15).

Raitim, gade nna yang Sawlu gaw Yaweh Karai Kasang hte Samuel hpe n madat n mara ai majaw Karai Kasang e kau da ai hkrum mu ai (1Samuel 15:35).

Yaweh Karai gaw Samuel hpe Bethelehem de shangun dat nna Sawlu a malai David hpe Israel myusha ni a hkawhkam shatai na matu sau hte chya shangun ai. Sau chya hkrum sai David gaw dai hpe ahkaw ahkang n la ai sha Sawlu hkawhkam a ntsa sadi dung nga lai wa ai.

David a myit galu kaba ai gaw shakawn hpa kaba rai nga ai. Hpa majaw nga yang dai ten gaw matai htang ai hpe madung galaw jai lang ma ai hte dai hpe manu shadan ma ai. Hpyen wa hpe hkyamsa jaw ai gaw mana ai, angawk ai ngu hkam la ma ai hte tinang a matu mung shinlam n nga, dingbai dingna bying shangun ai tai nga ai majaw rai nga ai. David a myit masa gaw dai ten na masha ni hkap la hkam la ai myit masa hte shai nga ai. Raitim, Karai Kasang sharawng awng ai myit jasat rai nga ai.

Yesu Madu a tara “hpyen wa hpe tsaw ra u!”

“Hpyen wa hpe tsaw ra mu” ngu ai gaw Yesu Madu a dan tawk re ai tara rai nga ai. “Nye a mungga hpe madat la nga ai nanhte hpe ngai tsun made ga, nanhte a hpyen ni hpe tsaw ra mu, nanhte hpe n dawng n yawt ai ni hpe kaja ai hku galaw mu,” (Lk 6:27).

Yesu Madu a tara lam gaw shut shai lam n nga ai, shinggyim masha yawng a matu rai nga ai. Anhte a tsaw ra myit gaw hpyen ni hte yawng mayawng hpe tsaw ra na matu rai ra ai.

Nihtep ai ni yawng hpe tsaw ra ai gaw kadai hpe raitim shangam da n mai ai rai nga ai. Hpyen kaba hpe shangam da ai mung Yesu Madu a tsaw ra tara ting hpe shut kau sai rai nga ai.

Kun dinghku masha, myu bawsang ni hte manau manang, kahpu kanau ni hpe tsaw ra na gaw shinggyim masha shagu chye na hkawn hkrang ma ai. Manang langai hpe sadi n dung shut hpyi ai rai yang kadai masha wuhpung wuhpawng hta mung, kadai makam masham hpung hta mung shut shai ai lam re ngu hkap la hkam la ma ai.

Yuda myusha ni hta, nihtep ai ni, kun dinghku masha ni hte manaw manang ni hpe tsaw ra ra ai tara nga ai. Raitim, Israel myusha bawsang ni kata sha masat da ma ai. Yuda myusha ni gaw Israel myusha n re ai kaga myusha ni hte Israel myusha ni a mungdan hpe jahte tam wa ai ni yawng hpe gaw n ju n dawng ma ai. matai htang na matu mung n gun jaw karum la hkat ma ai.

Yesu Madu a “hpyen wa hpe tsaw ra mu” ngu ai tara gaw dai zawn ginhka ai lam hpe shaprai kau ya ai. Anhte gaw anhte hpe hkra machyi shangun ai ni hte sha n-ga, yawng hpe tsaw ra na lit nga ai.

Tinang a hpyen wa hpe tsaw ra ai lam gaw matai htang ai lam hpe hkum pat da ai.

Mawshe a tara hte maren, hkra machyi ai lam langai ngai nga wa yang matai htang ai lam hta ra ai hta lai jan n mai galaw ai. “Asak a matu asak, myi a matu myi, wa a matu wa, lata a matu lata, lagaw a matu lagaw, wan hkru ai wa a matu wan hkru ai, hpye ai a matu hpye ai, shingna hkang a matu shingna hkang, ari jaw ai hkrum lu na rai wu ai,” (Pru Mat wa ai 21:24-25). Dai prat hta gaw tara upadi kaw masat da ai hte maren hkan shatup ma ai. 

Yesu hpe madat mara ai ni gaw dai aten na htung tara ni hpe na jang mau na gaw teng sha rai nga ai.

Nang hpe n ju n dawng ai ni hpe atsawm sha hku hkau kanawn mazum mu. Nang hpe matsa mawa ga tsun ai ni hpe akyu ara ga tsun mu. Nang hpe n hkru ai hku kanawn ai ni yawng a matu akyu hpyi ya mu (Lk 6:27-28).

Na a shabyi maga mi bye ya ai wa hpe kaga maga de mung ja ya u; na a kata palawng la kau ya ai wa hpe na a ntsa palawng hpe mung jaw u; na a sutgan arung arai hpe zing la kau ya ai wa kaw na hpa mung bai hkum hpyi u (Lk 6:29-30).

Hkristan ni tsaw ra myit gaw Karai Kasang a tsaw ra myit hte bung ra ai

Yesu tsun ai, Karai Kasang gaw ka ja ai ni hpe rai tim, n hkru n kaja ai ni hpe rai tim yawng hpe tsaw ra ai (Lk 6:35). Galoi mung tsaw ra ding yang rai nga ai. Karai Kasang ngai hpe n tsaw ra mat sai ngu tara hta, tsun lu ai kadai n nga ai.

“Nanhte a hpyen ni hpe tsaw ra mu; nanhte hpe zingri ai ni a matu mara akyu hpyi ya mu. Shing rai yang gaw, sumsing lamu e nga ai nanhte a Kawa a kasha ni nanhte tai na marin dai; hpa majaw nga yang, shi gaw n kaja ai ni hte kaja ai masha ni a ntsa e maren sha shi a jan hpe shi mai ya nga ai rai nna, kaja ai galaw ai ni hte n kaja ai galaw ai ni a ntsa e marang jahtu ya mu ai (Mt 5:44-45).

Karai Kasang a tsaw ra gaw tinghkrai a matu kachyi mi pyi n re ai. Kadai kaw na mung manu jahpu n myit mada ai; hpa majaw nga yang Shi hpe kadai mung bai htang jaw na lam n nga ai. Yesu Madu gaw anhte hpe mung Shi zawn galaw na matu saw shaga nga ai. Manu jahpu hpe n myit mada ai sha mai kaja lam hpe galaw ga. Anhte a tsaw ra myit hpe n ju n dawng ai hku htang ai ni hpe tsaw ra ga.

“Nanhte a Kawa Karai Kasang matsan dum chye ai hte maren, nanhte mung matsan chye dum mu. Masha ni hpe hkum jeyang myit, shaloi she Karai Kasang mung nanhte hpe n jeyang na ra ai, masha ni hpe mara hkum shagun mu, shing rai yang, Karai Kasang mung nanhte hpe mara n shagun na ra ai. Masha ni hpe mara dat ya mu, shaloi Karai Kasang mung nanht hpe mara dat ya na ra ai (Lk 6:36-37).

Kadai hpe raitim ngu ai hta “hpyen wa hpe mung tsaw ra ai” gaw laklai ai akyu chyeju hkam la lu na

 Hpyen ni hte rau masha shagu hpe tsaw ra ai hta manu jahpu n myit mada ai sha tsaw ra na matu saw shaga ai gaw anhte a tsaw ra gaw akyu n hkam sha lu ai hpe tsun ai gaw n rai nga ai. Kachyi mi sha hkam sharang ai raitim, akyu ara gaw shadawn n ma, jahta n ma hkam la lu na ga ai.

Lusu nga mai ai ni mung matsan mayan rai ma ai. Grai nan matsan mayan rai ma ai. Chyeju dum chye ma ai rai tim, hpa hte mung teng man tsaw ra hpe tup hkrak bai htang jaw lu na n rai.

“Masha ni hpe jaw mu, shing rai jang Karai Kasang mung nanhte hpe jaw na marin dai, kaja wa hpring kabrat anin garin nna teng man ai dang hte nanhte a lata hta hkap la lu ai made ru jaw bang ya na ra ai (Lk 6:38).

Anhte sumsing mungdan du ai shaloi, mau hpa hkrum lu na lam lahkawng gaw (1) nihtep ai ni hpe tsaw ra ai a marang e, anhte ni gawng ngwi ngwi rai galai shai wa nna Karai Kasang hte bung wa ai, (2) anhte a tsaw ra myit a majaw, Karai Kasang lajang da ai kumhpa gaw kaga n re ai, Karai Kasang hkum nan a hkrang bung sumla langai ngai rai nga ai.

Akyu hpyi saga

Wa Karai Kasang e, hpyen ni hte rau mungkan masha yawng hpe tsaw ra ai a marang e nang madu a sumsing mungdan hpe karan kachyan lu na chyeju atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (7) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1)  1Hk.Hk Labau 26:2,7-9,12-13, 22-23  

Chyum Mungga Daw (2) 1Kor 15:45-49  

Kabu Gara Shiga Lk 6:27-38

Ndai Ja chyum mungga ni hpe hti nna hpawtni na nawku daw jau lamang ni hpe woi awn nga ga!