August Shata A Akyu Hpyi Yaw Shada Lam: “Nawku Hpung Hkrun Lam A Matu”

August 3, bat 2 ya shani Vatican Shiga Dap kaw nna ndau da ai hta, Wa Sarabyin a August shata na akyu hpyi yaw shada lam mung lawm nga ai. “Church on the way” “Nawku Hpung Hkrun Lam A Matu” ngu ga baw jaw da ma ai.

Wa Sarabyin Francis, ndai yaw shada ndau laika hte rau, Nawku Hpung masha shagu Nawku Hpung a magam bungli ni hta Chyoi Pra ai Wenyi e shadut ya ai hte maren shang lawm gun hpai ga: akyu hpyi ai, alu atan galaw ai, garum shingtau ai magam ni hpe galaw ai, dau jau ai magam ni hpe galaw ai zawn re ai Nawku Hpung a magam hta shang lawng ga ngu saw shaga da nga ai.

Nawku Hpung hta shaga la hkrum ai gaw sasana majan je na matu rai nga ai; Nawku Hpung a “identity” sakse kumla hkrang nan mung rai nga ai “evangelization” sasana majan je ai lam rai nga ai, ngu Wa Sarabyin, Hkrang mu nsen na video message hta tsun ndau da nga ai.

Ndai August shata a matu Wa Sarabyin, Nawku Hpung a masin masa lam ni hpe sumru woi let dai Nawku Hpung a sakse kumla hkrang hte maren sasana majan je ai hta prat hta hkan nna tsawm htap ningnan masa hta shatsawm hkawm sa wa ra ga ai; dai gaw Karai Kasang myit ra ai anhte a shani shagu na sak hkrung lam rai nga ai; Chyoi Pra ai Wenyi lam madun shadut ya ai hta tatut hkrang shapraw let rawt sa wa ga ngu tsun da nga ai.

Nawku Hpung gaw prat shagu hta yak hkak ai lapran hkawm sa nga ai hpe myit dum ga; Nawku Hpung gaw sak hkrung nga ai majaw yak hkak jam jau hkrun lam hta hkawm sa ra ai; Si ai ni zawn n re ai sha, ginchyum chyat, hkingdang ai lam ntsa hta hkawm sa nga ra ai, ngu mung n-gun jaw da nga ai.

Wa Sarabyin a akyu hpyi yaw shada lam ni hta rau shang lawm let mungkan matut mahkai “Network” mahkrun lam ni hta shata shagu akyu hpyi shang lawm ga ngu mung saw shaga da nga ai.

Kanu Nawku Hpung a matu akyu hpyi ga; shaloi shi gaw Chyoi Pra ai Wenyi a chyeju atsam hte shi hkum hpe shi Kabu Gara Shiga a nhtoi hte shatsawm jahtap la lu na rai nga ai ngu, Nawku Hpung a matu yaw shada let akyu hpyi na, anhte marai hkum shagu hpe saw shaga da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-francis-prayer-intention-august-church-way.html