Radio Star 2021 Shingjawng Lamang Hta Tara Agyi Galaw Na Matu RVA Magam Gun Langai Lata Hkrum

Radio Star ngu ai  Radio Shapoi ai hta ningtawn  zet let ai masha ni hpe lata ai  shingjawng poi lamang hta Tara Agyi hku nna shang lawm na matu Radio Veritas Asia (RVA) magam gun langai hpe lata san da ma ai.

Philippines Mungdan, RVA Ginjaw Rung na ningtau Program Director  magam gun rai nga ai Arlene A.Donarber hpe Sinpraw Asia Mungdan maga na masha hku tara agyi langai galaw ya na hpe LInkedin ngu ai Social Media website kawn shi hpe matut mahkai wa ai re hpe chye lu ai.

“I was surprised also when the first time they contacted me” (shan hte ngai hpe matut wa ai shaloi akajawng sha byin mat ai)

nga nna Ms. Arlence gaw shi hpe tara agyi langai hku lata hkrum ai lam hte seng nna tsun mat wa ai.

Ndai RadioStar shingjawng poi lamang gaw Mungkan ting na hkik hkam galu kaba ai masha ni hte matut mahkai let Radio shapoi ai magam bungli galaw nga ai hta na ningtawn ai masha ni hpe lata la ai, shapan shalat ai lamang langai rai nga ai.

Ms.Alene gaw Philippines Mungdan Radio Shapoi dap a gawng malai hku nna shang lawm sa wa na rai nga ai. Shi gaw Australia, Canada, India, Europe, UK, New Zealnand, Africa, Asia, USA hte Dingda America hkan na tara agyi marai 100 kaw na langai rai wa na re.

RadioStar kaw tara agyi galaw na matu ya ten Radio Shapoi Dap ni hta Program Director, Ningtau Program Director hte Radio lamang galaw woi awn ai ningbaw ni (shing n rai) dai hte seng ai mahkrum madup law sai masha ni hpe lata san da ai re lam chye lu ai.

“Shingjawng lamang gaw kade kade n dang ai, ya nnan shingjawn ai ten kaw na yawng gaw grai hkrak ai hkrai rai ma ai, kaga tara agyi ni mung ngai vote jaw ai masha hpe sha vote jaw na hpe kam ai hku re” ng anna Mr. Alene gaw dai shingjawng poi a lam November 6 ra shani RVA Kachin de tsun lai wa ai.

2021 ning na RadioStar hpang jahtum shing jawng poi  final de du nga ai ni gaw Vanessa Murphy (Canada), Lizzie Romain (UK), Dylan McKee (Northern Island), Rosa Serret (UK) hte Sean Carey (Ireland) ni rai ma ai.

Shingjawng poi hta dang ai wa gaw UK Mungdan, Juice 1038, Belfast ngu ai Radio Shapoi shara hta Radio Show poi langai galaw na ahkang  mung lu na re lam chye lu ai. 2021 RadioStar shingjawng masha ni hpe Radio Shapoi ninghkring rai nga ai Nails hte Tracey kawn manu jahpu n la ai sha sharin matsun Sara galaw ya na re lam chye lu ai.

Lai wa sai 2020 ning  na RadioStar Champion rai nga ai Alice Vickery gaw BBC shiga shapoi dap kaw bungli galaw mayu ai shi yaw shada da ai pandung de du lu nu ai rai nna, shingjawng poi lamang hta ra lata Vote wan mi jan lu nna shi a lam hpe masha  wan mi jan hpaw yu lai wa ai lam chye lu ai.

Radio Star shingjawng lamang hpe On Air Coach ngu ai wuhpung ni kawn galaw ai rai nna shan hte gaw nsen radio shapoi ai masha ni hpe sharin shakat ya ai ni rai ma ai.

Source: RVA English