Karai Kasang A Mungga - Paska Ladaw Laban 25, 2021

Masha hpe dau jau yang tsaw dik htum arawng rai nga ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (25) ngu na laban rai nga ai.

 

Shani shagu na prat hkrunlam hta lam nbraw kaw du jang lam lahkawng hta na langai hpe lata ra chyalu rai ga ai. Ndai laban na Chyum mungga hta gyip ai lam hpe lata na matu Yesu Madu hkang da ai, n-gun jaw da ai.

 

Pyaw daw kadaw lam hpe lata yang matsan hku de du mat na. Chyahkring chyahkra yak hkak jam jau ai gyip ai lam hpe lata ai rai yang htani htana ngwi pyaw lam de du lu na. Sadi maja let tengman jaw ang ai lam hpe lata nna Hkristu a hpang hkan ai hta hkrum ang na yak hkak jam jau lam ni hpe hkap la hkam jan na n mai hpang hkrat ai. Makam hte nhtan shai ai yaw shada lam ni hpe koi yen kau ra ai.

 

Yuda Myusha Ni Lata Yak Ai Lam

Ndai laban na chyum daw langai gaw “Hpaji Byenya laika”, shing n rai, Solomon a hpaji byenya laika hta na rai nga ai. Solomon ka ai laika gaw n rai nga ai. Ga shaka dingsa a hpang jahtum chyum laika rai nga ai. Yesu n shangai shi yang shaning (50) daram aten hkan ka da ai rai nga ai. Ndai laika hpe Perlestine kaw n re ai, Yuda ni nga lai wa ai Egyip hkawhkam up ai shara, Alexandria kaw mu ai laika rai nga ai.

 

Dai majaw mung Hkristan nkau ni ndai chyum laika hpe chyum laika buk hku n hkap la ma ai. Kahtawlik Nawku hpung gaw kaga Hkristan ni n hkap la ai shawng shawng shaning law law kaw nna hkap la hkrat wa sai rai nna, ya mung hkap la ding yawng rai nga ai.

 

Ndai chyum laika hpe ka lajang ai ten, Yuda masha law malawng gaw Perlestine kaw n nga mat ma sai. Roma hkawhkam up ai mungdan ni hta chyam bra nga ma sai. Shanhte hpe “chyambra hkawm ai Yuda ni” (Diaspra) ngu shaga shamying ma ai.

 

Tara maigan mung ni hta chyambra hkawm ai Yuda ni mayak manghkang amyu myu hte hkrum katut lai wa ma ai. Tara maigan myusha ni gaw shanhte hta hpaji grau kung kyang ma ai, ginsup lam hpe shinggyim hku hkau lam yan hta grai ahkyak da ma ai.

 

Dai majaw chyambra hkawm ai Yuda ni, grau nna, ramma ni gaw tara maigan myusha ni hpe n-gun lu wa ma ai. Yuda htung hte makam hpe kabai kau gwi wa ma ai.

 

Makam gring nga ai ni a matu gaw makam kau da ai ni e ninghkap ai hte dang sha roi rip ai hpe hkrum sha ra ma ai. Asak hpe pyi jahte tam hkrum wa ma ai. Yuda makam hpe kau da ai ni gaw tara maigan ni a man e myi man pa, myi man lu ma ai.

 

Ndai laban na chyum daw langai gaw makam hpe kau da ai Yuda ni ga sadi dung ai Yuda ni a asak hpe jahkrit wa ma ai, dingbai dingna jaw wa ma ai lam rai nga ai.

 

“Shanhte gaw Madu a myusha ni a matu hpyen ni tai ma ai rai nna, si grin ai ni rai nga ninglen mara dam jaw ai hta sadi maja nna hkam sharang let yu maja nga ra ai. N kaja ai lam ni hpe kau da na matu shanhte hpe aten hte ahkaw ahkang matsan dum ai hte jaw da ai,” (Hpaji Byenya 12:20).

 

Yesu a prat hta na Yuda ningbaw ningla ni wudang ntsa jan noi da ai Yesu hpe dai hte maren di ma ai. “Shi gaw masha ni hpe hkye la ai, rai ti mung shi hkum nan hpe gaw n hkye la lu a hka!....Shi gaw Karai Kasang hpe kamhpa nna, Ngai gaw Karai Kasang a Kasha rai nngai, nga nna shi tsun ai, Rai sa, dai rai yang gaw ya Karai Kasang shi hpe hkye la mayu nga ai kun, anhte yu yu ga, nga ma ai (Mt 27:42-44).

Chyum daw langai hta sadi dung ai Yuda ni lata la ra ai lam lahkawng hte hkrum ma ai. (1) Tara maigan ni a lam hte (2) Karai Kasang jaw da ai lam rai nga ai.

 

Yuda ningbaw ningla ni gaw gumrawng gumtawng ai, nang mak law hpa ai, n ju n dawng ai myit ni hte makam masham lam hpe woi awn nga ma ai. Yesu Madu gaw kaning re ai masa hta rai tim, Mungkan ga hpe hkye la na matu Kawa Karai kasang hpe madat mara ai lam hpe sha lata hkawm sa ai.

 

Myit Yaw Shada Lam Grai Tsaw Jang Yesu Madu A Lam Hta Hkawn Na Matu Dingbai Dingna Byin Ai

Lai sai laban hta Yesu Madu Petru hpe daru kau ai naw dum na ma ai.

 

“Satan e ngai kaw na pru mat wa u. Na a myit ai lam ni gaw Karai Kasang kaw na n rai, masha kaw na she rai nga lit dai, ngu nna daru kau wu ai (Mk 8:33).

 

Ndai laban hta mung Yesu shi a nni nkri hkam si hkam na hpe lahkawng lang ngu na bai tsun dan wa ai lam San Marku tsun dan ai rai nga ai. Ndai lang gaw sape ni Yesu hpe san na hkrit tsang nga ma ai.

 

“Rai ti mung, shanhte gaw ndai sharin achyin ai lam hpa ngu mayu ai re hpe n chye na da mu ti mung, shanhte shi hpe san yu na hkrit agam da mu ai,” (Mk 9:32).

 

Shanhte ni ndai lam hte seng nna, chye mung n chye na ma ai; chye ma n kam chye ma ai. Hpa majaw nga yang shanhte myit mada tawn ai Yesu gaw Mungkan ga hpe up hkang na hkawhkam, shanhte gaw arawng aya kaba ai hkawhkam lawu na du gyi ni rai na hpe myit mada ma ai majaw rai nga ai.

 

Yesu chyawm gaw Kawa Karai Kasang a yaw sin ai lam hte maren hkawm sa na myit dating daw dan da nga ai. Kasa ni gaw shinggyim myit myit ai lam hpe n kam tawn kau da ma ai.

Raitim, Yesu Madu shanhte a myit hpe galai shai ya lu ai; Karai Kasang a myit ra ai hte maren sawn sumru lu ma ai. Mungkan ga na yak hkak jam jau lam ni gaw hkye hkrang la lam hpe jaw lu ai ngu hkaw tsun lu wa ma ai. Shanhte hkum nan dai lam hta hkawm sa lu ma ai (Mk 9:13).

 

Shanhte tengman lam hpe lata la na hta myit um ang ai hpe jasan jaseng kau ya ai. Tengman lam hpe lata hkawm sa ai hta dingbai dingna jaw ai lam ni yawng hpe mung awng dang lu ma ai. Yesu Madu sharin shaga ya ai chyeju hte rai nga ai.

 

Tsaw Ai Yaw Shada Lam Hpe Awng Dang Lu Ai Mahkrun Lam

Yesu gaw ma ni hpe tsaw ra ai lam chyum laika hta hkring hkring mu lu ga ai. Ma ni mara n galaw shi ai ten Karai Kasang jaw da ai shi a wenyi hte raw naw rai nga ma ai.

 

Kasa ni wa lam hta, Yesu Madu hkawhkam tai wa yang shanhte hta na kadai gaw kaba grau ai wa rai na hpe ga rawng rawng nga ma ai. Yesu gaw kung kyang sara kaba langai zawn n galai shai ai hkam sharang myit hte shanhte hpe dai sharin shaga yak ai lam hpe kahtap kahtap nna sharin shaga ya ai.

 

“Shaloi Yesu dung nna, sape shi lahkawng hte hpe shaga la nhtawm, shanhte hpe, Kadai rai ti mung, shawng shawng mayu ai wa gaw yawng a hpang kaw nga ra ai, yawng a ali ama tai ra ai, ngu sharin shaga wu ai (Mk 9:35).

 

Ma langai hpe shanhte a lapran shaga la nna shanhte hpe sharin shaga mu ai. “Ma kaji ni hta na ndai zawn re ai ma langai mi hpe nye a mying majaw hkap la ai wa kadai mung, ngai hpe hkap la ai rai nga ai; ngai hpe hkap la ai wa gaw ngai hpe sha hkap la ai n rai, ngai hpe shangun dat ai wa hpe mung hkap la nu ai rai nga ai,” (Mk 9:36-37).

 

Yesu madu hte Kawa Karai Kasang gaw ma ni hpe kade ram tsaw ra dik ai hpe mu la shangun ai rai nga ai. Yesu “dai ma a marang e sharin shaga ai lam hpe sumru yu ga. (1) Ma ni gaw nta hta kaji htum rai nga ai. kanu kawa, kahpu kana ni yawng a ga madat ra ai. Kadai mung shi kaw hpaji n hpyi ai. Shi nga kam ai hku nga lu ai rai nna, yawng a garum ai hpe lu ai shaloi mung shi pyaw nga ai. (2) Nanhte gaw dai ma a shangun ma ni rai ra ai. Shi hpe daw jau ra ai. Shi hpe jaw jau ai a marang e, yawng hpe daw jau ai ni tai wa na. Rai jang, nanhte ni ngai hte Kawa Karai Kasang hpe daw jau ai shangun ma ni tai nga na rai myit dai. (3) Masha ni gaw kaga masha ni hpe uphkang ai, shangun ai, arawng aya grau kaba ai ngu myit la ma ai. Arang aya kaba ai gaw makau grupyin, nihtep ai htingbu ni hpe daw jau ai she rai nga ai.

 

“Hpa majaw nga yang, dai Masha kasha wa pyi, masha hpe yam sha na nga nna du sa ai n rai; Masha hpe galaw daw ya na hte shi a asak hpe nawng ya kau nna masha law law hpe hkye mawai shaw la na matu she du sa ai, ngu madu tsun ai (Mk 10:45).

 

“Matsan jam jau hkam, nni nkri hkam si hkam ai, ngu tsun ai shaloi chye na hkap la mu, ndai gaw hpung shingkang lam de sa ai lam rai nna, nanhte mung ngai a hpang hkan nang na myit dai,” ngu Yesu Madu anhte hpe tsun nga ai.

 

Kasa ni gaw, Messiah ngu ai lachyum hpe shanhte a myit ra ai mungkan myit hku mahtang myit shut mang shut la ma ai. Raitim, wenyyi a lam madun ai a marang e, matut sharin hkam la ma ai hte hpang jahtum hta atsawm sha chye na hkawn hkrang wa ma ai. (1) Yesu Hkristu a shangun ma hte sape ni, ngu San Petru sakse hkam ai (1Pt 1:1). Hkristu a hpang hkan ni langai hte langai daw jau na matu mung saw shaga da ai (1Pt 5:3,5). (2) San Pawlu mung shi hkum shi hpe “Hkristu a shangun ma”, “Nanhte a shangun ma” ngu hkam la ai (Rom 1:12; 1Kor 4:5).

 

Ndai gaw anhte a prat ting hta sharin la ra ai lam rai nga ai. Shani shagu lani hte lani grau grau chye na hkra wenyi a garum shingtau ya ai hpe hpyi la ra ga ai.

 

Tsaw Ai Yaw Shada Lam Majaw Hkristan Hpun Hta Galum Kahkyin Gumding Lam Ni Hten Run Wa Chye Nga Ai

Chyum daw lahkawng hta, (1) grai nan myit sharawng awng ai yaw shada lam a majaw Hkristan ni myit garan mat ma ai, (2) tsaw ai yaw shada lam a majaw mara kaga ni mung galaw shut ma ai. Tsaw ai yaw shada lam tawn ai ni gaw, kaga masha ni shanhte hpe dingyawm dagup ra ai ngu myit la ma ai. Hkristan ni hta Hkristu ga sadi jaw da ai Wenyi a magam bungli gaw laklai shai ai.

 

Hpu nau ni hpe, nihtep ai ni hpe, matsan mayan ni hpe, kaji kadun ai ni hpe, daw jau ra ai. Yawng yawng a shangun ma tai let simsa ai hku tsaw ra myit kaba hte woi awn zinglum sa wa ra ga ai.

 

Akyu Hpyi Saga

Wa Karai Kasang e, Madu Yesu lam woi sharin ya ai daw jaw myit hte ra kadawn ai ni hpe, grau nna kaji htum ni hpe daw jau sa wa lu na chyeju atsam jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (25) ngu na laban rai nga ai.

Hti ang ai Ja Chyum Mungga ni gaw;

Chyum Mungga Daw (1) – Hpaji Byenya 2:12, 17-20

Chyum Mungga Daw (2) – Yaku 3:16 – 4:3

Kabu Gara Shiga – Mk 9:30-37

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.