MMA Mungkan Champion Atsam Ningtawn Awngla Nsang A Labau Shang Hkrangbung Magri Sumla Hte Shagrau Sha-A Hpawng Lamang Galaw

Mixed Martial Arts ngu ai MMA, Middle Weight hte Light Heavy Weight Mungkan Champion atsam Ningtawn Nsang Awng La a labau shang masat hkrangbung magri sumla hpaw poi hte shagrau sha-a akyu hpyi hpawng lamang kaba hpe 2018 December 15 ya shani, Jinghpaw Mungdaw Myitkyina Muklum, Shatapru Manau Wang hta wu wu di di galaw lai wa sai.

Dai hpawng lamang hta, Jinghpaw Mungdaw hkringmang daju Dr.Hkyet Awng hte ningrum ningtau jan J.Kaw Bu, Rapdaw Ningbaw ni,Tara Agyi Daju Tu Ja hte Asuya magam dap shagu na Salang ni,Nawku Hpung shagu na Ningbaw ni, Jinghpaw Htunghking Hpung Ginjaw Salang ni, WMR salang ni, Lauban lau na ni hte Mung Shawa masha ni mun kaba sa du shang lawm lai wa ma ai.

Mungdaw hkingmang Daju, Dr.Hkyet Awng hku  nna Mungga shaga ai hta, “ Myanmar Mungdan Ginsup ningtawn lam hte Mungkan ting hpe ka’up na’ ျမန္မာ့အားကစား ကမၻာကုိလြမ္းရမည္ “  ngu ai lashum ga hte maren, shakut shaja galaw sa wa sai hta dai ni Kachin Myusha Nsang Awng La gaw Myen Mung a arawng sadang hpe dan dawng shangun ai sha n-ga, Mungkan Champion atsam Ningtawn ginsup Ninghkin kaba byin tai wa sai majaw, grai kabu arawng  la ai  lam, Ramma ni mung Nsang Awng la hpe katsi la nna Nsang Awng La zawn, Mungdan a arawng hpe dan dawng shangun ai ginsup ninghking kaba ni byin tai wa na matu , ka-ni nanghpam hte pyaw hpa lam hta n hkrat sum ai sha shakut shaja sa wa na hpe n-gun jaw hpaji jaw ga tsun lai wa sai.

N-dai Nsang Awng La a labau shang Magri sumla galaw ai hte seng nna, Wunpawng Htunghking Hpung Ginjaw Ningbaw Duwa Dagung kawn sang lang dan ai hta, Awng La Nsang a hkrang bung magri sumla hpe galaw da ai lam gaw, ya kaba wa na ma ni kasi la nna, Mungkan madang hku ningtawn ai ginsup ninghkring ni law law paw pru wa na hte nanghpam kaw na ginsup lam de myit shang myit lawm ai ni  law wa na matu hte ninggun ja wa Nsang Awng La hpe labau shang myit dum nga lu na matu yaw shada let hkrang shapraw galaw ai re lam chye lu ai.

Dai hpang atsam ningtawn Awng La hpe poi shabyin shatai komiti lit nga ai ni kawn ja dazik kumhpa shagrau ai hte Nsang Awng La a Kanu Kawa, Ningrum Ningtau jan hte Kasha ni hpe mung masat masa kumhpa ni shagrau jaw ma ai.

Nsang- Awng la hku nna, Dai ni n dai poi hta du sa ai  ni kaw na Makaji ni yawng lani mi na aten hta Mungkan a Champion ni byin wa na ni re ai majaw atsam marai n shayawm ai sha tinang myit lawm ai lam hpe pandung du hkra, shakut shaja sa wa na matu n gun jaw shatsam ga tsun lai wa sai.Dai hpang shi a MMA Jau Hkyen hpaji hpe mung ma ni hte rau State Pyin ra n tsa hta hkrang shala ginsup dan lai wa sai.

Dai  Atsam Ningtawn Awngla Nsang a labau shang Hkrangbung Magri Sumla hte shagrau sha-a hpawng lamang hta, lai wa sai September shata hta,Singapore Mungdan de  Jauhkyen ginsup shingjawng ai kaw ningtawn kumhpa lu wa ai ni hpe mung, masat masa kumhpa shagrau jaw sai hte n sang awng la a shagrau sha-a poi lamang hte hkrang bung magri sumla galaw na matu alu jaw garum madi shadaw lai wa sai  ni hpe shagrau masat laika pa jaw ma ai. Awng La Nsang a matu laksan akyu hpyi ya ai lam,Yungwi ninghking Aba Di hte JLH Dakkasu Jawng ma ni pawng hpawn let Awng La hpe shagrau ai mahkawn hpe mung hkawn lai wa ma ai.

Daw lahkawng hku nna, Awng La Nsang a hkrang Bung magri sumla hpe, Mungdaw Hkring Mang Daju Dr.Hkyet Awng, Wunpawng Htunghking  Ginjaw Hpung Ningbaw Duwa Htunghpu Dagung hte Wupawng Mungchying Rapdaw hpaji jaw salang Duwa Lahtaw Hkun Seng ni kawn lai sumri rep di nna hpaw dat sai rai nga ai.

Dai Hpawng hta laksan manam ni hpe hpe shabyin shatai shatai Komiti kaw nna shani shat daw jaw sai hte sa du ai shawa masha ni yawng hpe mung shat kada daw jaw ya sai rai nna Hpang jahtum hta Yungwi ninghkring kaba ni hku nna shangwi shapyaw ai lam hte hpawng hpe ngwi pyaw awngdang ai hte galaw la lu sai lam chye lu ga ai.

Thomas Mung Hpan