Karai Kasang A Mungga - Pran Wan Ladaw Laban 33, 2021

Pranwan Ladaw (33), B, 2021
Yesu Hkrist lahkawng lang ngu na bai du sa na lam
Hkristu hta tsaw ra ai nu wa hpu nau ni e, ndai laban gaw Pranwan Ladaw hta (33) ngu na laban rai nga ai.
Shawng na laban hta tsun sai hte maren Kahtawlik hpung a nawku dau jau shaning gaw hpang na laban Hkristu Hkawhkam a poi laban hta htum sai rai nga ai. Dai ngut jang Nawku daw jau shaning ningnan hpe Du Sa Ladaw hte bai hpang ga ai.
Karai Kasang a hkye hkrang la ladaw hpe masum garan nna sumru mai ga ai. (1) Shinggyim masha hpe hpan ai hpang mungkan ga de Yesu Madu du sa ai ladaw, (2) Yesu Madu Kanu Nu Maria a hkritung hta shinggyim hkum sa la ai kaw nna Kawa Karai Kasang hpang de bai nhtang wa ai ladaw hte (3) Chyoi pra ai Wenyi yu hkrat wa ai kaw nna ya anhte nga ai prat hte mungkan htum ten du hkra gaw masum ngu na ladaw rai nga ai.
Yesu Madu mabyin masum hpe kalang lata ndau ai lam
San Mahte, Marku, hte Luka ni a Kabu Gara Shiga chyum laika hpe “Synoptic” ning mu bung ai chyum laika ni ngu shaga shamying da ma ai. Ga si “Synoptic” gaw Greek ga si rai nna, ningmu bung jut kaw nna tang madun ai hpe tsun mayu ai rai nga ai. San Yawhan a Kabu Gara Shiga Laika gaw dai chyum laika masum hte shai ai lam nga ai.
San Mahte, Marku, hte Luka ni gaw Mungkan sak prat htum ai shani ni hta byin wa na hpe Yesu Madu a ndau shana da ai lam masum hpe madun da ma ai. (1) Yerusalem hten run na lam (2) mungkan htum na lam hte (3) Shi a lahkawng lang ngu na bai du sa na lam ni rai nga ai (Mt: 25, 26; Mk 13; Lk 21).
Yesu tsun ai Yerusalem hten run na lam
Yesu si ai hpang (40) shaning hta Roma hpyendap, Yerusalem hpe zingla nna Nawku Htingnu hte rau mare hpe mung jahten kau ai labau nga nga ai.
Ndai byin wa na lam Yesu Madu Betheny mare de hkawm sa ai hkrun lam hta kasa ni hpe tsun lai wa yu ai. Dai tsun ai aten gaw shana daw maga rai nga ai; Betheny sa lam kaw na yu dat yang Yerusalem Nawku Htingnu hte re ai Yerusalem gaw Jan shang mahkra jan shingkang n pu kaw shingkang shingwang hte hpring rai nga ai aten rai nga ai.
Yerusalem a hkikhkam tsawm htap mying n chye shangun mayu ai sape langai mi, Yesu dai Nawku Htingnu na pru wa yang, ndai hku tsun ai, “Sara e, yu u! Ndai nlung ni gaw kaba la ai hte ndai wahpang nta mung hkik hkam nna mauhpa wa n rai nga a ni” (Mk 13:1).
Yesu gaw, “Ndai wahpang nta kaba ni hpe ya nang mu ai n rai ni? Nlung langai mi muk mi na shi a shara ha ngam taw nga na ra ai n rai; dai wahang ni hta na nlung shagu langai mi a ntsa e langai i n mara hkra run ayai hkrat mat na ra ai, ngu nna shi hpe tsun wu ai” (Mk 13:2).
Ndai ga gaw Yuda masha shagu hpe myit kahkra kajawng shangun ai ga tai ai gaw teng sha rai nga ai. Hpa majaw nga yang, shanhte gaw Yerusalem hpe mung nawku htingnu hpe mung grai manu shadan ma ai rai nna Nawku htingnu hta shanhte a Karai Kasang nga nga ai shara re ngu kam sham ma ai majaw rai nga ai.
Palestine kaw na Yuda myusha ni gaw poi kaba nhtoi ni hta Yerusalem hte nawku htingnu de, n law htum, laning mi kalang sa du ma ai. Maigan mungdan nga pra hkawm ai ni mung, prat mi hta kalang sha gaw dai shara de sa du mayu ma ai. Shawng na lang sa du nna mu lu ai ni mung kabu myit dik myi prwi hte rai ma ai.
Yesu Madu mung dai hte maren, Yerusalem hpe tsaw ra ai rai nga ai. Lai wa sai laban na Kabu Gara Shiga hta Yesu Madu dai lam hku lai sa wa yang masha law law shi hpe shaga jahtau shakawn shagrau ai hpe hkam la lu ai hpe na lu ga ai.
Yesu Madu hkrap ai lam lahkawng rai nga ai; (1) Yesu Madu gun sa ai hkye hkrang la lam hpe masha ni ningdang nna n hkap la ai majaw (2) Masha ni hta grau nna Yerusalem hpe tsaw ra ai Yesu Madu Yerusalem hte Nawku Htingnu hten run mat na hpe tau nau mu taw ai majaw rai nga ai. Dai gaw yesu Madu gun sa ya ai hkye la lam hpe n hkap la ai ni hten run na lam lamik kumla nan rai nga ai.
Yesu Madu kalang bai du sa na lam
San Mahte, Marku hte Luka ni gaw shanhte a Kabu Gara Shiga Chyum Laika hpe Yerusalem hten run mat ai hpang shaning gade n na ai aten hta ka da ai rai ma ai. Shanhte a prat, anhte a prat, hpang na prat, prat shagu na masha ni a matu ka da ma ai rai nga ai. Yesu Madu hkum nan Yerusalem hten run na lam, mungkan htum na lam hte Shi kalang bai du sa na lam myit htoi, ga sadi jaw da sai rai nga ai. Madu Yesu tau nau myi htoi da ai gaw Kasa ni, Mungdan daru magam ahkang aya lu ai ni hte Makam hpung ningbaw ni a zingri zingrat ai hkrum wa na lam mung lawm nga ai.
“Nanhte mahtang tinang dai sadi let nga mu. Nanhte hpe rim a nna tara rung de ap kau na mara ai. Tara jawng ni hta nanhte gaw anu kayat ai hkrum na mrin dai; up hkang ai du ni hte hkawhkam ni a man e nye a majaw nanhte tsap nna shanhte hpe dai Kabu Gara Shiga tsun dan lu na rai myit dai,” (Mk 13:9).
Yesu kalang bai du sa wa na ngu ga sadi jaw da ai gaw, dai zawn re ai aten ni hta shanhte hte rau sa nga nna shanhte hpe hkye la na ngu ai lachyum mung rai nga ai. Yerusalem na Hkristan ni gaw Kabu Gara Shiga ka ai ni sadi jaw ai lam ni hpe ahkyak la ma ai. Roma hpyendap du wa sai ngu na ai shaloi jang, mare kaw na pru mat ma ai. Hkristan n reai ni gaw shanhte a ningbaw ni hpe kam myit hte mare kaw naw nga nga ma ai. Dai majaw mung Roma hpyen ni du shang wa ai shaloi, mayam hku rim shaga la hkrum ma ai. Roma hpyen ni Yerusalem hpe mung jahten kau ma ai.
Yerusalem mare hten run ai gaw dai prat na Hkristan ni a matu Yesu Madu, shanhte a buga dum nta majing de bai shaga la na ra ai ngu ai ahkyak ga sadi byin pru wa na lam a kumla rai nga ai. “Dai shaloi e, Masha Kasha gaw daru magam hpung shingkang kaba hte sumwi ni hta e du sa ai hpe mulu na mara ai. Dai hpang shi gaw lamu kasa ni hpe lamu ga jut mali maga de shangun dat nna, aga htum ai shara kaw nna lamu htum ai shara du hkra shi lata la ai masha ni hpe shinggyim jahpawng la na maru ai,” (Mk13:26-27).
Yesu Madu lahkawng lang ngu na bai du sa na aten gaw galoi rai nga kun
Yesu Madu a dai myihtoi ga gaw galoi byin wa na rai? Dai ga san hpe sumru htai la ai hta moi na Hkristan ni a shut shai ai htai lam, hkam la ai hpe shakut nna koi kau ra ai. Shanhte gaw shanhte a prat hta mungkan htum nna,Yesu Madu kalang bai du sa na ngu ai ga sadi byin wa na re ngu hkam la lai wa ma ai.
Shawng daw hta, San Pawlu hte rau Kasa ni mung dai hku hkam la lai wa na masa hta nga ai. Raitim, Wenyi a nhtoi jahtoi shadum ya ai a marang e, dai hku n rai nga ai hpe gawng ngwi ngwi rai chye na wa ma ai. Shawng de de shanhte hkam la ai lam shut ai. Shaning wan hku na jang she byin wa na kun? Raitim, ahkyak dik lachyum htai la ga nga yang, “Yesu Madu gaw gade nna yang du sa na rai nna, gumlau gumle ai lam ni kaw nna shanhte hpe shalawt ya na ra ai,” ngu ai rai nga ai. Shanhte langai hpra si ai shaloi, Yesu Madu ga sadi tawn da ai hte maren byin wa ai majaw gaw shanhte hkam la ai lam mung n shut ai ngu tsun mai nga ai.
Shanhte nsa hti ai shani gaw Yesu Madu a lahkawng lang ngu na bai du sa ai re ngu chye na wa ma ai. Dai gaw nsa hti mat sai wa a matu gaw hpang jahtum mungkan htum ai shani mung rai nga ai.
“Anhte hpe ngwi pyaw simsa ai lam jaw ya ai Karai Kasang gaw, nanhte hpe lam shagu hta shachyoi shapra nna, anhet a Madu Yesu Hkristu bai du sa ai shaloi e, nanhte a Wenyi, myit masin hte hkum hkrang ting gaw mara n kap hkra bau maka nga u ga,” ngu San Pawlu, Madu Yesu Lahkawng lang ngu na bai du sa na lam hte seng nna myit tsang nga ai lam ka da nga ai (1Hte 5:23).
Yesu Madu a lahkawng ngu na bai du sa na hpe myit mada tawn da ai gaw anhte a matu ahkyak dik ai lam langai rai nga ai. Grai tsan gang la ai myit mada lam n re ai sha, gade nna yang hpring tsup wa na myit mada lam rai ra ai. Anhte akyu hpyi ga ai ga gaw Yawhan a shingran laika 22:20 kaw na “Sa rit Madu e, Sa rit” ngu ai rai nga ai.
Yesu Madu lahkawng lang ngu na bai du sa na lam ndau ai gaw anhte hpe hkrit tsang shangun ai n re, n-gun jaw ai rai nga ai
Yesu Madu gaw, mungkan htem na nhtoi, aten hpe kadai mung n chye ai, shing n rai, tsun dan hkrum ai masha n nga ai; dai hte seng nna gaw Kawa Karai Kasang langai chyu sha chye ai ngu tsun ai hpe Mk 13:32 hta mu lu ga ai.
Yesu madu lahkawng lang ngu na bai du sa na hte seng nna tsun ai gaw shinggyim masha ni hpe jahkrit na matu n re ai sha, n-gun jaw ai mahtang she rai nga ai. San Mahte, Marku hte Luka ni gaw Yesu Madu bai du sa na lam hte mungkan htum na lam hte seng nna shadum sadi jaw ga lahkawng jaw da ma ai. (1) Sadi maja let myit mada ala nga na matu rai nga ai. “Dai ahkying galoi du na ngu ai hpe nanhte n chye nga myit dai majaw, sadi let maja nga mu,” (Mk 13:33). (2) Yesu Madu lawan dik ai hku bai du sa na ra ai. “Dai lam ni byin hpang wa jang, rawt tsap nna baw ni hpe sharawt mada yu mu; hpa majaw nga yang, nanhte hpe hkye hkrang la na aten ni wa ra ai,” (Lk 21:28).
Anhte gaw Sadan a hkalem hkalau ai pyaw hpa lam kaw hta n lu nat ma ahkyak ai. Yesu Madu hta kam sham nga ga ai rai yang di sadan a hkalem hkalau ai kaw nna anhte n myit mada ai aten hta sa du hkye la na ra ai. Yesu Madu anhte hpe jahkrit ai rai yang gaw “dai lam ni byin hpang wa jang, rawt tsap nna baw ni hpe sharawt mada yu mu,” ngu n tsun ai sha, “rawt hprawng nna makoi nga mu” ngu mahtang tsun na rai nga ai. Akyu ara jaw na langai ngai hpe myit mada nga na matu saw shaga ai rai nga ai.
Misa hkungga nawng jau shagu, “Madu Akyu Hpyi Ga” tsun ngut ai hpang Jau tsun ai akyu hpyi ga langai nga ai, “Madu e, hkye la ai Madu Yesu Hkristu du sa na hpe anhte myit mada la nga ai laman hta e, n kaja ai lam mahkra hta na shaw la rit. Anhte a prat hta e ngwi pyaw simsa ai hpe jaw ya rit. Shut hpyit mara hpe galoiung koi yen kau nna, sharu shatsang ai lam shagu hta na lawt lu na matu, anthe hpe matsan dum garum ya rit,” hpyi ai.
Ndai akyu hpyi ga hpe kahtap kahtap nna hpyi grin nga ai. Karai Kasang gaw anthe hpe n kaja ai lam mahkra hta na makawp maga ya na, grau nna mara hta hta na hkye la na hpung dagu nga ai, myit sharawng awng ai rai nga ai.

Akyu hpyi saga
Wa Karai Kasang e, Hkye la Madu Yesu Hkristu lahkawng lang ngu na bai du sa ai shaloi jing jing rai nga na matu, mara ni hpe koi yen kau let mai kaja ai lam ni galaw sa nga yang mungkan dinghta marin ai lam yawng hpe koi yan kau lu na chye ju jaw ya rit. Anhte a Madu Hkristu a marang e hpyi nem nga ga ai. Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (33) ngu na laban rai nga ai.
Hti ang ai Ja Chyum Mungga ni gaw
Chyum Mungga Daw (1) – Daniel 12:1-3
Chyum Mungga Daw (2) – Heb 10:11-14,18
Kabu Gara Shiga – Mk 13:24-32
Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.