Dingda Asia Dan, Mungdan Ni Hta Covid-19 Hpe Ahkyak La Gasat Ra Nga Ai

“The International Federation of Red Cross and Red Crescent Societies (IFRC) kaw nna mungkan de ndau garum hpyi da ya ai hta, Anhte Dingda Asia Dan, mungdan ni Covid-19 hpe ninghkan lu na matu mung lawm nga ai. Anhte Dingda Asia Dan, mungdan ni hta Covid – 19 ana a majaw si mat sai jahpan grai tsaw lung wa ai hpe mung mu lu ga ai.

Dai majaw, lu su ai mungdan ni kawn matsan ai mungdan ni hpe garum ya na matu IFRC ni kawn garum hpyi lajing da ya ai rai nga ai.

Myanmar Mungdan, Vietnam mungdan, Malaysia mungdan ni zawn re ai matsan mungdan ni hta tsi rung tsi gawk n law ai hte, Covid 19 ana kap masha ni law she law grau wa ai hte asak sum si mat ai ni mung law she law jat nga ai, ngu IFRC kawn August 18,bat masum ya shani ndau da ma ai hpe Vatican kawn mung shalai ndau da ya ma ai.

Hpang jahtum hta shingyin jahpan hte maren, anhte dingda Asia Dan hta bat lahkawng laman Covid 19 a majaw si masha 38,522 rai sai lam chye lu ai.

“Map of vaccination, from Our World in Data,” kaw August 16 ya shani matsin da ai jahpan hte maren nga yang, anhte Myanmar mungdan hta, Covid 19 ana kawn makawp tsi “vaccine” tsi hpe ladu hkrum ngut hkra htu hkam la da ngut sai masha wan 1.53 sha naw rai nna, mungdan masha a tsa sadang (2.8%) sha naw rai nga ai. Htingbu mungdan Miwa mung masha ni gaw tsa shadang hpring tup htu ngut sai ngu ka da ma ai. Indonesia, Philippine mungdan zawn re ai mungdan ni hta gaw mung shawa masha a tsa shadang 10-11 lapran sha naw rai ma ai lam chye lu ai.

 By Fr. Patrick Gawmaw Hkawng Yae

#vaticannews

#rvakachinservice

(Source: IFRC)

https://www.vaticannews.va/en/world/news/2021-08/southeast-asia-highest-covid19-deaths-ifrc-sharing-vaccines.html