Christmas Poi Byin Wa Ai Lam Hte Christmas a Lachyum

Christmas ngu ai gaw, Chyoi Pra san seng ai Maria kaw nna Madu Yesu shangai wa ai  poi n htoi rai nna, n dai poi hpe Mungkan ting na Christan ni hte Christan n re ai ni yawng galaw ma ai.Bai nna, Christmas ten gaw , Mungkan ntsa dan leng gumhkawng dik htum Holiday Rung Pat n htoi ten mung rai nga ai.

Christmas ngu ai ga si hpe dinglik yu yang, Madu Yesu ngu ai “ Christ “ hpe la nna, shawa dawtsa, shawa hpawng “ Mass” ngu ai hte pawng nna Christmas ngu shamying ai rai nna Moi prat kaw na ya du hkra n dai December 25 ya shani galaw ai lam rai nga ai.Nawku Hpung a Poi hku nna gaw ,Christmas hpe January praw 1 ya du hkra galaw ma ai.N-dai ten ni hta christmas hpe tinang htuk manu ai hku nna galaw mai nga ai.

Bai nna, Christmas ngu ai gaw anhte hkristan ni a akyu hpyi Nawku dawjau hpang  ai ladaw shaning  shata mung rai nna, Moi na prat htung lai hku nga yang gaw, Christmas ladaw hpe  nhtoi mali shi ya tup masat da ma ai .ndai gaw anhte lu sha gam akyu hpyi ai n htoi hte mung bung nga ai.

Christmas a lam hpe sawk sagawn ai labau ninghkring n kau  ni tsun ai hta, Calendar kaw Christmas ten hpe hpa majaw December shata hta masat da ma ai kun nga nna dangrang hkat nga ma ai.Hpa majaw nga yang Chyum laika hta sak se madun na chyum daw n mu ai majaw rai nga ai.Raitim Yesu si hkam ai shaning latsa ning na ai hpang Chritmas poi hpe galaw hpang ai nga nna tsun shajang ma ai.

Chyum laika hpe hkan dinglik mahta nna byan da ai hku nga yang gaw, Madu Yesu gaw December shata hta shangai ai n re ai sha, ginhtawng ta ‘‘ shing nrai ‘ N mut ta hta shangai ai nga nna tsun ma ai.Raitim mung December shata 25 ya shani gaw Christmas n htoi re ngu nna, Roma Empire prat jahtum ten na Nawku hpung ni masat da ma ai.Nkau ni gaw dai aten hta Roma Empire kaw galaw ai poi shingra ni, nshung ta ten galaw ai poi lamang ni hpe mahta nna ndai ten hpe Chritmas ten ngu masat ai re nga yin la ai ni mung nga ma ai,

Nkau Theory madi madun ai lam ni hta rai yang gaw,Christmas ngu ai n dai ten hpe rung pat n htoi ‘ Holiday’ hku masat da ai ra nna, kaja wa nan Madu Yesu shangai wa na matu Maria hta na-um na sin byin wa ai gaw, March shata 25 ya shani she re , December shata 25 ya shani hpe gaw majoi sawn yu nna Christmas ngu masat da ai lam she re nga nna tsun shajang ma ai.Tsun mayu ai gaw, Maria kaw na-um na-sin byin wa ai shata jahku na ai hpang she Yesu shangai wa ai ngu ai ga rai nga.

 Moi prat na Nawku Hpung ni lang ai Calendar hte ya prat na Gregorian Calendar shai hkat ai hpe mung mu lu ai.Moi prat na hku yu yang December 25 ya shani Christmas galaw ai rai nna Dai ni anhte lang ai Gregorian Calender hte maren nga yang, January praw 7 ya shani she Christmas n htoi ang ai hpe mu lu nga ai. Dai majaw ,ya dai ni ten du hkra Mungdan nkau hkan na Orthodox Nawku Hpung ni Christmas hpe moi na Julian Calendar hte maren January 7 shani she Christmas poi galaw ma ai. Raitim Dai ni na ten hta Mungkan Mungdan law law kaw December 25 shani Christmas Poi hpe galaw ga ai re.

Hkristmas a ningpawt ninghpang hte Christmas ninghtoi masat ai lam hta ya na zawn shai hkat ai lam ni nga tim mung , madung hku nna gaw Shinggyim masha ni hpe hkye hkrang la na matu, Madu Yesu shangai ai masat dingsat, Yesu a shangai n htoi hpe shakawn shagrau ai hku nna, anhte Christan ni n dai poi hpe shaning shagu galaw ai lam rai nga mali ai.

Christan n re ai ni chyawm gaw  n dai Christmas ten hpe shan hte a matu , grai wa ahkyak la ai ngu n yin la   ai sha, rung pat n htoi ‘ Holiday’ hku nna sha, masat la ma ai.Raitim anhte Christan ni a matu gaw rung pat n htoi’ Holiday’ ngu ai hta grau lachyum sung nam nak rawng ai n htoi, anhte a Madu Yesu Christu shangai wa ai hpe kabu gara let hkap tau hkalum shakawn shagrau ai lam rai nga ai hte maren, shut hpyit mara ni hpe koi yen nna, myit masin Wenyi hkum hkrang nnan hte shangai wa ai Madu Yesu a hpang  kam sham ai myit hte  hkan nang lu na matu grai ahkyak ai Nawku daw jau ai lam a ningpawt ninghpang rai nga mali ai

Thomas Mung Hpan

Ref: catholic.org