Asak Kung Sai Jau Ni Hte Machyi Ai Ni Hpe Wa Sarabyin Francis N-gun Jaw Laika Hte N-gun Jaw

Italy Mungdan, Lombardy kaw nga ai asak kung kaba, machyi taw nga ai Jau ni hpe ya na zawn n-gun jaw ai hta shanhte gaw asak naw ram ai ni a matut myit mada shara, yupmang shingran ni hpe lam hpaw ya lu ai ni rai ma ai lam, shanhte a labau hpe bai sumru, hkai dan ai gaw asak naw ram ai ni a matu n-gun tsi kaba tai na re lam, asak galu nga lu ai gaw laksan chyeju re ai lam, machyi ai mung laksan chyeju hkam la na ahkaw ahkang kaba re lam, September 16, bat mali ya shani, Italy Mungdan, Caravaggio kaw, shinggyim nau na masat dingsat nhtoi hta, asak kung, machyi nga ai Jau ni hte Wa Saradaw ni hkrum zup ma ai shaloi, Wa Sarabyin Franics n-gun jaw laika shagun let n-gun jaw da ai rai nga ai.

Wa Sarabyin a n-gun jaw laika hta Chyum Laika hta na Myihtoi Simeon hte Anna yan a lam hpe sumru na matu n-gun jaw da nga ai. Hpa majaw nga yang shan lahkawng gaw asak kung dinggai dingla aten hta ma Yesu hpe shan a lata hte pawn la lu ma ai rai nna, hkalung ai, si mani ai, matsan dum lama ai, lanu lahku ai chyeju hpe hkam sha lu ma ai hte ndau shana ya lu ma ai, rai nga ai ngu Wa Sarabyin Francis shingdaw n-gun jaw da nga ai.

“Nanhte gaw nanhte a prat labau hpe bai myit sumru, hkai dan let asak naw ram ai ni a shawng lam myit mada shara, yupmang shingran ni hpe galai shatsaw ya lu na rai myit dai, machyi makaw hkrum nga ai Jau ni gaw nanhte a laklai laksan re ai mahkrum madup re ai hpe myit dum nga mu, Madu Yesu hte rau wudang hpai, nni nkri hkam, hkam sharang let Shi hte grau bung wa lu na rai ma ai, ngu mung asak kung machyi nga ai ni hpe n-gun jaw da nga ai.

Shinggyim nau na shada ginlung kahkying gumding masat dingsat Misa Hkungga hpe gaw Caravaggio na Santa Maria del Fonte Shrine kaw hpawng de nawng jau ai rai nna, Milan kaw na Saradaw Kaba Archbishop Maira Delpini woi awn nawng jau ai re lam chye lu ai. Misa Hkungga nawng Jau ai hta chyam bra ana Covid 19 a majaw n nga mat sai Jau marai 300 daram a matu mung yaw shada lam shalawm ai re lam chye lu ai. Lombardy ginwang kaw na sha Jau 92 mung chyam bra ana Covid 19 a majaw n nga mat sai re lam chye lu ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-09/pope-francis-sick-elderly-priests-lombardy.html