Myanmar Mungdan Hpyen Dap Hpe UN Shadut Shadi Jaw

Lai wa sai 2021, Febuary 1 ya shani, Myanmar Mungdan daru magam ahkaw ahkang hpe Myanmar Hpyen Dap kaw nna zing hkang la ai rai nna, 2022 Febuary 1 ya shani gaw laning mi hpring sai rai nga ai.

“Myanmar Hpyen Dap kawn mungdan daru magam hpe zing hkang la ai kaw nna, mung shawa masha ni wanglu wangla hte shang lawt ai ahkaw ahkang shamat kau sai rai ma ai; dai re majaw shanhte a shang lawt ai Democracy mung masa lam hpe bai hkam la lu mu ga matu madi shadaw ga ai” ngu UN High Commissioner for Human Rights lit hkam, Michelle Bachelet, January 29, bat manga ya shani tsun da ai hpe Vatican kaw nna ndau da ma ai.

“Ndai hpyi shawn ai ga hte mungdan shagu na Asuya ni, mung masa ninghkring ni, sut masa ninghkring ni, shinggyim ahkaw ahkang hte seng ai hta woi awn nga ai ni, yawng hpe hpyi shawn dat mayu nngai; Myanmar mungdan Democracy hpe bai gaw gap ai hta shang lawm karum ya ga; shinggyim ahkaw ahkang tawt lai ai ni hpe jep shagawn na aten rai sai,” ngu Michelle tsun da ai.

Mungdan kata gap hkat majan mung grau law wa ai majaw chyam chya yak hkak jam jau lam grau kaba nga ai; Myanmar Hpyen Dap Asuya hpe ninghkap ai mung shawa masha ni hpe shingdu kaw nna laknak lang ninghkap hpyen hpung ni karum ya nga ai majaw Myanmar Hpyen Dap hte laknak lang ninghkap hpyen hpung ni a lapran  mung n hkrum n ra ai lam grau law wa ai; kahtik kahtawk, gasat gala byin ai lam grau law wa ai, ngu mung Michelle tsun da ai.

Assistance Association for Political Prisoners (AAPP) kawn sawk sagawn da ai hte maren rai yang, shimlam la Myanmar Hpyen Dap hpung kawn mung shawa masha ni hpe sat kau ai 1,500 daram rai sai lam, 8,800 daram gaw hkyuk htawng sharawng da hkrum ma ai lam mung tsun dan da nga ai.

Myanmar Hpyen Dap hpe simsa ai hku ninghkap ai ni hte online ntsa hta media mahkrun lam hku ninghkap ai masha 11,800 daram gaw rim rawng da hkrum ma ai lam, dai ni hta na 8,792 gaw ya du hkra sharawng da hkrum ma ai lam, n law htum 290 gaw dai zawn rim rawng da hkrum ai aten hta si mat ma ai lam, shanhte gaw zingri hkrum ma ai majaw si mat ai masa hta nga ai ni sha rai ma ai lam UN kawn sawk sagawn ndau da ya ma ai.

Myanmar hpyen dap hte laknak lang hpung ni lapran gap hkat majan a majaw Myanmar mungdan kata mungdaw ni hta nga ai Kachin, Chin, Karen, Kayah myusha ni law law wa hkala nba hkrum si mat sai rai tim jahpan hkrak n lu ai lam mung tsun da nga ai.

Michelle Bachelet shi na lu ai mabyin ni hpe mung matut tsun dan ai hta, shiga la ai ni rim hkrum zingri hkrum ma ai lam, jak rung ni hta bungli galaw ai ni jahkrit shama hkrum ma ai lam, dai lam ni hpe hkum jahta na matu pat shingdan hkrum ma ai lam, shanhte hpe amyat htuk ma ai lam, Rohinjah hte rau myusha bawsang kaji ni, kaji kadun ai makam masham hpung ni gaw zingri zingrat hkrum ma ai lam, mung masa lam galaw ai ni n tara rim hkrum ma ai lam, jep sagawn ai shaloi jahkrit shama zingri zingrat ai lam nga ai raitim dai hpe n jaw n teng ai hku shiga masu hpe shabra ma ai lam, mare jasan masing hte hpyen nbungli, laknak kaji kaba ni hte mare masha law law nga ai shara ni hta gap bang gasat ma ai lam, masha asak hpe ahkyak n tawn manu shadan ai lam n nga ai hpe madun dan ai ladat ni hte gasat nga ma ai lam, ni lawm nga ai.

Kap bra ana Covid 19 a majaw bungli galaw masha yawm hta yawm grau wa ai rai nna, 2021 shaning hta Myanmar mung shawa masha a tsa shadang 1.6 % hkrat sum mat sai lam International Labour Organization (ILO) kawn lai wa sai bat manga ya shani ndau da ma ai.

Myanmar mung shawa masha ni gaw, Myanmar Hpyen Dap kawn mungdan daru magam hpe zing hkang la ai majaw mung masa yak hkak ai hte kap bra ana zingli hkrum sha ai raitim, shanhte a laklai atsam hte hkam jan lu ai hpe langai hte langai karum shingtau let madun dan nga ma ai, ngu tsun dan let, ya gaw mungdan shgu na wuhpung wuhpwng ni dai tinang gara hku garum madi shadaw ya na hpe asan sha daw dan nna manghkang hpe hparan shangut ya na aten nan rai sai ngu, UN High Commissioner for Human Rights lit hkam, Michelle Bachelet, mungkan ting hpe ndau saw shaga da ya ai.

Ya ten du hkra, UN Security Council hte Association of Southeast Asian Nations (ASEAN) kawn shang lawm hparan ya ai lam ni gaw Myanmar mung shawa masha ni hkap la lu ai madang n nga shi ai lam mung yin la ga tsun da ai.

By Fr. Patrick Gawmaw Hkawng Yae

29 January 2022, 17:14

https://www.vaticannews.va/en/world/news/2022-01/myanmar-coup-united-nations-rights-bachelet-civilian-rule.html