Nam San Yang Mare Hta Ja Htu Sha Ai Lam Buga Masha Langai Hte Hkrum Shaga Da Ai

Nam San Yang mare buga hta ja htu sha ai lam gaw nga nawng htu ai kaw na hpang wa ai lam mare buga masha langai rai nga ai Jan Pri Lum tsun dan ai.

Ja htu sha ai majaw lu lawm wa ai ni nga ai zawn nkau mi gaw tinang a dinghput htingra hpe dut kau nna nga shara n nga wa ai zawn re ai ni mung nga ai. Lusu wa ai ni gaw  kaga shara hkan na masha ni she re, mare buga masha ni gaw hkrat sum lam law ai hpe mu mada ai lam shi a ningmu hpe tsun dan ai.

Dinghput htingra dut sha ai hte seng nna htingra langai mi dut sha jang, dai kaw ja htu nna kaga shara de sharut gyi wa ai,lalam mi daram ram sharut gyi bang wa ai re majaw kaga htingra ni mung dut sha law mat ai.

Nnan daw e mare buga masha ni kaji kajaw sa htu sha lawm mai ai raitim, ya hpang daw de gaw matsan mayan re ai mare buga masha ni tsep kawp nmai sa htu sha ai lam mung tsun dan ai.

Mare buga masha langai hku nna tsun mayu ai gaw ya jahkring da ai hte maren matut nna aja awa naw pat shing dang ya marit, anhte buga hten za na hpe tsep kawp nra sharawng sai lam RVA  hte ga san ga htai galaw ai shaloi tsun dan ai.