Laban Mungga: Shaga La Ai Lam Amyu Myu (Pranwan Ladaw 5, C)

Pranwan ladaw (5), C, 2022

Is 6:1-8   1Kor 15:1-11   Lk 5:1-11

Shaga la hkrum ai lam amyu myu

          Hkristu hta tsaw ra ai nu wa hpu nau ni e, ndai laban gaw Pranwan ladaw hta (5) ngu na laban rai nga ai.

Chyum Laika Sang Lang Ai Lam

Kahtawlik Nawku Hpung hta Jau ni hte Tara Hkaw Sara ni a magam lit ni gaw hpa rai ta? Shanhte hpe ap jaw da ai magam lit hpe sadi dung let magan gun lu hkra Karai Kasang gara hku garum ya nga ai rai?

Myihtoi Isiah a shaga la hkrum ai lam

“Chyoi pra, chyoi pra, chyoi pra! Chyahtum chyalai n-gun rawng ai dai Madu gaw chyoi nga ga ai! Shi a hpung shingkang gaw mungkan ga hta hpring nga ai,” (Is 6:3).

Ndai gaw, Yerusalem Htingnu hta Karai Kasang hpe shakawn kungdawn nga ai hpe Myihtoi Isaiah shingran mu ai hpe tsun dan da ai rai nga ai. Shanhte gaw Karai Kasang a hpungshingkang hte Shi a tsaw htum ai hpe mu ai majaw Karai Kasang hpe hkrit hkung ga ma ai hte shakawn shagrau ma ai.

Yerusalem Nawku Htingnu kata na Nawku Tawn langai hpe Isaiah mu ai. Dai Nawku Tawn ntsa aten tup wan hkru nga ai. Isaiah gaw dai nawku tan kaw hkru nga ai wan hpe la nna shi a nten kaw ahtawk hkra la ai. Dai shaloi, kaw nna, Karai Kasang shi hpe kabu gara shiga gun sa ai wa shatai la na matu shaga la ai rai nga ai.

“Dai hpang Madu gaw, ngai kadai hpe shangun dat na i. Kadai wa anhte a shiga htawn ai wa tai na kun, ngu nna tsun ai ga hpe ngai na nngai” (Is 6:8).

Yesu Madu Petru hpe kasa langai mi hku shaga la ai lam

Yawdan hka hkinggau hta Yesu hpe hkrum yu ai, Andrew gaw Simon hpe Yesu hpang de woi sa nna jahkrum ya ai. Dai shaloi Simon gaw ga hkaw mi mung n tsun ai.

“Yesu gaw shi hpe hkap yu nna, nang gaw Yawhan a kasha Simun rai nga ndai; rai ti mung nang hpe Petru (Kepha-lachyum lungrawk) ngu shamying ngu wu ai,” (Yh 1:42). Simun hpe Yesu, Shi shaga la ai ten kaw nna nan Petru ngu galai shamying ya ai lam Chyum Laika Sara San Yawhan sakse hkam da ai.

Yesu gaw Petru a hkali hpe shap la nna, shawa masha ni hpe dai li kaw na mungga htawn tsun ai. Simun Petru gaw Galilee hka nawng hta nga hkan kan bau sakhkrung nga ai wa rai nga ai.

Yesu gaw Petru hpe shi a nga sumgawn hpe sung grau ai hka de sit nna gabai bang na matu tsun ai. Petru gaw lai wa sai shana tup nga hkwi tim nga n lu rim ai majaw myit htum nga ai. Dai ten, dai Galilee hka nawng hta shani aten nga hkan ngahkwi ai gaw lachyum n pru ai.

Laksama kun dinghku hte nga kaba wa ai Yesu Madu a labau hta nga n hkan nga n hkwi yu ai. Raitim, nga hkan nga hkwi ninghkring Simun Petru gaw Yesu a matsun hte maren, sumgawn kabai bang dat ai hte nga law law magawn la lu ai. Nga nau law ai majaw sumgawn je na danram rai wa ai hte hka hkinggau kaw na ni hpe garum hpyi ra ai.

Ndai mabyin hta laklai lam langai byin lai wa ai. N myit mada, nga law law rim la lu ai majaw Petru kabu pyaw na re ngu anhte ni shadu na ga ai. Raitim, dai ten, kaga hkam sha lam langai gaw Petru hpe ka-up dang kau ai. Petru gaw Yesu Madu hte hku hkau na n gingdan ai ngu hkam sha ai myit rai nga ai.

“Simun Petru gaw, dai byin ai lam mu jang, Yesu a lagaw nhpang e hput di dingnyawm let, Madu e ngai kaw na wa mat u, ngai gaw shut hpyit mara kap ai masha rai nga nngai, ngu wu ai,” (Lk 5:8).

Madu Yesu a hpang hkan sape tai na n gringdan ai ngu hkam la ai rai nga ai. Shut hpyit mara lu ai wa re ngu hkam la ai rai nga ai. “Ngai kaw na wa mat u” ngu ai gaw, shi gaw nga hkan sha ai masha, hpaji n chye ai wa, ngu hkam la let shagrit shanem ai hte tsun ai rai nga ai. Hpaji chye ai, madang tsaw ai, gingdan ai kaga masha ni kaw mahtang sa nna shi a sape shatai na matu tsun ai lachyum mung rai nga ai.

Yesu Madu mung, Petru a hkam la myit yin la ai kaja ai hpe mu nna, shi hpe kalang lata n-gun jaw ai. “Shaloi Yesu gaw, hkum hkrit et, ya kaw nna nang masha ni hpe hkan hkwi na rin dai, ngu wu ai (Lk 5:10).

Yesu Madu shaga la ai San Pawlu hkam sha ai lam

San Pawlu hpe Yesu Madu shaga la ai mabyin masa lam hpe anhte chyahkring hkring na yu saga ai. Yerusalem na Yuda salang/hkingjawng ni shangun dat ai hte maren Damasaku mare na Hkristan ni hpe sa rim, zingri zingrat di na matu lata lit shatsam hkrum ai gaw Karai Kasang a shangun ai lam re, ngu Shawlu hkam la myit la lai wa ai rai nga ai.

Yesu Madu lamu na nhtoi shingkang hte shi hpe shadum sadi jaw ai hte sang lang dan ai a majaw shi hkam la lai wa ai lam gaw n jaw n teng man ai, shut ai lam re hpe chye na wa ai.

“Shaloi, Shawlu gaw, Madu e nang kadai rai nga nta?, ngu nna san wu yang, dai nsen gaw, nang zingri zingrat ai Yesu rai nga nngai. Raitimung, nang rawt nna mare de shang wa u. Nang galaw na lam dai kaw nang hpe tsun dan shangun na we ai, nga nna tsun ai,” (Kasa 9:5).

Yesu Madu Shawlu hpe mung Pawlu ngu mying galai shamying ya ai. Pawlu gaw shi a matsan mayan re ai hkam la shut lai wa ai lam hte wenyi lam hta hkrat sum nga ai hpe dum hprang wa ai. Dai gaw,hkum hkrang myi hte n mu lu ai hpe wenyi myi hte mu chye la lu ai rai nga ai.

Chyoi Pra ai Wenyi lam woi ya ai a marang e, Damasaku mare na Anani a sharin shaga lam matsun madun ai hpe hkam la nna Kashin Kamun hkam la ai. Dai hpang she myi bai mu lu wa ai.

Shi a matu Yesu Madu yawsin da ai mahkyen ni hpe Wenyi lam madun ai a marang e, nam mali de sa nna myit sumru akyu hpyi la let sharin hkam la ai.

Nhtoi loi na ai hpang gaw Damasaku, Yerusalem, hte Roma ni hta Yesu Madu a lam hkaw tsun sakse hkam ndau shana ya ai.

Shi a sharawng awng ai ndai myit ni a majaw Yesu hpe ndawng ai ni a mungkan shara shagu hta wanglu wangla hkawm sa hkaw matsun na, Pawlu a matu yak wa ai.

San Pawlu prat tup hta shi a wenyi lam hpe ahkyak dik dawhpum (wahpang) lahkawng hte madung da gawgap da ai hpe mu lu ga ai. San Petru zawn sha, kabu gara shiga gun sa na n gingdan ai wa re ngu San Pawlu mung hkam la ai rai nga ai.

“Kasa ni hta ngai gaw kaji htum ai wa rai nga nngai; Karai Kasang a Hpung hpe zingri zingrat nngai majaw, kasa ngu na pyi n ging n dan nngai” (1Kor 15:9).

Karai Kasang a garum atsam hpe hpring tup kam hpa ai wa rai nga ai. “Karai Ksang a chyeju majaw, ngai gaw ngai wa rai nga nngai; ngai hpe Karai Kasang jaw ai chyeju mung kaman lila n rai nga ai sha, kaga kasa ni yawng hta, ngai grau nna bungli galaw gun hpai shaja nngai. Shing rai galaw lu ai gaw, nye a atsam majaw n rai, ngai hte rau amu galaw nga ai Karai Kasang a chyeju a majaw rai nga ai,” (1Kor 15:10).

Karai Kasang lata la ai Myihtoi Isaiah, San Petru, San Pawlu hte lata la hkrum ai ni gun sa wa ai bung pre ai kabu gara shi ga

Prat shagu na shaga la hkrum ai Kabu Gara Shiga gun ni hta bung pre ai lam nau n law ai hpe mu lu ga ai. Langai hte langai, shaning tsa hku gang ai, buga ginra, htung hking lailen n bung ai, hpaji madang mung n bung ai, ndai zawn re ai n bung pre ai lam law law nga ai hpe mu lu ga ai.

Rai ti mung, Karai Kasang a shaga la ai hta bai htang ai lam ni gaw bung ma ai. (1) Karai Kasang shanhte hpe tsaw ra ai majaw n myit mada da ma ai aten hta shaga la ai. (2) Tinang gaw shut hpyit mara lu ai wa hku hkam la ai, ap jaw da ai lit magam hte n gingdan ai ngu myit la let n hkap la na matu shakut yu ma ai. (3) Karai Kasang gaw shanhte hpe mara raw ya ai rai nna, aten shagu karum shingtau ya na ga sadi jaw ai. Shangun dat na gaw Shi a lit re ai lam, dai gaw shanhte a lit n re ai lam tsun sang lang dan ai. (4) Karai Kasang a n-gun jaw shang lang dan ai hpe hkam la lu ai shaloi, shangun dat ai hpe kabu gara hkap la let ap jaw da ai lit magam ni hpe shagrit shanem ai, atsam marai dat ai hte shakut shaja ma ai. Chyam dinglit hkrum ai lapran kangka gun hpai sa wa ma ai. Hpa majaw nga yang, Karai Kasang gaw shanhte a gawng kya ai lam ni yawng hpe chye na hkap la ya let n-gun ban ya na re ngu kam sham lai ma ai majaw rai nga ai.

Kabu Gara Shiga gun ni tai ai anhte hkum nan a lam

“Kreti zunlawng hta naw galaw ra nga ai lam shagu hpe hkrak jaw hkra hkan yu galaw hpajang na matu hte, mare shagu hta hpung hpe up hkang na lit hkam salang ni hpe san da na matu ngai nang hpe jahti da de ai,” ngu San Pawlu, Titus hpe lit shatsam da ai lam Titus 1:5 hta mu lu ga ai.

Kasa ni galaw ai magam ni hpe shanhte a sape ni mung dai hte maren galaw ma ai. Ginjaw kaw nna sa wa ai hpung ningbaw ningla ni gaw dai buga na salang ni hpe lit shatsam let buga kata hpung magam ni hpe woi awn shangun ma ai. Shaga la hkrum ai masha law ai buga na masha ni hpe buga kaga de sasana galaw na matu bai shangun dat ma ai.

Dai masa lam a majaw, daini anhte a buga hta sasana hpung ni a apu asi hpe hkam sha nga ga ai. Anhte buga hpung masha ni hta na mung shaga la hkrum ai masha law jat wa ai rai yang buga kaga de sasana galaw lu na rai nga ai.

Anhte a kashu kasha ni shaga la hkrum na matu gara hku shapan shalat ya na rai?

Chyum Laika labau hte Nawku Hpung labau hta na Myihtoi, Jau ni hte hpung woi ni zawn anhte a kashu kasha ni hpe sasana magam lit gun hpai sa wa lu na matu shapan shalat na lit anhte hta nga ga ai.

Hkingjawng aya lu ai Jau ni gaw Nawku Hpung a matu Karai Kasang jaw ya ai kumhpa rai nga ai.

Karai Kasang gaw anhte a kashu kasha ni hpe shaga nga ai. Hkingjawng a ya lu ai Jau prat de shaga la hkrum ai gaw gawng ngwi ngwi rai prut pru wa ai hpun bawng zawn rai nga ai.

Shanhte hpe shapan shalat ai hta Karai Kasang hpe ap nawng daw jau na hta lai nna kaga yaw shada lam n ka-up kau na matu shapan shalat ya ra ai. Shanhte ni brother jawng ni hta laika sharin hkam la ngut na jawng dat ten hta seng ang ai Ginwang up hte shanhte hpe lit la lit shatsam lam woi ai ni gaw shanhte hpe makawp maga da ra ai.

Jau prat hte sak jaw ap nawng nga ai ni gaw akyu hpyi ai hta, Kabu Gara Shiga hkaw tsun ai, dai  Kabu gara shiga hte maren sak hkrung ai, sagu hpung masha ni hpe bau sin makawp maga shapan shalat ai lam hta htep lahti hkawm sa lu na matu garum ya ra ai.

Ra ahkyak wa yang anhte a Jau ni hpe shading sharai ya na matu n mai hpang hkrat ai, n mai sharen da ai. Anhte Hkristan wuhpung wuhpawng kata tinang hte seng ai lit magam ni hpe htep lahti hkan shatup ga ai rai yang sagu hpung masha ni hpe bau sin ai Jau ni law htam wa na. Dai hku n rai yang gaw sagu hpung ni ayai aya rai bra mat na tsang shara kaba rai nga ai.

Akyu hpyi saga

Wa Karai Kasang e, Nang Madu shaga la ai hta htep lahti hkan nang let lata la hkrum ai ni law jat shangun ya rit. Wa Sarabyin, Wa Saradaw, Wa Jau, Ma Ma ni hte hpung magam gun ni law htam wa u ga, anhte a kashu kasha ni hpe lam woi ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (5) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1)  Is 6:1-8  

Chyum Mungga Daw (2) 1Kor 15:1-11  

Kabu Gara Shiga    Lk 5:1-11

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.