Karai Kasang A Mungga - Du Sa Ladaw Laban 3, 2021

Du Sa Ladaw (3), C, 2020 (yawng hpe hkye hkrang la lam de shaga la ai)
Hkristu hta tsaw ra ai nu wa hpu nau ni e, ndai laban gaw (C) shaning na du sa ladaw (3) ngu na laban rai nga ai.
Kabu pyaw ai lam ni gaw hpa ni rai ta? Du sa ladaw langai ngu na laban hta Karai Kasang shinggyim masha ni hpe hkye la na matu aten tup bungli kying taw ai lam, lahkawng ngu na laban hta gaw anhte a hkye hkrang la hkrum na lam hpe manu jahpu n jaw ra ai chyeju kumhpa re lam tsun da ai.
Ndai Du Sa Ladaw laban masum hta gaw Karai Kasang anhte kadai hpe rai tim, hkye la na matu saw shaga nga ai lam rai nga ai.
Kadai hpe rai tim ngu ai gaw matsun mayan re ai mara lu ai wa hpe mung hkye hkrang la na ra ai ngu ai lachyum rai nga ai.
Yuda myusha ni a ningbaw ningla ni hpe yu dat yang, shanhte ni Yawhan tara mungga hkaw tsun ai kaw sa madat hkam la na matu n rai ma ai. Yawhan a majaw, makam masham hpung lam shamu shamawt ai hta shanhte ni ahkaw ahkang n lu, byin wa ma ai. Dai majaw Yawhan hpe ga san san na matu sa du ai rai ma ai.
Yawhan Baptista gaw shanhte hpe “nanhte ni hkye hkrang la hkrum na matu myit malai mu” ngu aja awa sadi jaw saw shaga da ai.
Wuhpung langai gaw yu maya shawa masha ni rai ma ai. Shanhte a wuhpung hta Messiah hkye la madu hpe hkap tau la na matu la dingda nga ma ai Yuda myusha ni mung lawm ma ai. Kaga masha ni gaw tara n nga, Karai hpe n kam ai ni rai ma ai. Ndai ni hta Yuda myusha ni hta na mying hten ai kang hta ai ni hte hpyen ma ni mung lawm ma ai ngu San Luka madi madun da ai.
Kang hta ai ni hpe n ju n dawng ai myit kaba ai lam lahkawng nga ai. (1) Shanhte gaw tara maigan Roma hkawhkam a matu hkanse hta ai ni rai ma ai majaw hte, (2) hkanse hta shangun ai hta lai jan nna hta ai, dai jan ai gumhpraw ni hpe tinang kun dinghku a matu lagu shaw jai lang la ma ai majaw rai nga ai.
Matsan mayan ni, gaida gaidaw ni hte n dum n shai n chye na ai ni gaw dai zawn re ai n tara ai ni a masu hkalem ai hkrum sha nga ma ai.
San Luka “hpyen la ni” ngu tsun ai gaw balik ni hpe tsun ai mai byin ai. Shanhte hpe mung mung shawa law malawng n ra sharawng ma ai, n ju n dawng ma ai. Hpa majaw nga yang yu maya mung shawa masha ni a ja gumhpraw ni hpe n tara ai gumshan ai hku damya mya kashun la ma ai majaw rai nga ai.
Rai yang, kang hta ai ni hte hpyen la ni zawn re ai ni gaw hkye hkrang la lam hpe myit mada lu na kun?
Ndai ga san hte Yuda makam ningbaw ningla ni hpe san ai rai yang shanhte a mahtai gaw kang hta ai ni hte hpyen la ni a matu hkye hkrang la lam myit mada shara kachyi mi pyi n nga ai, shanhte gaw hten run na lam sha nga ai, ngu ai rai nga ai.
Yawhan Baptista gaw wenyi a shadut ya ai hte shanhte a matu myit mada shara kaba nga ai lam tsun da ai. “Nanhte a lai sai ten na yubak mara ni a matu myit malai lu mu. Ya ten kaw nna nanhte hkan shatup ra ai lit magam ni hpe dingman dinghpring gunhpai ai rai yang hkye hkrang la lam lu na myit dai,” ngu myit mada shara jaw da ai.
Shinggyim masha langai mi hkye hkrang la hkrum na matu kaning re ai lam ni hpe hkan shatup ra na rai?
Messiah Madu du sa ai shaloi hkye hkrang la hkrum na matu gara hku sak hkrung nga ra rai ngu san seng myit hte san ai ni hpe Yawhan htai da ai mahtai hpe Luka 3:11 hta mu lu ga ai. “Palawng lahkawng lu ai wa gaw, n lu ai wa hpe karan u ga, shat lusha lu ai wa mung dai hte maren jaw u ga,” ngu Yawhan Baptista lam matsun da ai.
Yubak mara lu ai wa gaw teng man myit malai lu nna mara hta na lawt lu ai. Raitim, tinang hte nihtep ai, ra kadawn ai ni hte n seng ai hku nga ai wa gaw galoi mung hkye hkrang la hkrum lu na n rai nga ai. Kaja wa sha, shinggyim masha law malawng gaw matsan na ma ai. Raitim, nihtep ai hpu nau ni, ra kadawn ai ni hpe n garum lu ai madang gaw n matsan na ga ai. Lama ma hku nna gaw garum lu na ga ai.
Mam nsan hte ma nsi ni
Yi, hkauna galaw sha ai ni a matu, law malawng gaw yi, hkauna hpe mare hte tsan ai shara kaw galaw ra ma ai rai nna, yi galaw ai ni gaw yi hkyen, yi nat, yi sawm, mam ting, tsing magang, mangai ngai jang u gawn, mam mu, mam kabye, zing la ai teng du jang mam jahkrat, nbung hte shapoi, layit yit nna mam nseng hpe awng ai mam hte jahka kau nna wan hte nat kau chye ga ai. Dai hte maren sha hkauna galaw sha ai ni mung, na htai, nabra gat, na hpri ngut jang mam hkai, tsing magang, mam dan, mam hpai, mam bum bum, mam kabye, mam jahkrat nna mam nsan ni hpe nbung hta shapoi kau nna awng ai mam ni hpe mam dum hta htawt zing da chye ga ai.
Mam htu mam ring ngut ai shaloi mung, numhkaw ni hpe katsap kau chye ga ai. Akyu n rawng sai mam nsan ni hte numhkaw ni hpe wan hta nat kau chye ga ai, ga sau tai na matu si mai hkai ai shara hkan mung bang chye ga ai.
Law malawng gaw mam nsen ni hpe akyu n rawng sai hku chye na da ga ai rai nga ai.
Akyu rawng ai, awng ai mam nsi ni hpe gaw mam dum hta atsam sha zing da chye ga ai.
Ndai laban na Chyum daw hta Yawhan Baptista gaw, masha n kau ni gaw manu dan ai mam si ni hte bung ai, nkau ni gaw Karai Kasang a man e akyu n rawng ai mam nsen hte bung ai ngu shingdaw tsun da ai hpe mu lu ga ai.
Shinggyim masha langai gaw kaga masha ni hpe mam nsi, shing n rai, mam nsen zawn shingdaw garan ginhka da n mai nga ai. Messiah Karai kasang chyu sha garan ginhka da mai ai ngu Yawhan asan sha tsun da nga ai. Myi grai zen ai Messiah Karai hpe kadai mung makoi masu hkalem n lu ai, Shi gaw yawng hpe garan ginhka nna chye yu maram ai wa rai nga ai.
“Shi a lata hta shi hkuwawn lang nna shi a mam ni mahkra hpe yit jasan kau nhtawm, mam gu hpe shi a dum hta shinggyim da na ra ai, nsan hpe chyawm gaw galoi mung n krip ai wan hta nat kau na ra ai, ngu Yawhan Baptista, shanhte hpe tsun mu ai,” (Lk 3:17).
Karai Kasang a man e kaning re ai lam ni gaw masha hpe manu n dan, manu n nga byin shangun nna, kaga masha hpe mam nsan zawn akyu n rawng tai shangun ai rai?
Anhte shinggyim masha ni gaw nihtep ai wa hpe tsaw ra ai, shing n rai, n dawng ai. Langai sha nga ai.
Yawhan Baptista gaw Yuda makam ningbaw ni hpe puhtun amyu hte shabung da ai (Lk 3:7). Gawngba rai dum myit hte hpring tup re ai ni hta si shangun lu ai gung (labu) hte hpring rai ma ai. Kaga masha ni hpe Karai Kasang hpang de woi sa na ngu tsun jahpai nna wenyi lam hta hkrat sum si mat hkra galaw chye ma ai (Mt 23:15).
Shanhte gaw Abraham a aru arat ni, kashu kasha ni rai ga ai, ngu gawngba rai dum myit hte arawng mala nna, Mawshe jaw da ai htung tara kaji kaba ni hpe hkan shatup ma ai. Shanhte ni hta lai nna, yu maya masha ni gaw mara lu ai ni ngu jahprak nna ngarai wan hte gindan ai ni ngu hkam la ma ai.
“Ndai shawa masha ni gaw, Mawshe a tara hpe n chye ma ai majaw, Karai Kasang a dagam dala hkrum sha ai ni rai nga ma ai, ngu nna shanhte hpe tsun mu ai,” (Yh 7:49).
Yawhan gaw Yuda makam ningbaw ni hpe myit malai lu nna du sa na ra ai Messiah shanhte hpe hkye hkrang la na hpe hkap la na matu shadum sadi jaw ndau ya ai. Raitim, shanhte a arawng mala gawngba raidum ai myit a majaw tsaw ra matsan dum lama myit n rawng ma ai hte Yesu la sa ya na hkye hkrang la lam hpe jaw ya mayu tim shanhte ni ninghkap lai wa ma ai.
Anhte Hkristan ni gaw hkyehkrang la lam hpe hkam la lu ai majaw kabu pyaw lu ai ni rai ga ai.
Chyum daw langai gaw Myihtoi kaji 12 hta na Myihtoi Zehpani chyum laika hta na rai nga ai. Myihtoi kaji ni ngu ai gaw shanhte ka ai chyum laika kachyi mi sha re ai majaw tsun ai rai nga ai, shanhte myihtoi da ai lam n ahkrak ai majaw gaw n rai nga ai.
Chyum daw langai hte chyum daw lahkawng rai nga ai San Pawlu Hpilippi hpung masha ni hpang de shagun dat ai chyum laika gaw shinggyim masha ni yawng kabu gara myit ngwi myit pyaw na lam tsun ndau ya ai lam rai nga ai. (1) Anthe gaw mara hta na hkye hkrang la hkrum saga ai, (2) Karai Kasang gaw anhte a lapran anga nga ai, (3) Karai Kasang du sa na jing jing rai sai, sumsing mungdan du magang ra ai, (4) Anhte akyu hpyi ai a marang e ra kadawn, ra sharawng awng ai lam hpe lu la na ga ai, ngu ai lam ni hte seng nna ga sadi jaw da ai lam ni rai nga ai.
Anhte a wenyi myit masin kata simsa lam hpe lu la na teng man ai lam nga ai.
San Pawlu gaw, “anhte chye na da ga ai hta sung grau ai simsa lam” anhte a matu Karai Kasang lajang da ya ai kumhpa nga ai ngu tsun da ai, (Hpil 4:7). Karai Kasang jaw da ai dai kumhpa hpe hkam la lu na matu anhte ni kam sham myit kaba hte shi kaw akyu hpyi ra ai. Dai gaw Karai Kasang kaw nna Hkristu anhte hpe jaw lu ai simsa lam hte kabu pyaw lam rai nga ai.
“Ngwi pyaw simsa ai gaw ngai nanhte hpe jaw da ya ma sade ai; Nye a ngwi pyaw simsa ai nanhte hpe ngai jaw made ai, mungkan ga na ni jaw ai zawn ngai nanhte hpe jaw made ai n rai. Nahte myit hkum ru myit, hkrit mung hkum hkrit myit,” (Yh 14:27).
“Shing nga tsun ngut jang, shi shanhte hpe shi a lata ni hte garep madun dan wu ai. Sape ni mung Madu hpe mu lu yang, kabu gara ma ai. Yesu gaw shanthe hpe kalang mi bai, nanhte ngwi pyaw nga myit ga; nye Wa gaw ngai hpe shangun dat ai hte maren, ngai mung nanhte hpe shangun dat made ai, ngu nna tsun mu ai” (Yh 20:20-21).
Kaning re ai ana ahkya raitim, zingri zingrat ai lam rai tim, Karai Kasang jaw da ai simsa lam hpe n jahten lu ai, n shazim lu ai. Raitim, pat shingdang da n lu ai mara kaba gaw dai hpe jahten lu ai rai nna, teng man myit malai hte sha dai simsa lam hpe kalang bai lu la na rai nga ai.
Hkristu Madu jaw ai ngwi pyaw simsa lam hte kabu pyaw lam gaw anhte shinggyim masha myit hpe hpring tsup myit dik lam jaw ya lu ai.

Akyu hpyi saga
Wa Karai Kasang e, Yawhan Baptista shadum sadi jaw ai hte maren anhte mara kaw nna teng man myit malai hte gayin wa let Karai Kasang jaw ya ai ngwi pyaw simsa lam hpe hkam la lu na lam woi ya rit. Anhte a Madu Hkristu a marang e hpyi nem nga ga ai. Amen.
Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw du sa ladaw hta (3) ngu na laban rai nga ai.
Hti ang ai Ja Chyum Mungga ni gaw
Chyum Mungga Daw (1) Zech 3:14-18
Chyum Mungga Daw (2) Hpil 4:4-7
Kabu Gara Shiga Lk 3:10-18
Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.