Nam San Yang Mare Kaw Ginlung Christmas Poi Galaw

Majan a majaw sanit ning daram koi yen da ra mat ai Myitkyina-Manmaw lam na, Nam San Yang Mare Buga masha n kau ni n-dai December shata 19 ya shani kaw nna Mare de bai wa nga sai hte maren, Mare kata hta Ginlung Christmas Poi hpe dai ni 2018 December 28 ya shani San Pawlu Kahtawlik Nawku Jawng Wang hta galaw ma ai.

Jahpawt hkying 10:00 AM ten hta Christmas Missa Hkungga hpe Myitkyina Sasana Sagurem wa, Wa Saradaw Francis Daw Tang hte Wa Jau ni marai (5) woi awn galaw ya lu sai.

Missa ngut ai hte Ginlung Christmas Akyu Hpyi Hpawng hpe matut galaw ai hta, Wa Saradaw Francis Daw Tang , Jau Ma Ma ni, Nawku Hpung shagu na Hpung Sara Hpung Tau ni hte Tara Hkaw Sara ni ,Mare uphkang Salang ni ,Laksan saw shaga da ai manam ni hte rau shawa masha 600 jan sa du shang lawm ma ai.

Christmas Poi hpe mani December 27 ya shana kaw nna yu ngwi pyin ra ,State Show htawng ka lamang ni hte rau galaw ai rai nna, dai ni du sa ai shawa masha ni yawng hpe mung, Christmas malu masha daw jaw let wu wu di di galaw lai wa ma ai.

Ya na zawn ndai Nam San yang hta Christmas Poi galaw ai lam gaw , bra taw nga ai Mare masha ni hpe kahkyin na matu, n-gun jaw la na matu yawng myit hkrum wa lu na matu myit n kaji na matu ,Nam San Yang ngu ai Mare naw nga ai ngu hpe chye lu na matu hte Mare kata na Nawku Hpung grau nna Nam San Yang Jau Ginwang hpe bai hpaw gaw de sa wa lu na matu nnan hpang ai hku nna galaw ai re lam Wajau Yawhan Gawlu Yungwa tsun ai hte maren chye lu ga ai.

Thomas Mung Hpan