KBC Kawn Covid  Machyi Masha Ni Hpe Tsi Tsi Lajang Ya Na

Jinghpaw Wunpawng Hkalup Hpung, KBC kawn Covid-19 machyi masha ni hpe tsi tsi lajang ya na shara galaw ngut sai re majaw machyi masha ni hpe masat da ai hkrang de maren tsi tsi lajang ya sana re ai lam chye lu ai.

Covid-19 laja lana machyi sawng ai masha marai (40) hte grai sawng machyi ai lam nnga ai marai (48) yawng rai yang marai (85) hpe hkap la nna KBC shamai shatsai dap na hkamja lam hte seng ai magam gun marai 47 ram hte machyi masha ni hpe tsi lajang ya na re lam chye lu ai.

Machyi masha ni hpe tawn da na shara yupku jahpan hte tsi lajang ya lu ai shadawn madang nga ai re majaw Covid machyi masha ni tsi lajang ya na ginra de sa na rai jang Hotline Phone numbat de shawng tau hkrau phone shaga shana la nna masat da ai Criteria de hpring jang she hkap la tsi lajang ya na re ai lam chye lu ai.

Machyi masha hte machyi masha sin ai ni a matu san da ai shadu jaw shadu ya ai masha ni kawn Sarawun ni a matsun hte maren shadu jaw sha na rai nna, masha langai lani mi lap 5000 hte 14 ya na matu 70000 ma na rai nna ngam ai tsi gawn lajang manu n jaw ra ai lam KBC kawn ndau da ai hta lawm nga ai.

Intensive care unit (ICU)  kaw sha  tsin mai nna laja lana rai machyi sawng ai ni gaw Myitkyina tsi rung kaba kaw sha sa du tsi lajang na matu mung KBC kaw matsun da ai lam National Unity Media shiga dap kawn shana da ma ai.

Jinghpaw Mungdaw hta  August 23 ya shani Covid ana jep mu masha nnan 160 nga nna marai 16 si sum mat ai lam  Myanmar Mungdan hkamja dap kawn ndau da ma ai raitim kaja nan machyi masha ndai hta grau law nga ai rai nna Nawku Hpung kawn hpaw da ai Covid-19 makawp ninghkap tsi tsi  lajang ya ai ginra ni hta machyi masha law law hpe yu gawn lajang ya nga ai lam chye lu ga ai.

Thomas