N Hkam Sharang, N Hkam Jan Lu Ai Lam Hpe Gasat Dang Kau Lu Na Lam Manga (5) Hpe UN Kawn Ndau Shana Da Ai

November 16 ya shani gaw “international day for tolerance” nhtoi masat dingsat nhtoi rai nga ai. “UN days for tolerance” nhtoi  gaw shinggyim masha shada lapran, n bung pre ai htung hking ni hta shada rau chye na hkap la manu shadan na matu rai nga ai.

Mungdan shagu gaw tinang a mung shawa masha ni masha kaga ni a ntsa hkam jan, hkam sharang chye na hkap la na matu hpaji machye machyang ningmu jahpaw ya na lit kaba nga ai.

Mungdan daru magam up hkang, ahkang aya lu ai mungdan Asuya ni gaw daw sa ai lam, gumshen ai lam hkrum sha nga ai ni hpe makawp maga na lit kaba nga ai.

Mungdan madang, mungdan shagu hta hkam jan, hkam sharang lu na ladat hpe akyang sat lawat kaja hku hkam la let mungdan shagu, n bung pre ai htung hking lai len shada hkap la manu shadan hkat let wuhpung wuhpawng langai hta sha simsa ai hku nga pra na gaw grai nan ahkyak nga ai.

1995, November 16 ya shani, (15) lang ngu na “international day for tolerance” nhtoi hta UNESCO malawm ni kawn hkamjan lu na lam matsun ni hpe shagrin ndau shabra da masai rai nga ai lam chye lu ai.

Hkam jan hkam sharang ai lam gaw laksan re ai chyeju mung n re ai, shada garan ginhka ai lam mung n rai nga ai ngu dai ndau shabra laika hta tsun da ma ai. Mungkan htung hking law law hpe manu shadan hkungga lara di na hte hkap la na matu rai nga ai. Dai gaw shinggyim masha ni a matu hkan shatup ra ai lam mung rai nga ai.

Hkam jan hkam sharang ai lam gaw mungkan ting hte seng ai shinggyim ahkaw ahkang hte hpu nau ni a ahkyak dik akri madung shang lawt ai hpe chye na hkap la manu shadan ya ai lam rai nga ai.

Shinggyim masha ni hta, n bung pre ai masa gaw nga ai raitim, wuhpung wuhpawng ni hta dai n bung pre ai shinggyim masha ni rau jawm pawng nga let sak hkrung nga ma ai gaw mungkan shara shagu rai nga ai.

N hkam jan lu, n sharang lu ai hpe gara hku gasat dang manga kau lu na rai?

Dai hpe gasat dang manga kau lu na matu gaw tara upadi ngu ai ra ai. Mungdan Asuya shagu gaw dai shinggyim ahkaw ahkang hte seng ai tara upadi ni hpe jahkrat gaw de na, ahkyak la sa wa na gaw ahkyak ai lam langai rai nga ai.

N hkam jan, n sharang lu ai lam hpe gasat dang kau lu na matu machye machyang hte hpaji mung grai nan ahkyak nga ai. Tara Upadi gaw ra ahkyak ai, raiti mung, dai hte sha n hkrum tsup ai, n hpring tsup ai, sung grau ai hpaji machye machyang gaw yawng hta nga ra ai.

N hkam jan, n sharang lu ai lam hpe gasat dang kau lu na matu shada shi jaw shi la shadum jahprang hkat na mung grai ahkyak ai.

N hkam jan, n sharang lu ai lam hpe gasat dang kau lu na matu buga ginra hta hkan nna mahtai tam sa wa na mung grai nan ahkyak nga ai. Buga ginra hta ra ahkyak ai hta hkan nna mahtai tam sa wa na ra ai. Mungdan Asuya kawn sa hparan ya na hpe n mai la dingda nga ai. Dai buga ginra hta nga ai ni gaw dai mahtai hpe tam sa wa ra ai.

RVA English Website kaw November 10 ya shani ndau da ma ai hpe RVA Jinghpaw Nsen Shapoi Dap kaw nna shalai ndau dat ya ga ai.

By Fr. Patrick Gawmaw Hkawng Yae

https://www.rvasia.org/history/five-ways-fight-intolerance-un-day-tolerance-november-16