Myanmar Mungdan Na Lu Sha Taw Ai Manghkang Hpe Hparan Na Matu $ 86 Million Ra Ai Lam WFT Tsun

WFP: Myanmar Mungdan Kata Lusha Taw Nna Jam Jau Nga Ai Ni Hpe Garum Na Fund Tam 

The United Nations World Food Programme (WFP) gaw, August 6, bat manga ya shani, Myanmar mung shawa masha ni hta wan hku re ai masha lusha yak wa nna, kaw si hpang gara hkrum nga ma ai lam mungkan hpe ndau ya let shanhte hpe garum ningtum jaw na Dollar wan (86) ram ra ahkyak nga ai, ngu UN Feeding Agency kawn tsun jahpra da ya nga ai lam Vatican Shiga Dap kaw nna ndau da ma ai. 

Covid -19 chyam bra ana, mungdan kata, n myit mada law hta law jat nga ai lam, lusha taw, kaw si hpang gara nga ai ni grau grau law jat wa ai lam, kun dinghku masha ni bungli n lu rai mat ai ni grau grau law jat wa ai majaw jam jau kaba hkrum nga ma ai lam, lusha manu, sha sau hte kaga sau amyu myu, manu grai rawt wa ai lam, mung masa lam hta mung yak hkak grau magang rai nga ai lam, dawsa ai, gumshen ai lam ni mung nga dingyang rai nga ai lam, nga shara htawt sit hkawm ra ai manghkang mung grau grau law nga ai lam ni hpe mung UN kaw nna tsun ndau da ya ma ai.

Matut nna mung mungdan a tsa shadang hta na sanit shi (70%) gaw shata kru (6) laman hta lusha yak jam jau lam kaba hkrum wa ma ai lam mung sam maram da ma ai. 

“Myanmar mung shawa masha ni hta lusha taw jam jau ai manghkang law she law jat nga ai hpe anhte hkum nan mu lu ai; Yangon kaw nga ai mung shawa masha ni nga yang, shanhte hta na tsa shadang (90%) jahku shi daram gaw htap tsaw nta gawk ni hta nga ra ma ai hte lusha hpe gumhpraw hkoi shap nna mari sha nga ra ma ai; shanhte hta shang gumhpraw tam na lam n nga byin wa ai; nga ai ni mung shata shabrai n tara yawm ai ai hku sha lu la ma ai,” ngu WFP Myanmar Mungdan a Director, Stephen Anderson, ndau laika “statement” hta tsun da nga ai.

Du na shata kru a laman ndai lusha taw jam jau ai manghkang hpe hparan sa wa lu na matu US Dollar Wan 86 (million) ra ahkyak nga ai lam hpe mung WFP kaw nna tsun ndau da ma ai. 

Ya du hkra rai yang, Myanmar mungdan a kaba dik mare kaba rai nga ai Yangon hte Mandalay mare kaba lahkawng hta nga ai masha (650,000) hpe garum la lu sai lam, shanhte gaw asak kaba dinggai dingla ni, kanu num hpung ni, sasana ma ni, hte kan bau magam bungli n galaw lu sai ni rai ma ai lam chye lu ai.

February 1 ya shani, Myanmar Hpyendap kawn Mungdan Daru Magam hpe zing hkang la ai kaw nna mung masa lam hta shawa n-gun madun ai lam, Asuya magam gun ni dai magam kaw nna hkring sa ai lam (CDM), sut masa hkrat sum ai lam, shinggyim ahkaw ahkang hkrat sum ai lam zawn re ai hkrat sum lam law law, mung shawa masha wan 5.4 hpe hkra machyi shangun nga ai lam mung tsun hkai dan da ma ai lam Vatican Shiga Dap kaw nna shalai ndau da ma ai.

By Fr. Patrick Gawmaw Hkawng Yae

#vaticannews #rvakachinservice

 Source : Vatican News