Tara Rapra Lam Hta Npawt Hpang Ai Simsa Lam Hte Myit Mada Lam Hpe Gaw De Sa Wa Ga Nga Nna Cardinal Charles Bo Tsun Ai

Cardinal Charles Bo: Tara Rapra Lam Hta Npawt Hpang Ai Simsa Lam Hte Myit Mada Lam Hpe Gaw De Sa Wa Ga

  December 9 ya shani, Catholic Bishops’ Conference of Myanmar (CBCM) hpa-awn ningbaw (president), Cardinal Charles Bo laika langai htuk shapraw let Myanmar mung shawa masha ni, tara rapra lam kaw na hpang wa ai myit mada lam hte simsa lam hpe gaw de sa wa na matu n-gun jaw saw shaga da nga ai.

“Nsin hta hkawm nga ai amyu gaw, nhtoi kaba mu lu ma ai;

si hkrung si htan mung na shingnip kata e shanu nga ai ni a ntsa e, nhtoi dawng pru wa sai.”  Isaiah 9:2 hte shi a mungga hpe hpaw hpang da ai.

  Lai wa sai shata 10 laman byin lai wa sai mazut dik ai sat nat sharu hkat lam ni gaw Mungkan hpe pyi hkrit gajawng lam byin shangun lai wa sai rai nga ai. Raitim mung, nju ndawng myit daw myit hten lam ni byin nga na anhte n ra sharawng ga ai. “Simsa nga nu ga” ngu nna Madu Yesu hte rau anhte tsun jahtau mayu ga ai. Tinang hkum nan shabyin la ai mang hkang lam ni hte hkala nba hkrum nga ai ndai mungdan hpe, “Myanmar mungdan e, ladu lai nga sai, ram ging sai” ngu nna anhte tsun ra saga ai”.

  “Amyu mi hte amyu mi, mung mi hte mung mi shada da gumlau hkat na mara ai; nnang nawn kaba wa ai mung, shara kaga ga hta e ana zinli wa ai hte hku hku wa ai mung, byin na ra ai.” Lk 21:5-11 hpe sumru woi let, Myanmar mungdan e, ladu lai nit dai, ram ging sai, ngu ga kaba hte anhte hpe shadum ya nga ai.

  Cardinal Charles Bo gaw Myanmar mungdan na Ramma ni a matu myit tsang nga ai lam mung tsun da nga ai. Ramma ni hte rau Myanmar mung shawa ni hpe Cardinal ndai zawn shadum jahprang da ya ai.

 “Anhte a ramma ni hte seng nna grai myit tsang nga nngai. Shanhte hta myit mada shingran da ai lam ni nga lai wa ma ai. Ya gaw dai shanhte a myit mada lam ni yawng hten run mat wa masai. Myit mada shingran da ai lam ni hpe sat jahten kau ya ai gaw sinat lak nak ni a majaw n rai. Sat nat zingri lam ni hte du manat da hkrum ai shaloi, matai bai htang mayu ai myit ni pru wa ai. Sinat lak nak hta lang nna sha awng dang ai lam n pru wa lu mai ai.

  Teng man ai lam hte tsawra ai lam hpe hta lang jum tek da yang sha awng dang lam pru wa lu mai ai. Laja lana galaw ai lam n lawm ai sha simsa ai masa hte mahtai tam la lam, ngu ai ladat masa nga nga ai. Laja lana lam hte mahtai n tam ga ngu nna kalang bai lajin mayu nngai. Laja lana lam gaw jahten sharun lam ni hpe chyu sha byin pru shangun wa na rai nga ai. Tengman lam hte tsawra lam a n-gun atsawm hpe kam ga. Laja lana lam n lawm ai masa mahtai tam ran hparan galaw ai lam gaw, myit masin gawng kya ai lam n rai, n-gun rawng ai ni a lak nak madaw she rai nga ai.”

  Hkrup mara sat nat zingri hkawm wa ai masa n galaw hkrup wa hkra, anhte sadi maja ra ga ai. Ramma ni a myit machyi hkam sha lam ni hpe chye na ya nga ai, raitim mung, dai zawn myit machyi ai lam ni a majaw kaga masha ni hpe mung, tinang hkum hpe mung grau machyi hkra bai galaw na, ngu ai masa n mai byin shangun ai.

   Wa Sarabyin Francis mung, Myanmar mungdan a matu dingrun akyu hpyi ya ai, tsun shapraw ya ai lam ni galaw ya nga ai. Myanmar mungdan de shi sa du gawan lai wa ai aten hta mung, yawng hpe shi hkap la hkrum shaga lai wa ai, simsa lam a matu rai nga ai. Myanmar mungdan nawku hpung hku nna simsa lam hpe matut galaw sa  ra ai ngu nna shi matsun htet kau da ai. Simsa lam, bai htingram hkat lam ni hpe galaw ga, ngu ai Wa Sarabyin a lajin laroi lam hpe, kahtap nna bai lajin dat nngai.

  “Simsa lam hpe sharawng awng ai ni gaw A Lu ma ai” nga nna hkaw tsun ai Madu Yesu, “Tara rapra lam hpe ra sharawng ai ni gaw A Lu ma ai” nga nna mung tsun nga ai.

 “Shanhte gaw tinang a nhtu ni hpe najawn, tinang a ri ni hpe nhkyau dup kau na mara ai; amyu mi gaw amyu mi hpe nhtu n shaw ai hte, htawm hpang e hpyen majan sharin sana nrai.” (Isaiah 2:4)

Source:RVA English

By Fr. Patrick Gawmaw Hkawng Yae

#cardinalcharlesbo

#rvaenglish

#rvakachin