Du Wa Na Hkriastmas A Matu Wa Sarabyin Galaw Sa Wa Na Nawku Daw Jau Ai Lamang Mahkyen Ni

Wa Sarabyin galaw sa wa na Hkristmas Nawku daw jau lam lamang kata lam mahkyen ni hpe nawku daw jau lam hte seng ai Vatican Nawku hpung ginjaw magam dap kaw nna ndau shapraw dat nga ai.

Shaning shagu Hkristmas aten laman hta Hkristmas yup tung Missa galaw ai aten kaw nna Hkristmas ladaw laman ting Wa Sarabyin galaw sa ai nawku daw jau ai lamang ni law law rai nga ai, dai ning na matu Hkristmas ladaw laman galaw sa mat wa na Wa Sarabyin a nawku daw jau ai lamang kata lam mahkyen ni hpe nawku daw jau lam hte seng ai Vatican nawku hpung ginjaw magam dap a lit hkap rai nga ai Monsignor Guido Marini kaw nna ndau shapraw dat nga ai.

Wa Sarabyin Francis galaw sa mat wa na Hkristmas nawku daw jau ai lam mahkyen ni hta,

December 24 ya shana hkying 09.30 aten hta Hkristmas yup tung Missa hkungga hpe san Peter nawku htingnu kaba hta galaw na,

December 25 ya Hkristmas shana, yup tung hkying 12 aten hta “Urbi et Orbi” ngu ai mungkan ting hpe madi nna tsun shaga ai wa sarabyin a Hkristmas mungga hte Hkristmas shaman ya ai lam hpe San Peter Nawku htingnu kaba a nchyun npan pinra kaw nna tsun shaga shaman ya ai lam galaw na,

Dec 31 ya shana maga hkying 5:00 aten hta Chyoi pra ai hkum sacramentu hpe nawku hkungga, nawku daw jau ai lam galaw let 2018 ning tup hkam la lu sai chyeju kum hpa ni yang a matu chyeju dum lam galaw let shaning 2018 ning hpe hpumdin dat na.

Jan praw 1 ya jahpawt hkying 10:00 aten hta gaw, Chyoi pra ai Nu Maria Karai a kanu poi hte Mungkan simsa lam masat nhtoi poi Missa hkungga hpe san Peter nbawku htingnu kaba galaw na, Jan praw 6 ya Hkaw Hkam masun poi Missa hkungga hpe jahpawt hkying 10:00 aten hta galaw na,

Hkristmas ladaw hpe Madu Yesu kashin gamun hkam la ai poi hte shangut ai rai nga ai. madu Yesu kashin gamun hkam la ai poi nhtoi gaw Jan 13 shani rai nga ai, dai shani na Missa hkungga hpe gaw Sistine Chapel ngu ai Vatican kaw na Nawku htingnu hta galaw nna dai Missa hkungga hta ma kaji ni hpe kashin gamun hkam ya ai lamang mung lawm na re lam chye lu ai.

Source : Vatican News