Tara Sakse Ni A Sai Hkaw Ai Buga Syria Mungdan Hte Wa Sarabyin Grai Myit Htep Nga

“Syria Mungdan mung chying sha ni hkrum kadup nga ai ru yak jam jau, matsan chyaren hkrum lam ni gaw Madu Yesu hkrum nga ai nni nkri lam ni re ngu ai hpe Nawku hpung mu chye nga ai” nga nna Syria Mungdan hta sasana magam gun hpai nga ai Franciscan jau ni hpang de shagun jaw dat ai laika hta Wa Sarabyin Francis tsun dat nga ai.

Tara sakse ni a sai hkaw ai buga Syria Mungdan hte Wa Sarabyin grai myit htep nga ai lam tsun shapraw let Syria mungdan hta sasana magam gun hpai nga ai Franciscan jau Jallouf hte Louai Bsharat yan hpang de madi nna Wa Sarabyin laika shagun jaw dat ai lam rai nga ai.

Wa Sarabyin a laika hta, “Madu Yesu hta kam sham ai makam masham a majaw nji nmi law law hkrum hkra nga ai nanhte Hkristian uhpung uhpawng ni yawng hte rau ngai myit grai htep nga ai lam tsun shana dat nngai, Syria mung chying sha ni hta, nji nmu zingri zingrat, matsan chyen re ai lam ni hpe Madu Yesu hkrum kadup nga ai, nanhte hkrum nga ai nji nmi lam ni hta Madu Yesu nni nkri hkrum nga ai hpe nawku hpung mu chye nga ai, nni nkri kam la nga ai gaw Madu Yesu nan rai nga ai, ndai gaw mung sung lam rai nga ai, shinggyim masha ni hkye hkrang la ai hkrum lu mu ga hkye hkrang la ai magam bungli hta shang lawm ai Hkristian ni galaw ai magam bungli ni yawng hta ndai tara sakse ni hku nna shawng lawm ai lam gaw kaga hpa magam hte mung shadawn hpa nnga nga mali ai.

 Tara sakse ni gaw Karai kasang a Mungdan maden zingha jat wa shangun nna, htawm hpang masha ni a matu Hkriastian nli tum gan hkai ai ni rai ma ai, laru ni a lapran nmai hten za mat na re ngu ai lam hpe tara sakse ni shadum sadi jaw nga ai, laru ngu ai gaw anhte a parat hta kalang sha hkrum na lam nrai nga ai, lang lang hte lang adawt hkrum nga ai laru ni a lapran hkye hkrang la ai lam hpe mu lu ai kum la ni hpe nmyit mada ai sha anhte hkam la lu nga ai.

 Wudang ntsa mara kata jen da hkrum nga ai kasha hpe myit mau ai myit ni hte azim sha sharawt mada yu nga ai Nu Maria hpe dai kasha nan sung htum ai asak hte hkye hkran la ai lam hpe jaw ya ai rai nga ai, ga si ni hte tsun shapraw nchye hkra nanhte hkrum nga ai nji nmu lam ni hpe myit mada shara kab byin tai wa hkra Karai Kasang lajang ya u ga, Missa hkungga shagu hta nanhte a matu akyu hp[yi shalawm ya nga ai” nga nna Syria mungdan Hkristian masha ni hpang de shagun jaw dat ai laika hta Wa Sarabyin Francis tsun dat nga ai lam Vatican shiga dap kaw nna shana dat nga ai.

Source : Vatican News