Shatapru Jau Ginwang, St.Patrick's Covid-19 Tsi Lajang Ginra Shata (3) Hpring

Myitkyina Sasana, Shatapru Jau Ginwang, St.Patrick's Quarantine Center kaw shata (3) laman Covid-19 machyi masha law law hpe gawn lajang ya lai wa sai lam chye lu ai.

2021 October 21 ya shani shata (3) hpring lamang hku nna ap nawng Sara/Saranum ni hte Ramma ni hpe Ginwang up Wa Jau Dr.Peter Hka Awng Tu woi awn let U-mun Ginsup Shingjawng ai lam galaw lai wa ma ai.

Shata masum laman Covid machyi masha 171 hpe tsigawn lajang ya lu sai rai nna 167 gaw mai tsai nna tinang dum nta de bai wa nga lu sai lam, nkau ni oxygen marawp ra ai madang du tim si hkrung si htan byin ai lam nnga ai sha grau kaja ai hku gawn lajang lu na matu ginjaw Covid-19 shamai shatsai dap, Aung Nan s.tCamillus Oxygen Care Center hta matut tsi lajang na matu galaw ya ai lam chye lu ai.

" Ndai shara kaw sa tsi lajang ai ni grai wa laja lana byin si hkrung si htan machyi ai lam gaw nnga ai, asak kaba nna machyi sawng ai ni hpe ndai kaw na volunteer ramma ni hte nurse ni shani shana yu gawn lajang ya nga ma ai, ngai hku nna dai zawn galaw ya ai  ramma ni hpe grai shakawn shagrau mayu ai hku re" nga nna Ginwang up Wa Jau Dr.Peter Hka Awng Tu tsun lai wa ai.

Shata 3 tup ap nawng lai wa sai Rammani hpe shakawn shagrau ai hku nna mung matut nna ap nawng na matu mung n-gun jaw ai hku nna U-mun ginsup lamang hte shagrau lekmat jaw ai lam galaw ai re nga nna Wa Jau tsun lai wa ai.

St.Patrick Covid Care, Quarantine center hpe  Shatapru Jau Ginwang kawn woi awn let 2021 July 21 ya shani kawn hpaw hpang wa ai rai nna ap nawng ramma marai 15 hte Nurse 2 aten tup yu nga ai rai nna ra ahkyak wa jang tsi du ni mung sa du yu ya ai lam galaw ai, n dai quarantine center  kaw Shatapru, Tanghpre, PLN hte Waingmaw hkan na machyi masha ni sa du tsi tsi hkam la ma ai nga nna Center hpe woi awn yu nga ai Brother Nawbu Tu Hkum tsun lai wa ai. 

Quarantine center hpe shata 3 sha hpaw na matu lajang da ai raitim Covid nhkoi shi ai re majaw matut hpaw mat wa na re ai lam Brother matut tsun ai.